1-3. (a) Attu enjene anoona dhavi mabasa awa? (b) Mavuzo gani anfuna wakuliwa mwari mwa kapitulu eji?

DHILABO dhotene, attu anovilibihedha olaba wi awodhe osapela mirala dhawa. Attu ena anoziveliwana mabasa ankosani mbwenye ena kanziveliwa, anosildhiwana olaba masiku otene. Kito weyo? Onakose elobo gani wi oziveliwegena mabasa awo?

² Yehova ohiloga wi: “Vano oja, omwa, ojavo dha mabasa a mada aye si mivaho dha Mulugu.” (Kohelét 3:13) Yehova ohinisasanya na efunelo ya olaba. Noona iyene onfuna wi nagalale na mabasa ankosihu.—Kengesa Kohelét 2:24; 5:18.

³ Elobo gani enanikamihedhe oziveliwa na mabasa ehu? Mabasa gani ahinfwanyela okosiwa na Mukristu? Ninawodhe dhavi opimelela mabasa ehu wi iyo niwodhe omulabela Yehova? Mabasa a makamaka anfwanyela iyo okosa bavi?

4, 5. Yehova onoona dhavi mabasa?

⁴ Yehova onoziveliwana mabasa. Nivuru na Wita 1:1 ninloga wi: “Omaromelo Mulugu opaddutxa elabo y’odhulu na ya vati.” Mmalele osasanya dhilobo dha vati, Mulugu ohiloga wi esidhá “sapama.” (Wita  1:31) Muttanddi wehu wahagalala n’esile dhipaddutxiliye.—1 Timóteo 1:11.

⁵ Yehova onodhowavi alabaga. Yezu ohiloga wi: “Babaga onottidda mabasa masiku otene.” (Joau 5:17) Ebaribari wi kaninwodha oziwa mabasa otene akosile Yehova mbwenye mena ninoziwa. Iyene onowasakula abale anfuna odhowa olamulela wirimu na Mwanaye Yezu Kristu. (2 Korinto 5:17) Yehova vina onowaweeddiha attu a nlogo naye modhela wavaha malago. Motagiha, mabasa a olaleya anowakamihedha attu enjene osunza miselu dha Yehova esuwene dhinavaha gari ya okala na mukalakala mparaizu velaboni ya vati.—Joau 6:44; Roma 6:23.

6, 7. Yezu okosile mabasa gani?

⁶ Moligana na Babe, Yezu onoziveliwa olaba. Ahinatti odha velaboni yavati, Yezu wali ‘mesirhi wa mabasa’ a Mulugu, iyene ohikamihedha osasanyedhiwa wa dhilobo dhetene dhili wirimu vina velaboni ya vati. (Gano 8:22-31; Kolosi 1:15-17) Yezu bali velaboni ya vati wahilaba vaddiddi, valiye muzombwe iyene wali namasema. Txino Yezu wahimaga numba vina wahikosa dhilobo dhina. Mbwenye iyene wanlaba deretu ofiyedha oziwiwa ninga “namasema.”—Marko 6:3.

⁷ Mabasa a makamaka akosa Yezu velaboni ya vati ali a olaleya miselu dhapama vina wasunziha attu omuziwa Yehova. Mabasa aba olaleya, okosile mwari mwa vyaka ttaru, mudhidhi obo wotene, iyene olaba vaddiddi, oromana membesi mpaka mattiyu. (Luka 21:37, 38; Joau 3:2) Iyene wankosa oleddo wolapela  vaddiddi eddaga dila dha mbwebwe avilibihedhaga wafiyedhana attu enjene miselu dhapama.—Luka 8:1.

8, 9. Ninziwa dhavi wi Yezu wanziveliwa mabasa?

⁸ Yezu wannika mabasa a Babe vamburoni voroma onaga ninga oja waye. Mabasa aba aninvaha guru. Iyene wanlaba ofiyedha orameyeliwa mudhidhi woja. (Joau 4:31-38) Iyene wantamela gari ya wakamihedha attu osunza miselu dha Babe. Noona, wahifiyedha ologa wi: “Miyo ddiuthithimihani vati apano, ddipulihaga mabasa addivahilenyu.”—Joau 17:4.

⁹ Kavali waganyedha wi Yehova na mwanaye Yezu ahilaba venjene vina anowagalala na mabasa ankosani. Iyo ninfuna ‘nimutagihe Mulugu’ nifwaraga ttarho dha Yezu. (Éfeso 5:1; 1 Pedro 2:21) Jijene ennittukulela okosa guru wi nilabege mabasa ehu noziveliwa.

10, 11. Elobo gani enanikamihedhe okaana monelo waderetu wa mabasa?

¹⁰ Ninga emeleli a Yehova, ninofwanyela olaba na guru wi nivisapele vina nasapele amudhehu. Ninofuna wagalala mmabasani mwehu, mbwenye dila dhina enorutxaga. Akala weyo kumziveliwa na mabasa ankosiwe elobo gani enaukamihedhe?

¹¹ Okane monelo waderetu. Txino kinwodheya okosa matxinjo a mabasa obe mburhoyá, mbwenye enowodheya osaddula moonelo wehu. Ononelamo ejile ennifunana Yehova enonikamihedha. Motagiha Yehova onfuna wi mazambo wa ntakulo alabe  wila awodhe osapela murala waye. Ottiya ejo, Bibilia onloga wi ole ohinatanala amudhaye, ‘otakala murima opitta ole ohineddana magano a Mulugu.’ (1 Timóteo 5:8) Akala weyo wamwazambo, mohaganyedha onolaba vaddiddi wi wasapele amudhawo. Txino kunziveliwana mabasa ankosiwe, mbwenye kudduwale wi guru enkosiwe ya wasapela amudhawo enomwagalaliha Yehova.

12. Ekalele eni yofuneya okala namalaba wokuluveleya?

¹² Okale namalaba wokuluveleya. Ogakosa ejuwene, onele owodha oziveliwa na mabasa awo. (Gano 12:24; 22:29) Azugu anoziveliwa na anamalaba okuluveleya sabwani kanawiyela kobiri, dhipano obe mudhidhi. (Éfeso 4:28) Ottiya ejo muzugu wawo onele wukuluvela. Elobo yina jawi, Yehova onoziwa wi weyo onororomeleya. Mubuwelo wawo onele okala wottugareya sabwa yoziwa wi onomwagalaliha Yehova, Mulugu onimukweliwe.—Ahebreu 13:18; Kolosi 3:22-24.

13. Enapadduwe elobo gani nigakala attu okuluveleya omabasani?

¹³ Kudduwale wi dhinkosa weyo omabasani dhinomuttittimiha Yehova. Eji ji sabwa yina ya ohagalala na mabasa. (Tito 2:9, 10) Sabwa yokala attu okuluveleya, akwehu a omabasani anele okana efunelo ya omusunza Bilibia.—Kengesa Gano 27:11; 1 Pedro 2:12.

14-16. Ninawodhe dhavi osakula deretu ganyo dhehu?

¹⁴ Bibilia kanvaha mazina a ganyo dhetene dhinafwanyelela Akristu. Mbwenye ononivaha magano  annikamihedha osakula ganyo dhofwanyelela. (Gano 2:6) Ogalabihedhaga magano a Bibilia karoma otanalela mavuzo aba.

¹⁵ Ganyo eji enele oddittukulela okosa elobo enidda Yehova? Iyo nihimala osunza dhilobo dhinimusilidha Yehova ninga ombava na ottambi. (Obudduwa 20:4; Merelo 15:29; Éfeso 4:28; Ovuhulela 21:8) Enofuneya okala txenjewa wi nisakule ganyo ehingudulana na magano a Yehova.—Kengesa 1 Joau 5:3.

 ¹⁶ Ganyo eji enokamihedha obe enomuttukulela muttu okosa dhilobo dhinimusilidha Yehova? Motagiha, kobuwela wi ohifanya mabasa a omaga kapela. Okala namamaga kahiyo elobo yabure. Mbwenye weyo onoziwa monelo wa Yehova sabwa ya marelijiau onyengetta. Ebaribari wi weyo kundowamo webedha, mbwenye omaga kapela kahiyo vina okamihedha dhilobo dhinimusilidha Yehova?—Obudduwa 21:22-24.

17. Elobo gani enanikamihedhe okosa yosakula enimuzivela Mulugu?

¹⁷ Nigalabihedhaga magano a mBibiliani, ninowodha ‘opima etanaalelo yehu,’ vina ninosunza ottiyaniha dhilobo dhabure na dhaderetu. (Ahebreu 5:14) Kavivuze: ‘Miyo ddigarumeela mabasa aba enele wobaniha nroromelo na attu ena? Mabasa anoddittukulela omwalela elabo yina ddattiyaga amudhaga? Omwalawa onaapatte dhavi amudhaga?’

18. Ekaleleni elobo yorutxa wika mabasa a Yehova vamburoni voroma?

¹⁸ Masaka abano enorutxa wika mabasa a Yehova vamburoni voroma, sabwani ninkalawo ‘masaka omariha, adhaalile dhawopiha.’ (2 Timóteo 3:1) Dila dhina enorutxa vaddiddi ofwanya ganyo vina okalavi muganyonimwa. Ebaribari wi ninofwanyela wasapela anamudhi, mbwenye omwebedha Yehova enofuneya okala vamburoni voroma. Kanittiye wi dhilobo dhomaningoni dhikale dhamakamaka mwigumini mwehu. (1 Timóteo 6:9, 10) Kito ninawodhe  dhavi ozuzumela ‘dhilobo dhamakamaka’ oku nifunaga wasapela anamudhi?—Filipi 1:10.

19. Omukuluvela Yehova onnikamihedha dhavi ohizuzumeletxa ganyo?

¹⁹ Kamukuluvele Yehova na murima wotene. (Kengesa Gano 3:5, 6.) Iyo ninoziwa wi Mulugu ononizuzumela vina onoziwa esile dhinnijombela. (Masalmo 37:25; 1 Pedro 5:7) Bibilia onloga wi: “Kamujiwe murima na muhaku. Ziveliwanina dhinnenyu, vowi Mulugu-wene okala waye óloga dhahi mbibiliani, miyo ‘kaddinauthiye weka, kaddinaunyanyale.’” (Ahebreu 13:5) Yehova kanfuna wi nizuzumeletxe wasapela amudhihu. Iyene ohoniha dila dhinjene wi ohikana ewodhelo ya okoya nlogo naye. (Mateu 6:25-32) Kintanala ganyo-ganyovi enihuna, kanittiye omusunza Bibilia, olaleya vina wona Matugumano.—Mateu 24:14; Ahebreu 10:24, 25.

20. Ninawodhe dhavi okana egumi yovevuwa?

²⁰ Kafwaseyiha mento awo. (Kengesa Mateu 6:22, 23.) Ofwaseyiha mento entapulela okana egumi yovevuwa wi nizuzumele mabasa a Yehova. Ninoziwa wi kaninfwanyela ojiwa murima na kobiri, otamela ottukuwa na dhilobo dhomaningoni nittiyaga mandano ehu na Mulugu. Elobo gani enanikamihedhe wika dhilobo dhamakamaka vamburoni voroma? Orabele ofiyari dhilobo obe wita mangawu. Akala ohikaana mangawu, katamela mikalelo dhopitxa. Nigahikale txenjewa ninele ononga mudhidhi na guru dhehu nivedaga dhilobo dhomaningoni banifiyedha orameyeliwa mudhidhi wolobela,  wosunza vina wolaleya. Kinfwanyela ottiya dhilobo dhomaningoni ozuzumiha egumi ehu, ninfuna nagalale na esile dhina iyo, ninga “yoja na yowabala.” (1 Timóteo 6:8) Ottiya ejo jaderetu woona mukalelo olihu wi niwodhe omulabela Yehova.

21. Ninfwanyelela nni otanalela eli yamakamaka mwigumini mwehu?

²¹ Wike dhilobo dhofwanyelela vamburoni voroma. Enofuneya olabihedha mudhidhi, guru na dhokaana dhehu n’eziwelo. Sabwaya? Sabwani nigahikale  txenjewa na dhilobo dhohikaanetxa ttima, nindhaga ononga mudhidhi wehu na dhilobo ninga masunzo avadhulu obe ozuzumeletxa kobiri. Yezu ohiloga wi: “Tamelaní voroma Omwene wa Mulugu.” (Mateu 6:33) Dhosakula dhehu, dhilemelelo, mabasa a siku-siku na dhogana dhehu dhinowooniha ejile eli vamburoni voroma mmirimani mwehu.

22, 23. (a) Mabasa a makamaka anfwanyela iyo ozuzumela bavi? (b) Elobo gani enanikamihedhe ozuzumela mabasa ehu?

²² Mabasa a makamaka anfwanyeela iyo ozuzumela bolaleya miselu dhapama. (Mateu 24:14; 28:19, 20) Dhahene ninga Yezu, ninfuna nivilibihedhe okosa mabasa aba. Attu ena anosakula omwalela wego onfuneya anamalaleya. Ena anosunza elogelo yina wi awodhege walaleya attu a dhilogelo dhottiyana. Katamela ologa na attu akosile esuwene. Awene anele wuwaddela wagalala onani mwigumini mwawa.—Kengesa Gano 10:22.

²³ Masaka abano, attu enjene wa iyo anovilibihedha olaba mudhidhi mwinjene obe atamela ganyo bili wi asapele amudhawa. Yehova onowona guru dhinkosa iyo vina onowagalala oziwa wi ninowazuzumela anamudhi ehu. Ninfuna nimutagihe Yehova na mwanaye Yezu nikalaga attu anziveliwa mabasa-mabasavi ana iyo. Kanidduwale wi mabasa ehu a makamaka ba omulaba Yehova vina olaleya miselu dhapama. Jijuwene enanivahe wagalala webaribari.