1. Yezu wazuzumeli eni na anamafwara aye omattiyu obule womariha velaboni ya vati?

OMATTIYU womariha Yezu ahinatti okwa. Wahazuzumela venjene anamafwara aye sabwa ya esile dhafunani ogumanana musogorho. Iyene wahakokomeza wi: “Nyuwo kamuli athu a mwilaboni.” (Joau 15:19) Mmaleliye wahalobelela wa Babe eraga: ‘Awene kahiye a elabo ninga miyo ddihíli wa elabo.’ (Joau 17:15, 16) Mazu aba aloga Yezu afuna anonihedhemo eni?

2. Mwalogeli Yezu mazu aba ‘elabo’ wafuna atapulelemo eni?

² Mazu aba alogile Yezu “mwilaboni” Iye wawaddana attu ahinimwebedha Mulugu, anlamuleliwa na Satana. (Joau 14:30; Éfeso 2:2; Tiago 4:4; 1 Joau 5:19) Kito iyo ninawodhe dhavi warabela “athu a mwilaboni”? Mwari mwa kapitulu eji, iyo ninele osunza mikalelo dhottiyana nakulaga mavuzo aba. (1) Okala attu anroromela Omwene wa Mulugu vina ohikosa epaddi ya politika; (2) owanana muya welabo; (3) okalela txenjewa na mwabalelo vina mikalelo dha ovikattikela; (4) okodda ojiwa murima na kobiri; (5) wabala epano ya ovibarelana ya Mulugu.—Koona epaddi Ononelemo Deretu 16.

3. Koddi Yezu wankosa epaddi ya politika? Katapulelamo.

³ Vali Yezu velaboni ya vati, iyene wahoona wi attu ahikaana makattamiho menjene, vina okalawo yali elobo yorutxa. Iyene wannivilibihedha wakamihedha. Koddi iyene wahivolowa mpolitikani wi awodhe wakamihedha deretu? Nné. Iyene wanziwa Omwene wa Mulugu, elobo egawodhile wakamihedha attu. Yezu wanziwa vina wi Mweneya agali iyene. Omwene wa Mulugu wali niparha na miselu dhalaleyiye. (Daniyel 7:13, 14; Luka 4:43; 17:20, 21) Yezu wanrabela okosa epaddi ya politika. Valiye vamentoni va Namattonga Pilato, iyene wahiloga wi: “Omwene waga kuli wa mwilaboni-mpuno.” (Joau 18:36) Anamafwara aye vina kakosa epaddi ya elabo. Nivuru mulebiwe mapadduwo a mweddelo wa Akristu oroma [On the Road to Civilization] ninologa wi Akristu oroma ‘kakosa epaddi ya elabo.’ Moligana na Akristu a masaka abano, awene kankosa epaddi ya elabo. Awene anororomela Omwene wa Mulugu nanda kankosa-wene epaddi ya politika.—Mateu 24:14.

4. Akristu a ebaribari ankamihedha dhavi Omwene wa Mulugu?

⁴ Paulo wahalebela Akristu ottikitteliwa wi: ‘Iyo nili anamukatti ahalile vamburoni va Kristu.’ (2 Korinto 5:20) Mazu aba anamukatti antapulela eni? Anamukatti attu ansakuliwa wi alabege elabo yotakulu emelelaga nlamulo na elabo yawa. Noona awene kankosa epaddi ya politika ya elabo ejile enlaba awene. Jijuwene enpadduwa na attikitteliwi anadhowe olamulela wirimu vamodha na Yezu. Omwene wawa bwa wirimu  noona kankosa epaddi ya politika ya elabo ya vati. (Filipi 3:20) Awene anowakamihedha attu matxikwi menjene oziwa miselu dha omwene wa Mulugu. Aweneya anowakela nikamihedho na “mabila mena” anakalege velaboni ya vati namukalakala. Nikuru ntti na mabila mena kaninkosa vina epaddi ya elabo obe ya politika. (Joau 10:16; Mateu 25:31-40) Akristu a ebaribari kankosa epaddi ya politika.—Kengesa Izaiya 2:2-4.

5. Elobo gani enakoddiha Akristu odhowa owana koddo?

⁵ Akristu ebaribari, aneddihana ninga obali obe anamudhi, awene anowinana, anedda mumodhani masiki akalaga attu a dhilemelelo vina dhilabo dhottiyana, kansakulana. (1 Korinto 1:10) Keliwa iyo nanrumela  odhowa oraba koddo, egatapulela wi ninorumela owana na abalihu, Yezu ologile wi nakwelege abalihu. (Joau 13:34, 35; 1 Joau 3:10-12) Ohenjedhedha vina wi enofuneya wakwela amwiddani ehu.—Mateu 5:44; 26:52.

6. Alabeli ororomeleya a Yehova anawona dhavi alamuleli?

⁶ Ninoziwa wi ninga Akristu kaninkosa epaddi ya politika mbwenye enofuneya wariha alamuleli. Motagiha, iyo ninowiwelela malamulo vina ninopitxa misoko. Egalivi dhawene kanindduwala vina ‘onvaha Mulugu dhili dhaye.’ (Marko 12:17; Roma 13:1-7; 1 Korinto 6:19, 20) ‘Onvaha Mulugu dhili dhaye’ kuloga omukwela, omwiwelela vina omwebedha. Egakala yofuneya, ninoperheka egumi yehu ottiya okodda omwiwelela Yehova.—Luka 4:8; 10:27; kengesa Merelo 5:29; Roma 14:8.

7, 8. ‘Muya welabo’ txini nanda onaweddiha dhavi attu?

⁷ Ohikosa epaddi ya elabo eji ya Satana entapulela okodda weddihiwa na ‘muya welabo.’ Muya welabo mukalelo wa ologa vina okosa dhilobo mowiwanana na efunelo ya Satana n’elabo yaye, muya obu onowaweeddiha attu ahinimulabela Yehova. Mbwenye Akristu anofwanyela owanana muya obu. Murumiwi Paulo ohileba wi: ‘Iyo kanivahiwe muya wa elabo yavati, nivahiwé muya ondha wa Mulugu, wi ninonelemo dhinireliye.’—1 Korinto 2:12; Éfeso 2:2, 3; koona epaddi Ononelemo Deretu 17.

⁸ Muya welabo ohakosiha attu okala amukumbela vawa, aliba ovittukulela vina avuruvuru. Onowakosiha vina wona ninga kanfuna nikamihedho na  Mulugu. Satana onfuna wi attu erege dhinfunani ahitanalaga enfuna wapadduwela. Onfuna wi attu obuwelege wi elitxi ya ttima ja ‘muttu okosa dhifunelo dhaye.’ (1 Joau 2:16; 1 Timóteo 6:9, 10) Satana onokosa guru wi apupurutxe adhari a Mulugu, onfuna wi mubuwelo na merelo ehu aliganege na aye.—Joau 8:44; Merelo 13:10; 1 Joau 3:8.

9. Muya welabo onwodha dhavi onittidda?

⁹ Moligana na muya onvuma iyo, muya welabo oli elabo yotene. Enofuneya owanana wi niwodhe orabela. (Kengesa Gano 4:23.) Muya obu onroma vang’ono-vang’ono na dhilobo dhinoneya ninga kavali makani okosa, motagiha iyo podi oroma wubuwela ninga attu a mwilaboni. (Gano 13:20; 1 Korinto 15:33) Attu ena anomageya na efunelo ya wawona attu bali yovi, osadduwela vina mavego a oranjulana.—Koona epaddi Ononelemo Deretu 18.

10. Ninawodhe dhavi owanana muya welabo?

¹⁰ Ninawodhe dhavi owanana muya welabo? Enofuneya okala amarho a Yehova vina nirumelege weddihiwa na iyene. Nilobelege wi nikumbire muya wokoddela onikamihedhe okosa dhilobo dhinimuzivela. Yehova muttu wa ewodhelo opitta dhilobo dhetene. Iyene onowodha onikamihedha owanana muya welabo.—1 Joau 4:4.

11. Attu amwilaboni anabala dhavi?

¹¹ Mukalelo mwina ononiha wi kaninkosa epaddi ya elabo bu mwabalelo wehu. Attu enjene a mwilaboni anabala guwo dhomaga maningo, dhowoneela,  dhinatonyihedha ninga areeli obe avuruvuru. Ena anabala guwo dhopigidheye vina dhohisasanyedheya. Kaninfuna orava mubuwelo welabo nigafunaga ogula guwo.

12, 13. Gano gani dha Bibilia dhinnikamihedha osakula mwabalelo wehu?

¹² Iyo nili alabeli a Yehova, noona, guwo dhehu s’okoddela, ninosasanyedha deretu, dhinozivela mmentoni mwa attu mowiwanana na mburhoya onkala iyo. Mwabalelo wehu ‘bofwanyelela’ ontonyihedha “omuthithimiha Mulugu.”—1 Timóteo 2:9, 10; Juda 21.

 ¹³ Mwabalelo wehu onomuttittimiha Yehova vina attu ena. Txibarene ninovilibihedha okosa dhilobo dhetene wi ‘nimuttittimihe Mulugu.’ (1 Korinto 10:31) Ninofwanyela otanalela mukalelo onapatta attu ena mwabalelo wehu.—1 Korinto 4:9; 2 Korinto 6:3, 4; 7:1.

14. Mavuzo gani annikamihedha osakula guwo dha odhowana mmabasani a olaleya vina omatugumanoni?

¹⁴ Enofuneya vina wang’ana deretu guwo dha odhowana mmabasani a olaleya vina omatugumanoni. Niromege ovivuza, dhinowatakalela obe dhinowakoddelela attu ena? Dhinowawumiha milomo attu ena? Obe ninloga wi vowi guwo s’aga kavo onddittonga. (Filipi 4:5; 1 Pedro 5:6) Ebaribari wi ninofuna ovikoddeliha, mbwenye ennikoddelihetxa k’utamela weddana mikalelo dh’oKristu. Jijuwene ennonana Yehova aganang’anaga. Mikalelo ninga esi dhinowoniha ‘ejile eli mmirimani mwehu, mikalelo esi dhamwari dhihikaana ttima enddimuwa vamentoni va Mulugu.’—1 Pedro 3:3, 4.

15. Yehova onkoddela eni onivaha mazina a mwabalelo wofanyelela obe wohifanyela?

¹⁵ Yehova kanivahile mazina otene a mwabalelo wofanyelela obe wohifanyela. Ottiya ejo iyene ohivaha magano ankamihedha okosa dhosakula dhofwanyelela. (Ahebreu 5:14) Yehova onfuna wi dhosakula dhehu dhitonyihedhe omukwela Yehova vina wakwela attu ena masiki osakula wa dhilobo dhing’ono dha mwigumini. (Kengesa Marko 12:30, 31.) Mwilaboni mwetemwene mwabalelo wa anamoona a Yehova bottiyana mowiwanana na mweddelo wa muruddaya obe elemelelo ya nlogo na  attuya. Ottiyana oku elobo yokoddela vaddiddi vina enowavaha ttima attuya.

16. Satana onfuna wi attu onege dhavi kobiri, nanda Yezu onisunzihile elobo gani? Elobo gani enfwanyela iyo ovivuza nanya?

¹⁶ Satana onfuna wi attu obuwelege wi ohagalala onda sabwa yokaana kobiri obe dhorela. Adhari a Mulugu anoziwa wi oko ottambi, ankuluvela malago a Yezu anloga wi: “Okalawo wa muthu kunthiddeleya na winjiva wa dhorela.” (Luka 12:15) Kobiri kadhindana ohagalala. Kobiri kadhimmaga mandano  ebaribari, kadhinvaha murenddele nne vina kadhindana egumi yamukalakala. Joziweya wi enofuneya okaana kobiri wi nikalewo, ninofuna okana wagalala mwigumini. Yezu ohinisunziha, wi nihagalale enofuneya okala amarho a Mulugu, omwebedha Mulugu ekale elobo yamakamaka mwigumini mwehu. (Mateu 5:3; 6:22) Ovivuze: ‘Koddi miyo ddinona kobiri ninga munonela attu a mwilaboni? Koddi mudhidhi wetene ddinkala dhubuwelaga obe ddilogaga dha kobiri?’—Luka 6:45; 21:34-36; 2 Joau 6.

17. Yopurelamo gani enkaana iyo sabwa ya okodda ojeya murima na kobiri?

¹⁷ Nigazuzumela mabasa a Yehova nittiyaga ojiwa murima na kobiri, ninele okaana ohagalala. Nihagalale na esile dhina iyo, ninofwanya murenddele wa mmirimani. (Mateu 6:31, 32; Roma 15:13) Ninele ovugulela otanaalela dhilobo dhomaningoni. (Kengesa 1 Timóteo 6:9, 10.) Ninoziwa wi ottaba onda mwa wakamihedha attu ena. (Merelo 20:35) Ninokaana mudhidhi mwinjene wokala na attu anakwelihu. Vangona iyo ninelege ottidda nikove.—Kohelét 5:12.

18. Elobo gani enfuna okosa Satana?

¹⁸ Satana onfuna agwadde mandano ehu na Yehova, noona enofuneya obarela mandano ehu na Yehova. Enofuneya vina ‘owana na muya dhabure,’ Satana na adomonyo aye. (Éfeso 6:12) Iyene kanfuna wi nihagalale vina wi nifwanye egumi yohimala. (1 Pedro 5:8) Ebaribari wi amwiddani aba ahikaana ewodhelo mbwenye na nikamihedho na Yehova kananiwodhe!

19. Mowinana na nivuru na Éfeso 6:14-18, ‘dhipano dhovibarelana’ dhinfwanyela ottukula Mukristu sivi?

 ¹⁹ Nsaka nawale anyakoddo annabala txapewa, ebarelo na dhilobo dhina wi avibarelena mukoddoni. Na mukalelo woligana enofuneya iyo vina wabala ‘ebarelo’ enivahile Mulugu wi nivibarelena. (Éfeso 6:13) Ebarelo eji enfanyeya munivuruni na Éfeso 6:14-18: ‘Kavenyani, mulibihe ebaribari. Ebaribariyá eukaleleni papaseko muyununi. Mweddegena oligana murima, olibiha murima eukaleleni yabalo ya mujila enuvunani. Mugalamuwele olaleya muttaka wa murenddele, olaleya muttaka oukaleleni sapatto dhotamagana mukoddoni. Ttabwattabwa mukale ororomela. Nroromelelo nukaleleni ebarelo enttawenenyu mattere a motto anusugánina Satana. Muroromelege ovulumutxiwa, ovulumutxiwa oukaleleni txapewa wa mujila onvunenyuna musorho. Mweddegena Nzu na Mulugu nili supadda na muya wokoddela. Lobelaganivi mweddihiwaga na muya wokoddela mulobení Mulugu mwetemwene munkalenyu na malobelo ottiyana-ttiyana.’

20. Elobo gani enakose iyo wi ‘epano yehu ya ovibarelana’ enivune?

²⁰ Akala munyakoddo onodduwala wabala epano modha yovibarelena, epaddi modha ya maningo aye kinakane nibarelo, ngamala mwiddani waye onasonkele venevale vahili nibarelo. Wila epano yehu yamukoddoni enibarele, ninadduwalege wabalihedha maningo etene vina needdihege deretu. Koddo enwana iyo na Satana vamodha na adomonyo aye, enodhowavi mpaka otolotxiwa wa obure wotene mwilaboni ya vati. (Ovuhulela 12:17; 20:1-3) Noona akala  ninowana na yubuwelo yabure obe elobo yina, kaniyelele mundduni!—1 Korinto 9:27.

21. Ninawodhe dhavi ompemberha Ddiabo?

²¹ Iyo nooka kaninawodhe ompemberha Ddiabo. Mbwenye na nikamihedho na Yehova ninele owodha! Enofuneya omulobelela Yehova, omusunza Bibilia vina okalaga vamodha na abalihu. (Ahebreu 10:24, 25) Okosa esene enele onikamihedha okala okuluveleya na Yehova vina obarela nroromelo nehu.

22, 23. (a) Elobo gani enfwanyela iyo okosa wi n’amelele nroromelo nehu? (b) Elobo gani enasunze iyo kapitulu endawo?

²² Enofuneya okala womala-nawale wi nibarele nroromelo nehu. (Joau 15:19) Mwa mpaddi dhina, Anamoona a Yehova ahittiyana vaddiddi na attu a mwilaboni. Noona, enofuneya oroma ovivuza wamwinya: ‘Miyo ddinonelamo yimelelo ya Anamoona a Yehova? Ddikana ebaribari ya dhologa dha Bibilia na dha mudhari wororomeleya wi sebaribari? Ddinovittittimiha sabwa ya okala munamoona wa Yehova? (Masalmo 34:3; Mateu 10:32, 33) Ddinowodha watapulelamo attu ena esile dhinrumeela miyo?’—Mateu 24:45; Joau 17:17; kengesa 1 Pedro 3:15.

²³ Dila dhina kinrutxa ozinddiyela esile dhinfwanyela iyo okosa wi nirabele okosa epaddi ya elabo. Mbwenye dila dhina enorutxa ozinddiyelawa. Satana onotamela oninyengetta. Elobo modha enlabihedhiye mavego. Kapitulu endawo ninele osunza mukalelo wa okosa mandano aderetu.