Kapitulu 1
Neddegena Okwela wa Mulugu
“Omukwela Mulugu, kuloga ovirihamo malamulo aye. Malamuloyá kanlémela.”—1 JOAU 5:3.
1, 2. Weyo onimukwelela eni Mulugu?
WEYO onomukwela Mulugu? Txino okwela wawo ohunuwa vaddiddi ofiyedha omperhekela egumi yawo. Movanene enkala ninga iyene ddi Mukwawo wamakamaka. Kaziwa wi weyo ohinaroma omukwela, muttaji oromile owukwela ddi iyene. Bibilia onloga wi: “Iyo ninomukwela Mulugu, vowi ddi iyene oromile onikwela.”—1 Joau 4:19.
2 Karoma wubuwela dhilobo dhetene dhinivahile Yehova dhinlagiha wi ononikwela. Iyene ohinivaha elabo yavati yokoddela na dhilobo dhilimo dhinnivaha ohagalala. (Mateu 5:43-48; Ovuhulela 4:11) Ottiya ejo iyene onfuna wi notene nikale akwaye, ohinivaha gari ya osunza mikalelo dhaye. Nigamwengesaga Bibilia, nininvuruwana Yehova. Nigalobela ononivuruwana. (Masalmo 65:3) Iyene ononeddiha modhela muya waye wokoddela. (Luka 11:13) Ohifiyedha omuruma Mwanaye wokuluveleya wi adhe velaboni ya vati apiwe wi anifurule dhottega dhehu.—Kengesa Joau 3:16; Roma 5:8.
3. Elobo gani enakose iyo wi nidhowenavi mandano ehu na Yehova?
3 Karoma omutanaalela mukwawo oddule onkalavi na weyo mudhidhi wohagalala vina mudhidhi wokubanya. Enofuneya okosa guru wi ottiddelevi mandano enyu. Eji enoligana na mandano ehu na Yehova, iyene muttu waderetu onfwanyelela okosana mandano. Wila wandana wehu odhowegevi, enofuneya wiwelela ennadela Bibilia. “Kalaniví mukwelani mwa Mulugu.” (Juda 21) Ninakose elobo gani? Bibilia ononaddela wi: “Omukwela Mulugu, kuloga ovirihamo malamulo aye. Malamuloyá kanlémela.”—1 Joau 5:3.
“OKWELA WA MULUGU” ONTAPULELA ENI
4, 5. (a) “Okwela wa Mulugu” ontapulela eni? (b) Kalogamo mukalelo oromile weyo omukwela Mulugu.
4 Bibilia agalogaga “okwela wa Mulugu” onaddana eni? Kahiyo okwela onnivaha Mulugu, mbwenye okwela wehu na iyene. Onowubuwela mudhidhi oromile weyo omukwela Mulugu?
Akala weyo ohiviperheka wa Yehova vina ohibatiziwa, enlagiha wi onomukwela Yehova nanda onofuna okosa dhinimuzivela iyene okala-nokala-wene
5 Karoma otanalela mudhidhi obule oziwile weyo wi Yehova onfuna wi okale mparaizu. Weyo ohisunza ejile ekosile Mulugu wi adhena paraizu, ohisunza vina sabwa ya mukutto okosile Yehova wa onirumela mwanaye velaboni ya vati. (Mateu 20:28; Joau 8:29; Roma 5:12, 18) Mohaganyedha, weyo ohisunza wi Yehova onowukwela, ejo ehiddiginya murima wawo, ehuttukulela oroma omukwela iyene vina.—Kengesa 1 Joau 4:9, 10.
6. Omukwela muttu eniwanana na omukosela elobo gani? Elobo gani ekosile weyo enoniha wi onomukwela Mulugu?
6 Kudduwale wi omukwela Mulugu ttarho yoroma. Motagiha, akala weyo onomukwela muttu, okwela oku onopitta ologa “Miyo ddinowukwela.” Akala iyo ninomukwela muttu, ninokosa guru wila nimuhagalalihe. Moligana, omukwela wawo Mulugu onowuttukulela weddagana mikalelo dhinimuzivela. Munuwele okwela wawo, ohifiyedha omperhekela egumi yawo vina ohibatiziwa. Mwavenevo, weyo ohigana omulabela mudhidhi wotene. (Kengesa Roma 14:7, 8.) Onawodhe dhavi wakwaniha yogana yawo?
‘NINOWIWELELA MALAMULO AYE’
7. Akala ninomukwela Yehova, elobo gani enkosa iyo? Malamulo mena a Yehova bavi?
7 Sabwa yawi ninomukwela Yehova, ‘ninowiwelela malamulo aye.’ Bibilia ononisunziha mikalelo dhinimuzivela Yehova wi neddihegena egumi yehu. Motagiha, Yehova ononaddela dhilobo dhabure ninga olezela, wiya, odhivala, oraruwa vina webedha elobo-elobovi ottiya iyene.—1 Korinto 5:11; 6:18; 10:14; Éfeso 4:28; Kolosi 3:9.
8, 9. Akala Bibilia kanloga wi elobo eji jabure ninakose dhavi? Kavaha yotagiha.
8 Mbwenye wila nimuzivelihe Yehova enofuneya okosa dhilobo dhina ottiya wiwelelavi malamulo aye. Iyene kaninvaha mazina antonya malamulo etene aneeddiha egumi yehu. Dila dhina Bibilia kannivaha malamulo owooneya anaddelaga elobo gani enfanyela iyo okosa. Egapadduwa dhawene ninawodhe dhavi okosa dhosakula dhapama? (Éfesio 5:17) Mbibiliani muhikala magano a ebaribari abuwene annikamihedha oziwa monelo wa Yehova. Nigamwengesaga Bibilia ninofiyedha omuziwa deretu Yehova ninga Muttu mukwehu. Iyo nigasunza mubuwelo wa Yehova, ninofiyedha okwela esile dhinziveliwa iyene vina widda esile dhinidda iyene.—Kengesa Masalmo 97:10; Gano 6:16-19; koona epaddi Ononelemo Deretu 1.
9 Motagiha, Onawodhe dhavi osakula dhinfuna weyo woona mu TV obe Mwinternetini? Yehova kannaddela wi wone eji, eji kuwoone. Mbwenye ononivaha magano annikamihedha okosa dhosakula dhaderetu. Motagiha, mavego menjene a nsaka novanene ahinjiveliwa merelo a owali vina mararuwo. Bibilia ononaddela wi Yehova “onoapwaza anziveliwa owali” vina “Mulugu onowakona anira dhoraruwa.” (Masalmo 11:5; Ahebreu 13:4) Magano aba annikamihedha dhavi na dhosakula dhehu? Akala Yehova ononaddela wi onowidda elobo-txilobo obe onologa wi kinfwanyelela, enofuneya orabela.
10, 11. Ninfwanyelela eni omwiwelela Yehova?
10 Ekalele eni yofuneya omwiwelelaga Yehova? Kahiyo sabwa ya wova otabutxiwa na dhosakula dhehu dhohifwanyelela. (Galásia 6:7) Ninomwiwelela sabwa yawi ninomukwela. Moligana na mwana ontamela omwagalaliha babe, iyo vina ninfuna nimwagalalihe Babihu wodhulu. Kayiwo elobo yina yaderetu enligana na oziwa wi Yehova onoziveliwa na iyo!—Masalmo 5:13; Gano 12:2; koona epaddi Ononelemo Deretu 2.
11 Kanintamela omwiwelela Yehova mwa dhilobo dhohirutxa obe nigahikaane vottawela. Kanintamela osakula malamulo gani anfwanyela iyo wiwelela mena nikooddaga. (Olibiha 12:32) Ottiya ejo, iyo ninomwiwelela Yehova mwa dhilobo dhotene, moligana na munasalmo olebile wi: “Ddiziveliwa na malamulo enyu, ankwela miyo vaddiddi.” (Masalmo 119:47; Roma 6:17) Iyo ninfuna nikale ninga Nowé. Otonyihedhe omukwela Yehova modhela okosa dhilobo dhotene dharuma malamulo aye. Bibilia onloga wi Nowé, “ovirihamo dhetedhene dhimurumile Mulugu.” (Wita 6:22) Kugaziveliwe wi Yehova aloge yakakene na weyo vina?
12. Ninawodhe dhavi omwagalaliha Yehova?
12 Yehova oniwamo dhavi akala iyo ninomwiwelela? Bibilia onloga wi ejo ‘enohagalaliha murima’ waye. (Gano 11:20; 27:11) Karoma otanalela makani aba! Iyo ninomwagalaliha muttanddi wa elabo yotene nigamwiwelela. Mbwenye iyene kannimagelela wi nimwiwelele. Iyene ohinivaha ofuru wosakula. Eji entapulela wi nikana ofuru wosakula dhilobo dhaderetu obe dhabure. Yehova onfuna wi nisakule okosa dhilobo dhaderetu sabwa ya omukwela, okosa ejuwene enele onikamihedha weddiha egumi yehu mofanyelela.—Olibiha 30:15, 16, 19, 20; koona epaddi Ononelemo Deretu 3.
“MALAMULOYÁ KANLÉMELA”
13, 14. Ninlogela eni wi malamulo a Mulugu kanlemela? Kavaha yotagiha.
13 Kito akala ninoona ninga malamulo a Yehova borutxa vaddiddi obe kannivaha ofuru? Bibilia onloga wi: “Malamuloyá kanlémela.” (1 Joau 5:3) Koddi eji entapulela eni? Mazu aba atapuleliwe ‘olemela’ anologiwa mwari mwa malebo mena ninga nikokomezo norutxa vaddiddi ofwarihedhawa obe anaddiwana attu anawang’anela obe antamela waputtula akwawa. (Mateu 23:4; Merelo 20:29, 30) Mbwenye malamulo a Yehova kahiyo ‘olemela’ obe kanrutxa wiwelelawa. Yehova kannikumbira okosa elobo enziwiye wi kaninwodha.
14 Kobuwela dhahi, mukwawo onfuna amwale nanda ohukumbirha wi omukamihedhe. Iyene ohimala opopottela dhilobo dhetene mukashani. Kasha dhina s’oluluva mbwenye dhina s’olemela s’opwattelihana. Onubuwela wi mukwawoya agahuttiya opwattela weka kasha esile dholemela? Ejo kimpadduwa. Iyene kanfuna wi weyo wundeye na dhilobo dhaye. Moligana na mukwawo oddo, Yehova kanawukumbirhe wira elobo yorutxa ehinwodhiwe okosa. (Olibiha 30:11-14) Yehova onoziwa apale vangomela iyo. “Iyene onoziwa yubiwehuna, kandduwala wi nili mathaka.”—Masalmo 103:14.
15. Ninziwa dhavi wi malamulo a Yehova anokamihedha oderetu wehu?
15 Mizé wahawaddela ana Izrayel wi malamulo a Yehova ankamihedha oderetu wawa, awene kowiwelela ‘agankalawovi.’ (Olibiha 5:28-33; 6:24) Eji enoligana vina na masaka abano. Dhotene dhinloga malamulo a Yehova dhinokamihedha okalawo wa egumi yehu. (Kengesa Izaiya 48:17.) Baba wehu wa wirimu, Yehova, onoziwa esile dhindana oderetu wehu. (Roma 11:33) Bibilia onologa vina wi “Mulugu ddi okwela.” (1 Joau 4:8) Ejo entapulela wi dhotene dhinloga vina dhinkosa Yehova onkosa n’okwela.
16. Niziwaga wi jorutxa wiwelela malamulo a Yehova, elobo gani enanikamihedhe okala attu omwiwelela?
16 Vowi ninkala mwilaboni enlamuleliwa na Ddiabo, elobo yorutxa wiwelela malamulo a Yehova. Iyene onowattukulela attu enjene wira dhilobo dhotakala. (1 Joau 5:19) Ottiya ejo, iyo nili attu ohiligana, noona ninofwanyela owanana dhubuwelo dhinnittukulela okodda omwiwelela Mulugu. (Roma 7:21-25) Mbwenye sabwa ya omukwela, Yehova ononivaha guru ya okosa dhilobo dholigana. Yehova onowona guru dhinkosa iyo, ejo enomuttukulela oniva nikamihedho na muya waye wokoddela. (1 Samuwel 15:22, 23; Merelo 5:32) Muya wokoddela ononikamihedha ofwanya mikalelo dha wiwelela malamulo aye mohirutxa.—Galásia 5:22, 23.
17, 18. (a) Elobo gani enasunze iyo na nivuru ntti? (b) Elobo gani enasunze iyo kapitulu endawo?
17 Mwari mwa nivuru ntti, ninele osunza mikalelo dha weddiha egumi ninga munfunela Yehova. Ninele osunza mulabihedho wa gano dha Bibilia mwigumini mwehu, mowiwanana na esile dhinona Yehova ninga dhabure obe dhaderetu. Txipo kanidduwale wi Yehova kannikokela omwiwelela, muttu-muttu ddinsakula mwinya. Mbwenyi nigasakula omwiwelela, ninokaana egumi yohagalala ovanene vina musogorho. Ttimayá jawi ninotonyihedha omukwela Mulugu.—Koona epaddi Ononelemo Deretu 4.
18 Wi niwodhege ozinddiyela dhilobo dhaderetu na dhabure, Yehova ohinivaha mubuwelo. Nigashagiha mubuwelo wehu onele onikamihedha wiwelela ‘malamulo a Mulugu.’ Mubuwelo txini nanda niwodhe dhavi oshagiha? Ninele wakula kapitulu enfwarela.
