1, 2. Elobo gani enfanyela iyo okosa wi nikalevi mukwelani mwa Mulugu?

IYO NOTENE ninofuna okaana egumi yoliba. Noona ninotamela dhoja dhinlibiha, ninonddamurha maningo vina ninoweedda n’oyesa. Masiki egakala elobo yorutxa, ninovilibihedha ovirihamo vowi ninononelamo yopurelamoya. Ovano ndoweni noone mpaddi mwina onfwanyela iyo olibiha maningo.

² Vowi nimala omuziwa Yehova, enofuneya odhowavi banigalibiha mandano ehu na iyene. Mulogele Juda wi “kalaniví mukwelani mwa Mulugu,” iyene ohilogamo mukaleloya wa okosa ejuwene: “Libihaní otibela elinyu muroromelani mwenyu.” (Juda 20, 21) Ninawodhe dhavi olibiha nroromelo nehu?

3-5. (a) Satana onfuna wi weyo wubuwelege dhavi modhela omwiwelela Yehova? (b) Weyo onoonamo dhavi malamulo vina magano a Yehova?

³ Okaane ebaribari wi dhokosa dha Yehova sowakwana. Satana onfuna wi weyo wubuwelege wi enorutxa vaddiddi wiwelela malamulo a Mulugu vina onele wagalala ogasakula wamwinya eli yabure na yaderetu. Oromana mmunddani mwa Edeni, Satana onowattukulela  attu orumeela ottambi obu. (Wita 3:1-6) Masaka abano iyene onolabihedha murega obu.

⁴ Dhologa dha Satana s’ebaribari? Omulabelaga Mulugu ononiyeleliha elobo? Nne. Kavubuwele bugeedda mmunddani mokoddela, venevo weyo wona ngome yolapa enfuga osogorho wa dila enviriwe. Txino onovivuza: ‘Ngome eji ekalele eni veneva?’ Ngamala omwiwa poddogoma ongóroma mpaddi mwina. Ovano ononege dhavi ngome ejile? Ebaribari wi kohikalavo nibarelo, weyo ogahitakuniwa na poddogoma. Magano a Yehova ali ninga ngome eji, Ddiabo onoladdanihiwa na poddogoma. Bibilia onloga wi: “Kalaní txenjewa, kamugone! Mwiddani wenyu satana, onourugunuwani ninga poddogoma ongóroma amutamelaga womuja.”—1 Pedro 5:8.

⁵ Yehova onfuna wi nikaane egumi yozivela. Iyene kanfuna wi nirumeele onyengettiwa na Satana. Noona onivaha magano annibarela vina annikamihedha ofwanya wagalala. (Éfeso 6:11) Murumiwi Tiago ohileba wi: “Mwina onofwaseyela ovuruwana nlamulo nawakwana na Mulugu . . . oddu-wene ddinajevo murenddele mwa dhetene dhinireye.”—Tiago 1:25.

6. Elobo gani ennivaha nikuluvelo nawi Yehova onofuna oderetu wehu?

⁶ Nigamwiwelelaga Yehova, ninokaana egumi yozivela vina mandano ehu na iyene anoliba. Motagiha, Yehova ononiwoba wi nilogege na iyene modhela nlobelo. (Mateu 6:5-8; 1 Tesalónika 5:17) Ninohagalala nigewelela malago aye a otugumana wi nimwebedhe iyene vina nilibihane nroromelo nehu. Nigavilibihedha odhowa mmabasani a olaleya vina weddiha  masunziho a Bibilia ninowagalala. (Mateu 28:19, 20; Galásia 6:2; Ahebreu 10:24, 25) Nigobuwela mukalelo onlibiheya nroromelo nehu na dhilobo esi, ninokana ebaribari wila magano a Yehova bapama.

7, 8. Nigagurumela na dhilobo dha musogorho ninfwanyela wubuwela elobo gani?

⁷ Txino ninele ottiddiwa wova, nigobuwela dhilobo dhinanipadduwele musogorho dhinehe nroromelo nehu. Eji egawupadduwela, katanalela mazu alogile Yehova: ‘Miyo ddili Nabuya Mulugu wawo, onuvaha magano ankaliha, onuvelela mudila dhinfwanyela weyo ovira, ogavirihamo dhinurumemi! Gari yawo egali ninga mwinje, osanzaya wawo ogantepuwa ninga manebe a mbara.’—Izaiya 48:17, 18.

⁸ Nigamwiwelela Yehova osanzaya wehu onele okala  ninga mwinje ohinuma, oligana wehu onele okala ninga manebe antepuwa mbara. Masiki epadduwe elobo-elobovi, ninele owodha okala attu ororomeleya. Kobuwela nlibelo ntti na Bibilia: “Kamuroromélena Nabuya makathamiho awo, iyene onoutxedha; txipo kanimuthiya ogwa muthu onimukuluvela.”—Masalmo 55:23.

9, 10. Okala Mukristu wowarala entapulela eni?

⁹ Nigalibiha mandano ehu na Yehova, ninele okala ‘Akristu owarala.’ (Ahebreu 6:1) Okala Mukristu wowarala entapulela eni?

¹⁰ Kahiyo wunuwa onnikosiha okala Akristu owarala. Wi niwarale enofuneya wi Yehova akale mukwehu wa vamurimani vehu, niziwege vina wona dhilobo na mukalelo onoona iyene. (Joau 4:23) Murumiwi Paulo ohileba wi: “Abale aneddihiwa na makalelo ovirigana a mwili, anotamela dhinkola mwili; abale aneddihiwa na muya, anotamela dhinfuna muyayá.” (Roma 8:5) Muttu wowarala kanzuzumiha egumi yaye na dhilobo dhomaningoni. Ottiya ejo, iyene onzuzumela omulabela Yehova nanda onokosa dhosakula dhofwanyelela. (Gano 27:11; kengesa Tiago 1:2, 3.) Muttu wowarala onozinddiyela dhilobo dhaderetu nanda onokosa esuwene akooddaga okukuseliwa okosa dhilobo dhabure.

11, 12. (a) Murumiwi Paulo ologile eni sabwa ya ewodhelo y’abale anziwa opima? (b) Mukristu wowarala onladdanihedhiwa eni na namattamaga?

¹¹ Enofuneya okosa guru wi okale Mukristu wowarala. Paulo ohileba: “Yoja yovadda j’anddimuwa,  jabale anziwa opima, alemélele othiyaniha dhapama na dhabure.” (Ahebreu 5:14) Mazu aba “anziwa opima” enonubutxedha mashagiho ankosa anamattamaga.

¹² Nigamona namattamaga agali mmavurhanoni, ninoziwa wi voroma iyene ohikosa guru ya ovishagiha wi awodhe ottamaga. Iyene kabaaliwe ninga namattamaga. Mwana agabaliwaga-wene kanwodha olabihedha meddo na mada aye. Movira wa mudhidhi, iyene onosunzela ottidda dhilobo vina wedda. Vang’ono-vang’ono onoshagihiwa bakala namattamaga. Na mukalelo woligana enofuneya mudhidhi vina mashagiho wi nikale Akristu owarala.

13. Elobo gani enanikamihedhe ozinddiyela moonelo wa Yehova?

¹³ Munivuruni mpu, nihonamo mukalelo onawodhihu ozinddiyela mubuwelo wa Yehova. Nihisunza ovaha ttima vina okwela magano na malamulo aye. Nigafunaga okosa yosakula obe yogana, nivivuze: ‘Magano gani a mBibiliani aniwanana n’ejiya? Nanda ddinawodhe dhavi ovirihamo maganoya? Txini egaziveliwe Yehova wi miyo ddikose?’—Kengesa Gano 3:5, 6; Tiago 1:5.

14. Ninfwanyelela eni olibiha nroromelo nehu?

¹⁴ Kanittiye olibiha omuroromela wehu Yehova. Moligana na dhoja dhaderetu dhinnikamihedha okaana egumi yoliba, osunza miselu dha Yehova dhinolibiha nroromelo nehu. Muromeli iyo omusunza Bibilia, nihoona dhilobo dhohirutxa dha ebaribari mwaha wa Yehova. Mbwenye ovano enofuneya okana ebaribari ya dhilobo dhinddimuwa obe dhoririmela. Jijene elogile murumiwi Paulo: ‘Yoja yovadda  j’abale anziwa opima.’ Nigalabihedha esile dhisunzile iyo, ninokaana eziwelo. Bibilia onloga wi: ‘Eziwelo elobo yamakamaka.’—Gano 4:5-7; 1 Pedro 2:2.

15. Ekalele eni elobo yamakamaka omukwela Yehova vina abali?

¹⁵ Akalawo attu aneedda na egumi yoliba, mbwenye wila akalevi olibene anofwanyela ovyang’anela. Na mukalelo wakakene, muttu wowarala onoziwa wi enofuneya olibiha mandano aye na Yehova. Murumiwi Paulo ohiloga: “Muvipime mwanya, mone akala munowedda muroromelani.” (2 Korinto 13:5) Elobo yamakamaka okaana nroromelo noliba. Mbwenye enofuneya elobo enpitta nroromelo, omukwela Mulugu vina abali elobo yamakamaka. Murumiwi Paulo ohiloga wi: ‘Miyo kokana eziwelo . . . vina kokaana nroromelo ninwodha omwaliha mwango, ddirimeliwaga okwela kaddili elobwene.’—1 Korinto 13:1-3.

16. Satana onfuna wi nubuwelege dhavi?

¹⁶ Satana onfuna wi nubuwelege wila kinwodheya omwagalaliha Yehova mowakwana. Iyene onfuna anobanihe nubuwelaga wi makattamiho ehu kana omagomo. Iyene kanfuna wi nakuluvelege abalihu kanfuna vina wi nagalale. (Éfeso 2:2) Satana onoziwa wi dhubuwelo dhowobana dhinonikumula vina dhinowodha ogwadda mandano ehu na Yehova. Mbwenye Yehova ohinivaha njedhelo nttuwene ninnikamihedha owanana dhubuwelo dhohifwanyelela.

17. Njedhelo ekalele eni elobo yamakamaka?

¹⁷ Karta ya 1 Tesalónika 5:8, enloga wi njedhelo nili  ninga txapewa onvunela musorho wa munyakoddo. Bibilia onloga wi ‘txapewa njedhelo na ovuniwa.’ Okaana njedhelo na mapikirhelo a Yehova muyubuweloni mwehu, enonikamihedha owanana dhubuwelo dhawobaniha.

18, 19. Njedhelo niwodhile dhavi omulibiha Yezu?

¹⁸ Njedhelo naana Yezu nannivaha guru. Omattiyu obule ahinatti okwa, iyene wahigumanana makattamiho menjene. Mukwaye wahimuguliha. Mwina wamukuluveliye wahimukoodda alogaga wi kaddinimuziwa. Oku ena ahimuttawa bamuttiya yeka. Nlogo naye nahimusadduwela nikumbiraga wi asottottiwe vina apiwe. Elobo gani emukamihedhe Yezu? ‘Nlibele omwañgana Yezu; ddi iyene witile dila ya nroromelo, ddi iyene onakwaniha muroromelanimwá. Iyene orumela okwa vapingirizini katanalile manyazo a  mukweloyá, vowi wanziwa wi masoso aba agamala, onofwanya ottaba onddimuwa. Ddabuno oli vamodha na Mulugu.’—Ahebreu 12:2.

¹⁹ Yezu wanziwa wi kokalavi wororomeleya agahimuttittimiha Babe, agalagiha vina wi Satana muttambi. Ejo yahimwagalaliha. Iyene vina wanziwa wi momaguva agahiyelela wirimu wali Babe. Njedhelo nahimukamihedha Yezu owodha ovilela. Moligana na Iyene, enofuneya ozuzumela njedhelo nehu. Eji enele onikamihedha ovilela masiki epadduwe elobo-elobovi.

20. Txini enanikamihedhe owanana mubuwelo wawobana?

²⁰ Yehova onowona nroromelo vina njedhelo nawo. (Izaiya 30:18; kengesa Malakiya 3:10.) Iyene ohilibela ouvaha “enthopa murima wawo.” (Masalmo 37:4) Kazuzumela nroromelo nawo. Satana  onfuna wi nroromelo nawo nirimele, ofiyedhaga wubuwela wi malibelo a Yehova kanakwanihedheye. Owanena dhubuwelo dhowobana! Ogafiyedha woona wi nroromelo nawo ninodeba, kakumbirha nikamihedho na Yehova. Kudduwale mazu ali va Filipi 4:6, 7: “Kamugulugudheye na elo-wene. Makathamiho enyu, mumperekele Nabuya na malobelo, mmunlelaga, mmutamalelaga. Dhahene murenddele wa Mulugu, onpitha thontho ya muthu, onere okoya mirima na mobuwelo wenyu, vowi muli mumodhani na Yezu Kristu.”

21, 22. (a) Malibelo a Yehova anapadduwe musogorho bavi? (b) Elobo gani eganile weyo okosa?

²¹ Otamelege mudhidhi wa otanalela mareliho ananivahe Yehova musogorho. Mohigonela attu etene anfuna okala velaboni ya vati anele omwebedha Yehova. (Ovuhulela 7:9, 14) Egumi mwilaboni eswa enele oziva vaddiddi sabwani Satana vamodha na adomonyo kanakalewo, obure wotene kunakalewo-vina, maredda na okwa anele ogoma! Masiku otene weyo onelege ovenya na guru. Attu otene anelege olaba mumodhani wi osasanyedhe elabo wi ekale Paraizu. Munele okala oja wawakwana vina numba dhaderetu. Kamunakale aliba owali, attu otene anele okaana oderetu. Movira wa mudhidhi attu otene a nlogo na vati anele okana “nthithimiho ninakele ana Mulugu.”—Roma 8:21.

²² Yehova onfuna wi weyo okale marho waye. Noona kavilibihedhe omwiwelela wila okaane omarho wofiyedheya na iyene. Notene ninele weddagana okwela wa Mulugu!—Juda 21.