1, 2. Ninfwanyelela eni ofwaseyela mavego ehu?

KAROMA wubuwela buttukulile musapo wawitwa wi oje, nanda buzinddiyela wi epaddi modha ehivudda vang’onovi. Ogakosile dhavi? Ogahija dhawene? Ogahirayila yotene? Obe ogahigwaddawo okule ovuddile?

² Mavego ankala ninga mulima wawitwa. Dhikalawo dhilobo dhinjene dhovegana, dhaderetu na dhabure. Jibo, mavidiyu, dhovuruwana na mafoto anekiwa mu internetini vina mu TV, dhowinjivadha  miselu dhamararuwo vina otimbwini. Ogafunaga osakula mavego awo, “onologa wi osakulawa kwaga, ddinsakula elobo-elobovi enfuna miyo”? Onlogaga wi mavego etene kanfwanyelela? Obe onsakula mavego aderetu oku orabela abale ali abure?

3. Ninfwanyelela eni osakula deretu mavego ehu?

³ Iyo notene ninofuna ovega, mbwenye enofuneya osakula deretu mavegoya. Vowi kaninfuna wi mavegoya azuzumihe mebedhelo na mandano ehu na Yehova.

4. Gano dha nivuru na 1 Korinto 10:31 dhinnikamihedha dhavi osakula mavego ehu?

⁴ Nigamperhekela egumi yehu Yehova, kuloga nimala osakula omulabela iyene. (Kengesa Kohelét 5:4.) Iyo nihilibela okosa ‘dhilobo dhotene dhinimuttittimiha Yehova.’ (1 Korinto 10:31) Iyo nili adhari a Mulugu mudhidhi wotene, mudhidhi wa ovega, wa ovuma, wa mabasa, wa olaleya vina wa matugumano.

5. Elobo gani enfuna iyo onvaha Yehova?

⁵ Omulabela Yehova elobo yamakamaka mwigumini mwehu. Noona, murumiwi Paulo ohileba wi: ‘Nimperhekele Yehova egumi yehu ekale mukutto wamento.’ (Roma 12:1) Yezu ohiloga vina wi: “Omukwele Nabuya Mulugu wawo na murima wawo wotene, na thontho yawo yotene, na guru dhawo dhotene.” (Marko 12:30) Mudhidhi wotene nitamelege onvaha Yehova dhilobo dha nttittimiho.  Nsaka na akadda Izrayel, nlogo nanimperhekela Yehova mukutto wa dhinama, mbwenye wi Yehova arumeele mikutto esile, yanfuneya wi dhinamadha dhikaane egumi yowakwana. Egakala yoragala Yehova karumela mukuttoya. (Onamakutha 22:18-20) Na mukalelo woligana, akala mebedhelo ehu kakaaneli Yehova kanrumeela. Ejo empadduwa dhavi?

6, 7. Nigasakula mavego onyakuwa, Yehova ononege dhavi mebedhelo ehu?

⁶ Yehova ologile wi: ‘Koddelani murima vowi miyo ddili wokoddela.’ (1 Pedro 1:14-16; 2 Pedro 3:11) Wi Yehova arumeele webedha wehu, enofuneya mebedheloyá okala okoddela. (Olibiha 15:21) Iyo ninoziwa wi nigakosaga dhilobo dhinidda Yehova ninga mararuwo na otimbwini ninopigidha mebedhelo ehu. (Roma 6:12-14; 8:13) Akala mavego ehu anokosa epaddi ya dhilobo esi dhilogiwe, Yehova kanziveliwa. Akala Yehova kanziveliwa kuloga mwebedhelo wehu kahiye wokoddela, noona, mandano ehu na Iyene anogwaddeya.

⁷ Ninfwanyelela eni osakula mavego ehu na eziwelo? Magano gani a Bibilia ananikamihedhe ozinddiyela akala mavego ehu baderetu obe babure?

8, 9. Mavego gani anfwanyeela iyo orabela nanda sabwaya jani?

⁸ Masaka abano ahikalawo mavego menjene. Mavego mena baderetu anafwanyelela Akristu, mbwenye awinjivaya kanfwanyela. Ovano ndoweni nirome otanaalela mavego anfwanyeela iyo orabela.

 ⁹ Motagiha, masaka abano jibo na mavidiyu, dhovuruwana na mafoto dhinekiwa mu internetini vina mu TV, dhowinjivadha miselu dhamararuwo vina dhotimbwini. Dhilobo-dhene esi dhinolagihiwa attu ninga dhihina makani. Mbwenye Akristu kanrumela mavego antaganyiheya na dhilobo dhinidda Yehova. (Merelo 15:28, 29; 1 Korinto 6:9, 10) Nigarabelaga mavego ninga abene entonyihedha wi ninowidda esile dhinidda Yehova.—Masalmo 34:15; Roma 12:9.

10. Elobo gani enapadduwe nigavegaga na dhilobo dhabure?

¹⁰ Attu ena anona ninga kayivo elobo yabure ovegana dhilobo dhinoniha mararuwo vina otimbwini. Awene anloga wi makaniya bani? Miyo kaddinkosa dhilobo esi vina kaddinakose. Akala iyo vina ninubuwela dhahene, ninovinyengetta. Bibilia onloga wi: “Kaiwo yotakala enpitha murima wawota! Murima obo kunlageya.” (Jeremiya 17:9) Akala iyo ninovega na dhilobo dhinimusilidha Yehova, kaniloge wi ninowidda dhilobodha. Mudhidhi onkala iyo nivegaga na dhilobodha, ninoziveliwana nonaga ninga kahiyo dhawopiha. Na mudhidhiya mubuwelo wehu onottiya onivaha ezinddiyelo wi eji elobo yabure.—Masalmo 119:70; 1 Timóteo 4:1, 2.

11. Nivuru na Galásia 6:7 ninnikamihedha dhavi osakula mavego aderetu?

¹¹ Nzu na Mulugu ninloga wi: “Muthu-muthu oner’osinanga yàliliye.” (Galásia 6:7) Kuwagenyedhe wi, ogavegaga na dhilobo dhabure omagomelowa  onelege okosa dhilobo dhabure. Motagiha, attu anziveliwa wona vidiyu dhonyakuwa, mubuwelo wawa onodhaleliwa dhilobo dhonyakuwa, anofiyedha okosaga dhilobo dhonyakuwa. Yehova ononivaha nikamihedho nofwanyelela wi niwodhe osakula deretu mavego ehu.

12. Elobo gani enanikamihedhe okosa dhosakula dhinimuzivela Mulugu?

¹² Ahikalawo mavego ahinaganyedheya, anoneya momaguva wi Yehova onowidda. Kito nigahikaane ebaribari wi Mulugu onowidda? Yehova kanivahile mazina a mavego etene anfwanyeela iyo ovegana obe nne. Iyene onfuna wi nilabihedhe mubuwelo wehu woshagihiwa na Bibilia wi nisakulege dhokosa dhehu. (Kengesa Galásia 6:5.) Wi niwodhe oshagiha mubuwelo wehu, Yehova ohinivaha magano. Magano aba ebaribari ya Bibilia, annisunziha okosa dhosakula dhaderetu dhiniwanana na efunelo yaye.—Éfeso 5:17.

13. Akristu ankanela eni monelo wottiyana mowiwanana na osakula mavego? Elobo gani entamela okosa Akristu etene?

¹³ Kahiyo yawi dhosakula dha Akristu otene dhinoligana. Sabwaya? Sabwa yawi dhifunelo dha attu dhihittiyana. Mwa mpaddi wa mavego, Mukristu mmodha onoziveliwa na mavego mena oku mwina akoddaga oziveliwana. Akristu etene anofuna okosa dhosakula dhaderetu, noona anotamela weddihiwa na Bibilia. (Filipi 1:9) Magano anonikamihedha  okosa dhosakula dhaderetu dhinimuzivela Mulugu.—Masalmo 119:11, 129; 1 Pedro 2:16.

14. (a) Ekalele eni yofuneya ozuzumela mudhidhi onnongela iyo mavego ehu? (b) Murumiwi Paulo wavahile Akristu malago gani?

¹⁴ Enofuneya okalela txenjewa na mudhidhi ononga iyo na mavego. Ninga Akristu elobo eli yamakamaka ku omulabela Yehova. (Kengesa Mateu 6:33.) Dila dhina nihiziwaga, ninofiyedha ononga mudhidhi mwinji na mavego. Murumiwi Paulo wahibazela wawaddela Akristu mazu aba: “Tamelani wedda txenjewa. Muhikalege ninga ataduwa, mweddege na malago. Puraní nsaka nthino, vowi malabo alihu babure.” (Éfeso 5:15, 16) Eji enoniha wi niziwege wimetxa maddile na mudhidhi wa mavego,  nivilibihedhaga okosa guru wi mabasa a Mulugu akale vamburoni woroma.—Filipi 1:10.

15. Koddi mavego anfwanyela iyo orabela babale anziwa iyo wi babure bahi?

¹⁵ Nihimala wona mwawakwana-mwene wi ninofwanyela orabela mavego anidda Yehova. Kito akala ninowaganyedha mavego aderetu na abure? Egakala dhawene enofuneya okala txenjewa? Karoma wubuwela dhahi: Kowiliwa weyo wedda dila envira vamwangoni, ogasakulile wedda makomeya? Nne. Sabwa yawi weyo onofuna okalawo, onorabela ngovi. Yakene enopadduwa na mavego. Bibilia onloga wi: ‘Orabelihe nnyalo nawo dhilobo dhabure.’ (Gano 4:25-27) Enofuneya okalelaoddayi-wene mavego anziwa iyo wila babure, enofuneya vina orabela mavego anaganyedha iyo wi babure obe baderetu. Kaninfuna okosa elobo engujula mandano ehu na Yehova.

16. (a) Dhilobo gani dhinidda Yehova? (b) Weyo onatonyihedhe dhavi wi onowidda esile dhinidda Yehova?

¹⁶ Munasalmo ohileba dhahi: ‘Nyuwo onimukwela Yehova, mw’idde esile dhili dhabure.’ (Masalmo 97:10) Bibilia ononisunziha dhubuwelo dha Yehova. Oziwa esile dhinubuwela Yehova enele oukamihedha wubuwelaga ninga iyene. Motagiha: Ninoziwa wi Yehova onowidda ‘nlumi n’ottambi, mada ankuttula nikami na muttu ohina muladdu, murima onubuwela dhotakala na manyalo anttamagela obure. (Gano 6:16-19) Ninoziwa vina wi  Yehova ‘onowidda ojeberuwa, webedha dhosemiwa, aje, owali, ntxiga, olezela, mattanga ahina nipara nononeleyamo na dhilobo dhina dhinladdana na esene.’ (Galásia 5:19-21) Onowodha woona mukalelo anawukamihedhe malago aba ogafunaga osakula mavego? Ninfuna nimwiwelelege Yehova mudhidhi wotene masiki nigakala nooka obe vanamwinjini. (2 Korinto 3:18) Esile dhinkosa iyo nigakala nooka, dhintonyihedha ebaribari ya omuttu wehu.—Masalmo 11:4; 16:8.

17. Nigasakulaga mavego ehu elobo gani enfwanyela iyo ovivuza?

¹⁷ Egali dhahene, nihinatti osakula mavego ehu enofuneya ovivuza: Omagomelowa wa mavego aba, mandano aga na Yehova anakale dhavi? Mubuwelo waga onakale dhavi? Nigamala otanalela deretu ninele ofwanya magano ananikamihedhe osakula mavego aderetu.

18, 19. (a) Malago gani avahile murumiwi Paulo Akadda Filipi? (b) Magano gani ananikamihedhe osakula deretu mavego ehu?

¹⁸ Osakula mavego eli ninga osakula dhilobo dhinadhale muyubuweloni mwehu. Murumiwi Paulo ohileba: “Amudhaga! Vogwaddela-vene, tamelaní na murimenyu dhetene dhili dhebaribari, dhothithimiheya, dhomyala, dhokoddela, dhofuneya, dhoriheya; tamelaní weddana makalelo apama otene, anfwanyela othithimihiwa.” (Filipi 4:8) Nigadhaliha muyubuweloni dhilobo ninga esi, ninele owodha ologa wi: ‘Mazu a mwano mwaga vina dhili mmirimani mwaga dhukodeleleni nyuwo Nabuya Yehova.’—Masalmo 19:14.

 ¹⁹ Ovivuze: ‘Dhilobo gani dhindhaliha miyo muyubuweloni mwaga? Ddigona vidiyu obe porograma ya TV, koddi ddinowubuwela dhilobo dhaderetu vina dhokoddela? Ddinokala wottugareya na mubuwelo wotxena? (Éfeso 5:5; 1 Timóteo 1:5, 19) Ddinokana ofuru ddigalobelaga? Obe ddinokaana manyazo? Ddinkala ddubuwelaga dhilobo dhotimbwini vina dhonyakuwa? (Mateu 12:33; Marko 7:20-23) Koddi mavego asakulile miyo anoddittiya okala ninga ‘attu a mwilaboni mpuno?’ (Roma 12:2) Wakula mavuzo aba ororomeleya enokamihedha okaana mandano oliba na Yehova. Ninfuna nimukumbirhe Yehova wi: “Rabelihaní mento aga dhili maveya.” *—Masalmo 119:37.

20, 21. Nigasakulaga mavegu ehu ninfwanyelela eni watanalela abalihu?

²⁰ Gano yina ya makamaka eli va 1 Korinto 10:23, 24 enloga: ‘Dhotene dhinorumeeliwa, mbwenye kahiye dhetene dhinlibiha. Muttu-muttu katamelege dhinimuzivela mwinya, atamelege vina dhinazivela akwaye.’ Sabwa yokaana ofuru, kintapulela wi ninofwanyeela okosa dhotene dhinfunihu. Jofuneya okala attu a malago vina nitanaalele mukalelo onapattiwe abali na arogora mwaha wa dhosakula dhehu.

²¹ Mubuwelo wa attu ohittiyana. Weyo txino  onasakula woona vidiyu na mubuwelo ohinupatta muladdu. Musogorhomwa weyo ozinddiyela wi enowadhugudha abali ena. Venevo ogakosile dhavi? Ebaribari wi weyo ohikana ofuru wa wona vidiyuya, mbwenye onosakula ottiya wona sabwa yawi weyo kunfuna ‘omuttegela mbali’ vina—‘Kristu.’ (1 Korinto 8:12) Kaninfuna okosa elobo enobaniha nroromelo na abalihu.—Roma 14:1; 15:1; 1 Korinto 10:32.

22. Nintonyihedha dhavi wi ninoriha dhosakula dha abali ena?

²² Ovano katanalela wi yubuwelo yawo kinurumeliha wona elobo, wengesa obe okosa, oku mbali mwina oli na weyo kanonana makani. Onakose dhavi? Sabwa yawi weyo onowakwela abalawo vina onowariha, kunamuddidele wi asaddule. Motagiha, anameddiha karo anoziwa wi attu ena aneddiha vang’ono-vang’ono obe anottamagiha oku agalivi anameddiha a deretu. Namukalelo woligana weyo na attu ena txino vanokala ottiyana vang’onovi mwa osakula mavego, egakala dhawene moheli mufware gano dha Bilbilia.—Kohelét 7:16; Filipi 4:5.

23. Elobo gani enanikamihedhe osakula deretu mavego ehu?

²³ Elobo gani enanikamihedhe osakula deretu mavego ehu? Nilabihedhe mubuwelo wehu woshagihiwa na Bibilia vina niziwege oriha etanaalelo ya abali ena. Mwadhawene ninele owodha wiwelela mazu aba; “mwiraga elobo jilobo, tamelaní omuthithimiha Mulugu.”