1, 2. Elobo gani enfwanyela iyo ononelamo mwaha wa Satana vamodha na adomonyo?

OKALA mparaizu enakale elobo yoziva. Ninelege okalawo na mukalelo wanifunana Mulugu. Mbwenye ovanene ninkala mwilaboni munlamuleliwa na Satana vamodha na adomonyo. (2 Korinto 4:4) Ebaribari wi iyo kaninwodha wawona mbwenye awene ahikalawo vina ahikaana ewodhelo enddimuwa.

² Mwari mwa kapitulu eji ninele osunza mukalelo womaga mandano oliba na Yehova vina ovibarela na dhimanya dha Satana. Yehova ohilibela wi onele onikamihedha. Mbwenye enofuneya oziwa marhe anlabihedha Satana na adomonyo aye wi aninyengette vina anilupele.

3. Satana onfuna eni mwa iyo?

³ Satana ohiloga wi attu animulabela Yehova sabwa ya mareliho anakelani, mbwenye agafwanyiwa masoso anomusadduwela. (Kengesa Job 2:4, 5.) Satana na adomonyo anowodha ozinddiyela akala muttu onoroma omusunza Bibilia nanda anotamela omuttiyiha efunelo yaye. Awene anosilidhiwa vaddiddi agamoona muttu onimperhekela Yehova egumi yaye wi abatiziwe.  Bibilia onomuladdaniha Satana na “poddogoma ongóroma amutamelaga womuja.” (1 Pedro 5:8) Satana onfuna agwadde mandano ehu na Yehova.—Masalmo 7:1, 2; 2 Timóteo 3:12.

4, 5. (a) Elobo gani ehinwodha Satana okosa? (b) Ninawodhe dhavi “opambiha Satana”?

⁴ Mbwenye kaninfwanyela omova Satana vamodha na domonyo. Yehova ohimetxa maddile mwa esile dhinwodha onikosela Satana. Yehova ohilibela wi “muthithi munddimuwa” wa Akristu a ebaribari  wa abale “avirile mmasosoni manddimuwa” anele okala mparaizu. (Ovuhulela 7:9, 14) Nlibelo ntti Satana kanawodhe otwa sabwani Yehova onobarela nlogo naye.

⁵ Nigakaana mandano oliba na Mulugu, Satana kanawodhe onimwalaniha na Yehova. Bibilia onloga wi: “Nabuya onokala na nyuwo, mugandana na iyene.” (2 Mapadduwo 15:2; kengesa 1 Korinto 10:13.) Enowodheya onvanya Ddiabo obe omwidda. Na mukalelo gani? Nigakala amarho a Yehova. Jijuwene ekosile adhari aye ororomeleya a nsaka na mundduni ninga: Abel, Enok, Nowé, Sara na Mizé. (Ahebreu 11:4-40) Bibilia onologa wi: ‘Mmukoddege Satana, iyene onere owuthawelani uddayi-wene.’—Tiago 4:7.

6. Satana onneha dhavi?

⁶ Satana onoziwa wi Yehova ohimetxa maddile mwa esile dhinwodha iyene onirela. Masiki dhawene, iyene ononeha wi awodhe wobaniha mandano ehu na Yehova. Masaka abano, ononifwarafwara na mikalelo dhottiyana-ttiyana alabihedhaga mirega dha nsaka na mundduni. Miregadha esi sivi?

7. Satana ontabutxela eni nlogo na Yehova?

⁷ Murumiwi Joau ohileba wi: “Niziwa wi nilí akadda Mulugu, oku elabo yotene ekalaga mmadani mwa satana.” (1 Joau 5:19) Vowi ddi Satana onag’anela elabo eji yabure, iyene onotamela wang’anela nlogo na Yehova. (Mikeya 4:1; Joau 15:19; Ovuhulela 12:12, 17) Ddiabo onoziwa wi ohalena malabo mang’onovi, noona ononididela wi nittiye omuroromela Yehova. Dila dhina  iyene ononitabutxa na mukalelo wowooneya obe wohooneya.

8. Elobo gani enfwanyela iyo ononelamo?

⁸ Éfeso 6:12: onloga dhahi: “Txibarene iyo kanin’wana na athu, nin’wana na muya dhabure dhihinoneya.” Mukristu ddi mukristu ohikaana kani na Ddiabo vamodha na adomonyo. Enofuneya oziwa wi attu otene animperhekela Yehova egumi yawa anopattiwa na koddo eji. Karta yalebele murumiwi Paulo akadda Éfeso, ohilogamo dila ttaru wi Akristu anofwanyela ‘okala ovikomene.’—Éfeso 6:11, 13, 14.

9. Satana na adomonyo aye antamela onirela elobo gani?

⁹ Satana vamodha na adomonyo aye anonyengetta na mikalelo dhottiyana-ttiyana. Indde, nigawodha owanana murega mmodha, iyene onotamela mwina. Ddiabo onotamela onobaniha wi nidduwale mirega dhinlabana iyene. Kaninyengettiwe vowi Bibilia ononaddela dhimanya dhinlabihedha Satana. (2 Korinto 2:11; koona epaddi Ononelemo Deretu 31.) Mukalelo mmodha bwa ologa na muya.

10. (a) Muya dhabure txini? (b) Mulugu onimoona dhavi muttu onlabihedha muya dhabure?

¹⁰ Ologa na muya dhabure onowattukulela attu okosa mandano na adomonyo modhela merelo ohinoneleyamo deretu ninga olabihedha makaga, okwiri na ologa na amarafula. Bibilia onloga wi ologa na muya elobo ‘yosilidha,’ kinwodheya wawebedha adomonya vina omwedha Yehova. (Olibiha 18:10-12; Ovuhulela 21:8) Akristu a ebaribari anofwanyela orabela olabihedha muya dhabure.—Roma 12:9.

11. Ngovi gani enamugwele muttu ontamela ologa na muya dhabure?

 ¹¹ Satana agaziwa wi iyo nihikaana efunelo yologa na muya dhabure, kinamurutxe onikwekwettela okosa dhilobo dhodomonyo. Mukalelo wotene wologa na muya dhabure onogwadda mandano ehu na Yehova.

12. Satana onatamela dhavi wanyengetta attu?

¹² Satana onotamela wazuzumiha attu. Iyene onowita waganyedha ofiyedha attu ena woonaga ‘dhaderetu ninga dhabure, dhabure ninga dhaderetu’. (Izaiya 5:20) Ddiabo onovuwiha moonelo wawi magano a Bibilia kampuriha elo vina onologa wi nigahikala attu owagalala kopwaza malago a Mulugu.

13. Kaloga dhotagiha dhinoniha wi Satana onolabihedha murega wawaganyedha.

¹³ Waganyedha onokosa mpaddi wa mirega dhinlabihedhetxa Satana. Oromile olabihedha wale vaddiddi. Koona dhotagiha dhing’onovi. Mmunddani mwa Edeni, iyene wahilabihedha murega obu wowaganyedha modhela onvuza Eva: “Txibarene Mulugu oukoddihani oja milima dha miri dhili muddebe-mpuno?” (Wita 3:1) Nsaka na Job, Satana wahinvuza Yehova vamentoni va angelo eraga wi: “Munona ninga onulabelani yovene?” (Job 1:9) Mudhidhi obatiziwe Yezu, Satana wahitamela okosa mavurhano na iyene, modhela ologa: “Akala nyuwo muli mwana Mulugu, lamulaní wi malugu aba asadduwe akale oja.”—Mateu 4:3.

14. Elobo gani enkosa Satana wi attu aganyedhege wi olabihedha muya dhabure kahiyo elobo yawopiha?

¹⁴ Masaka abano Satana onowita waganyedha. Iyene onfuna wi attu obuwelege wi olabihedha muya  kahiyo elobo yabure. Iyene onolabihedha dhilobo dhiniwanana na muya dhabure, akosihaga ninga dhilobo dhaderetu. Akristu ena anofiyedha waganyedha, obuwelaga vina wi kadhina makani. (2 Korinto 11:3) Elobo gani enfanyela iyo okosa wi nivibarele? Ninaziwe dhavi wi Satana ononinyengetta? Ovano ninfuna nitanaalele dhilobo bili dhinlabihedha Satana: Mavego vina otamela mirobwe sabwa ya oredda.

15. Mavego agawodhile dhavi onittukulela okosa dhilobo dha adomonyo?

¹⁵ Mavidiyu menjene, porogarama dha TV, komputadori na mavego mena dhinokosa epaddi ya adomonyo vina masalapitto. Attu angilatela wona dhilobo esi, anologaga wi kahiye dhabure vina kavali makani okaana nipakelo na adomonyo. Mbwenye enowodheya okosa epaddi y’adomonyo modhela ovolowelana dhilobo ninga wengesa makarta a târo, bola ya kristal vina wengesa mmadani. Ddiabo onovita ngovi entota dhilobo esi dhinkala ninga dhilobo dhinrutxa ononeleyamo, dhotikiniha vina dhozivela dhovegana. Attu ena anubuwela wi kavali makani wona dhilobo ninga esi, sabwani mwawene kinligana na olabihedha muya dhabure. Wubuwela wa attu aba okaleleni elobo yawopiha?—1 Korinto 10:12.

16. Sabwaya jani kannifwanyela ovegana dhilobo dhiniwanana na muya dhabure?

¹⁶ Satana vamodha na adomonyo kanwodha wengesa dhili muyubuweloni mwehu. Mbwenye awene anowodha ozinddiyela esile dhinziveliwa iyo, ninga mavego  ansakulihu wi none vamodha na amudhihu. Elobo gani enapadduwe nigasakula wona mavidiyu, jibo dhovuruwana, wengesa manivuru aniwanana na miselu dha adomonyo, akwiri, alaula, wombeza makaga, muniya, ologa na amarafula, akumbaisa na dhilobo dhina. Satana vamodha na adomonyo anowodha woona akala iyo ninoziveliwa dhilobo esi. Mwavenevo awene anonikukusela okwela dhilobo dhiniwanana na muya dhabure.—Kengesa Galásia 6:7.

17. Satana onwodha dhavi opura efunelo yehu yotamela egumi?

¹⁷ Satana, onopura efunelo yehu y’otamela egumi yapama, sabwani attu enjene ahikaana makattamiho  a egumi. Enopadduwa muttu oja mirobwe dhottiyana-ttiyana ahivulumuwaga. (Marko 5:25, 26) Attu ninga abuwene anorimeliwa njedhelo arumelaga elobo-elobovi wi avulumuwe. Ninga Akristu enofuneya okala txenjewa wi ninatamele mirobwe dhiniwanana na ‘muya dhabure.’—Izaiya 1:13.

18. Akristu anfwanyeela orabela mirobwe gani?

¹⁸ Nsaka na ana Izrayel, attu ena anlabihedha ‘muya dhabure.’ Yehova wahawaddela wi: “Mugavenyihedhaga myono dhenyu olobela, miyo kaddinuwagñanani; mugaddoddobelaga malobelo enyu gwé, miyo kaddinvuruwana.” (Izaiya 1:15) Karoma otanaalela, nsaka nttile Yehova kavuruwana malobelo awa! Iyo kaninfuna okosa elobo enagwadde mandano ehu na Yehova niyelelaga nikamihedho naye, makamaka nigakala aredda. (Masalmo 41:4) Akala ninowubuwela oja mirobwe, enofuneya otamela oziwa akala mirobwedha dhinowiwanana na muya dhabure. (Mateu 6:13) Nigazinddiyela wi dhinovolowela muya dhabure enofuneya okodda!—Koona Epaddi Ononelemo Deretu 32.

19. Elobo gani enakosiha attu wawovaga adomonyo?

¹⁹ Attu ena anubuwela wi Satana vamodha na adomonyo kawo, mbwenye ena anoziwa wi ahikalawo sabwa ya dhopadduwa dhinoniha okalawo wawa. Enjene anottiddiwa wova sabwa y’otabutxiwa na adomonyo. Ena anologa miselu dhawopiha afiyedhaga watabutxa attu ena. Attu enjene kanwodha omaalana esile dhinziwani sabwa ya adomonyo. Miselu esi dha Ddiabo dhinvuwihiwa dhinowatabutxa attu.

20. Ninarabele dhavi owaza ottambi wa Satana?

 ²⁰ Satana onfuna—wi attu amovege. (2 Tesalónika 2:9, 10) Iyene muttambi nanda onoziwa olabihedha marhe awanyengettana attu wi azuzumele muya dhabure vina onowattukulela attuya okuluvela dhilobo dhohikaana matibelo ebaribari. Attu aba txino anologa dhilobo dhinubuwelani wi al’owona obe al’owiwa. Dila dhotene dhinlogani miselu esi dhihina matibelo, dhinovapeya mwilaboni. Akala iyo ninologa miselu esi, kuloga ninomukamiyedha Satana odduwene onagurumeliha attu enjene, noona kaninfuna okosa ejuwene.—Joau 8:44; 2 Timóteo 2:16.

21. Ottiya ozuzumela miselu dha adomonyo elobo gani enfwanyela iyo okosa?

²¹ Nlogo na Yehova kaninfwanyela wova esile dhinkosa Satana vamodha na adomonyo. Akala mulabeli wa Yehova wanziwa miselu mwaha wa adomonyo ahinatti osunza ebaribari, kanfwanyela wawaddela attu ena. Nlogo na Yehova ninofwanyela ozuzumela wona dhikosile Yezu na ewodhelo envahile Yehova. (Ahebreu 12:2) Yezu kanonga mudhidhi waye awaddelaga anamafara aye miselu dhadomonyo. Iyene wazuzumela ologa miselu dha Omwene vina “matikiniho a Mulugu.”—Merelo 2:11; Luka 8:1; Roma 1:11, 12.

22. Elobo gani eganile weyo okosa?

²² Txipo kanidduwale wi efunelo ya Satana ja ogwadda mandano ehu na Yehova. Iyene onele okosa guru wi aninyengette. Mbwenye iyo nihimala oziwa mirega dhaye vina nihigana orabela muya dhabure. ‘Kanimuttiye Satana onivolowa.’ (Kengesa Éfeso 4:27.) Nigawodha ompemberha Ddiabo, ninofuruleya na mirega dhaye vina ninowakela nibarelo na Yehova.—Éfeso 6:11.