NSUNZO 07

Yehova Oli Dhavi?

Orumiha dhovuruwana obe Vidiyu dhisakuliwe na Elogeloya

Yehova Oli Dhavi?

Weyo ogewaga nzina ntti: Yehova Mulugu, txini enda muyubuweloni mwawo? Onubuwela wi iyene ddwaguru vaddiddi vina oli wolapelana na weyo dhahene ninga eli neneri na makwala odhulu? Obe onubuwela wi iyene kahiye muttu, mbwenye guru yoliba vaddiddi ninga jayi? Koddi Yehova bani? Bibilia ononaddela mikalelo dha Mulugu, vina onologa wi iyene ononitanaala.

1. Ninkoddela eni owodha omoona Mulugu?

“Mulugu, Muya.” (Joau 4:24) Yehova kana maningo nne magogoddo ninga aba ana iyo. Iyene muya onkala wirimu, mburho ohinwodhihu wona.

2. Mikalelo gani dhina Yehova?

Ebaribari wi iyo kaninwodha omoona Yehova; mbwenye nigasunzagavi mwaha wa iyene, ninodha omuziwa ninga muttu ona mikalelo dhotikiniha. Bibilia onologa: ‘Yehova onoziveliwa na oligana, kanapwaza aniwananeyana na iyene.’ (Masalmo 37:28) ‘Nabuya ddodhala ttagaraga na nttebwa’, kuloga iyene onowaweddela ttagaraga attu, ttabwa-ttabwa abale antabuwa. (Tiago 5:11) “Nabuya onowawaddamela ansuveya murima, onowalibiha anojeya.” (Masalmo 34:18 Tradução do Novo Mundo) Weyo wanziwa wi merelo ehu anompatta Yehova? Muttu onsakula wira dhabure onomunyimula vina onomukubanyiha. (Masalmo 78:40, 41) Mbwenye muttu onkosa dhomyala onomwagalaliha.—Kengesa Gano 27:11.

3. Yehova ononiha dhavi onikwela waye?

Mukalelo wamakamaka wa Yehova, okwela. Txibarene, Bibilia onologa wi ‘Mulugu okwela’. (1 Joau 4:8) Yehova ohinooniha okwela waye, kahiye mBibilianivi bahi, mbwenye vina na dhottandda dhaye. (Kengesa Merelo 14:17.) Motagiha, karoma wona mukalelo onittanddiliye. Iyene ohinivaha ewodhelo ya wonana kori dhokoddela-koddela, yovuruwana jibo vina weha dhoja dhoziva. Iyene onfuna wila nijevo egumi.

KASUNZAVI

Karoma wona enlabihedha Yehova wi akose dhilobo dhotikiniha. Karoma wona vina dhinkosa Yehova wi anonihe ejile eliye.

4. Muya wokoddela—guru ya Mulugu

Nigakosaga mabasa ninlabihedha mada ehu, mbwenye Yehova onlabihedha muya waye wokoddela wi akose mabasa aye. Bibilia onowoniha wi muya wokoddela kahiye muttu, mbwenye guru enlabihedha Mulugu wi attiddena mabasa aye. Kengesa Luka 11:13 na Merelo 2:17, mugamala mutanaalele mavuzo aba:

Iyo nigamukumbirha Mulugu muya wokoddela, ononivaha. Bilidhawene, weyo onona ninga muya wokoddela muttu obe guru enlabihedha Mulugu? Onubuwelela eni dhawene?

Yehova onolabihedha muya waye wokoddela wi erena dhawumiha milomo. Kengesa Masalmo 33:6 na 2 Pedro 1:20, 21, mugamala mutanaalele nivuzo ntti:

Yehova olabihedhi muya obu wokoddela na mukalelo gani?

5. Yehova ohikana mikalelo dhottittimiheya

Mizé wali mulabeli wororomeleya wa Mulugu, masiki dhawene iyene wahitamela omuziwa pama Mpaddutxi waye. Mizé wahiloga dhahi: ‘Ddiziwihení dhubuwelo dhenyu, dhawene panauziweni miyo pama.’ (Obudduwa 33:13) Yehova wahimwakula Mizé mwa omulagiha mikalelo dha omuttu Waye. Kengesa Obudduwa 34:4-6, mugamala mutanaalele mavuzo aba:

Ekalelo gani ya Yehova eziwihiwe Mizé?
Mikalelo gani dha Yehova dhinuzivela?

6. Yehova onowatanala attu

Nlogo na Mulugu, akadda Hebreu, ahikala adhari Wijipitu. Otabuwa wawa ompattile dhavi Yehova? Karumiha AUDIYU kafwarihedha, obe kengesa Obudduwa 3:1-10. Mugamala mutanaalele mavuzo aba.

AUDIYU: Yehova Wankubanya Sabw ya Otabuwa Wawa (2:45)

Yopadduwa eji enusunziha eni mwaha wa mukalelo onviwamo Yehova attu agatabuwaga?—Kang’ana versu 7 na 8.
Weyo onubuwela wi Yehova ohikana efunelo ya wakamihedha attu vina onubuwela wi iyene ohikana ewodheloya? Onubuwelela eni dhawene?