NSUNZO 19
Anamoona a Yehova Akristu Ebaribari?
Iyo Anamoona a Yehova, ninokuluvela wi nili Akristu ebaribari. Sabwaya? Mwari mwa nsunzo ntti, ninele wona mwaha wa matibelo a esile dhinrumelihu, sabwaya enkuweliwihu Anamoona a Yehova vina mukalelo ontonyihedhihu wi ninokwelana muttu na mukwaye.
1. Nikuluvelo na Anamoona a Yehova nindela wuvi?
Yezu ohiloga dhahi: ‘Nzu nenyu tta ebaribari.’ (Joau 17:17) dhahene ninga Yezu, nikuluvelo nehu nindela munzuni na Mulugu. Koona mukalelo okosilihu ejoya mowiwanana na mapadduwo a masaka abano. Mwari mwa vyaka 1870, mudhidhene obule nikuru na attu nahiroma ofwaseyela omusunza Bibilia. Awene afuna aziwe txini ensunziha Bibilia txibarene. Venevo vaziwani ebaribari ya mBibiliani, anrumela ejuwene masiki valani yottiyana na masunziho a marelijiau mena. Dhawene, awene ahiroma wasunziha ebaribari eji attu ena. *
2. Nikanelini nzina ntti na Anamoona a Yehova?
Yehova onowakuwela attu abale otene animulabela ninga anamoona aye, sabwani awene anologa ebaribari mwaha wa iyene. (Ahebreu 11:4–12:1) Motagiha, masaka a mundduni Yehova ologa na nlogo naye: ‘Nyuwo muli Anamoona aga.’ (Kengesa Izaiya 43:10.) Yezu onkuweliwa ‘munamoona wororomeleya.’ (Ovuhulela 1:5) Nona, yaka ya 1931 nahiroma olabihedha nzina ntti na Anamoona a Yehova. Ninowagalala vaddiddi mwaha wa okuweliwa na nzina ntti.
3. Anamoona a Yehova antagiha dhavi okwela otonyihedhile Yezu?
Yezu wanakwela venjene anamafwara aye ofiyedha wawona ninga anamudhi aye. (Kengesa Marko 3:35.) Na mukalelo wakakene, Anamoona a Yehova bowiwanana ninga anamudhi, orugunuwa elabo yotene. Jijuwene enattukulela okuwelana abali vina arogora. (Filémoni 1, 2) Iyo vina ninofwara nlamulo ntti: ‘Mwakwele amudhenyu a mmulogoni,’ obe mwakwele abali na arogora otene. (1 Pedro 2:17) Ninotonyihedha okwela oku na mikalelo dhottiyana, makamaka abalihu agafunaga nikamihedho.
KASUNZAVI
Kasunza mwaha wa nipadduwo na Anamoona a Yehova, vina koona dhilobo dhintonyihedha wi awene Akristu ebaribari.
Akristu ebaribari yeddelo yawa enowiwanana na magano a Bibilia vina anowasunziha attu ena esile dhinsunzani
4. Dhinrumelihu dhindela mBibiliani
Yehova wahibaza ologa wi omunonelamo wehu Bibilia ogahidhowavi bugonuwa. Kengesa Daniyel 12:4, mugamala mutanaalele nivuzo ntti:
-
Mudhidhi wadhowavi nlogo na Mulugu nimusunzaga Bibilia, txini ‘yadhowa bigonuwavi’?
Koona mukalelo wakosiwa nsunzo na Nzu na Mulugu, na nikuru na attu nttuwene nafwanyiwamo mulobwana wakuweliwa Charles Russell. Karumiha VIDIYU, mugamala mutanaalele nivuzo ntti.
-
Mvidiyuni, Charles Russell na attu ena amusunza dhavi Bibilia?
Wanziwa?
Mudhidhi na mudhidhi, ninowogolela ononelamo wehu wa Bibilia. Sabwaya? Sabwani Mulugu ononiziwiha vang’ono-vang’ono ejile eli munzuni naye, enoligana na txeza ya nzuwa enroma woneya vang’ono-vang’ono mpaka vati oya. (Kengesa Gano 4:18.) Ebaribari wi Bibilia kantxinja, mbwenye niganonelamo pama dhinlogiye ninowogolela esile dhinrumelihu.
5. Iyo Anamoona a Yehova ninkalawo mowiwanana na nzina ntti
Nisakulele eni nzina ntti, Anamoona a Yehova? Karumiha VIDIYU, mugamala mutanaalele nivuzo ntti.
-
Nzina ntti Anamoona a Yehova, nikaleleni yosakula yaderetu?
Yehova wasakuleleni attu wi akale anamoona aye? Sabwani awene agahisunziha ebaribari mwaha wa iyene, oku attu ena amuzivalelaga. Ndoweni none marhe minli dha ottambi oku.
Marelijiau mena ansunziha wi Mulugu onfuna wila attu alabihedhege dhingamuttu wi amwebedhegena. Koddi ejo ebaribari? Kengesa Onamakutha 26:1, mugamala mutanaalele nivuzo ntti:
-
Ebaribari wi Mulugu onfuna wila iyo nilabihedhege dhingamuttu wi nimwebedhegena? Yehova onoona dhavi dhingamuttu?
Marelijiau mena ansunziha wi Yezu, Mulugu. Koddi ejoya ebaribari? Kengesa Joau 20:17, mugamala mutanaalele mavuzo aba:
-
Ebaribariya jivi? Yezu na Mulugu muttu mmodhene?
-
Mulugu ohisakula nlogo wi naalaleyele attu ebaribari sabwa yaye vina mwanaye Yezu. Weyo oniwamo dhavi sabwa ya ejuwene?
6. Iyo ninokwelana
Bibilia onowaladdaniha Akristu na vyano dhottiyana dha nningo na muttu. Kengesa 1 Korinto 12:25, 26, mugamala mutanaalele mavuzo aba:
-
Akristu ebaribari ankosa eni agawonaga Akristu akwawa atabuwaga?
-
Weyo ononelimo eni sabwa ya okwelana ona Anamoona a Yehova?
Anamoona a Yehova a dhilabo dhina agafunaga nikamihedho, abali ena a dhilabo dhotene anotamela wakamihedha. Wi wone yotagiha modha, karumiha VIDIYU. Mugamala mutanaalele nivuzo ntti.
-
Ogapadduwa makattamiho Anamoona a Yehova anovaha nikamihedho. Eji enlagiha dhavi okwela onanina?
Akristu ebaribari anowatonyihedha okwela abalawa anfuna nikamihedho
ATTU ENA ANLOGA WI: “Anamoona a Yehova relijiau yitiwe ovanene.”
-
Yehova oromile wakuwela mudhidhi gani alabeli aye ninga anamoona?
OGWADDELA
Anamoona a Yehova Akristu ebaribari. Nili anamudhi animulabela Mulugu orugunuwa elabo yotene, yeddelo yehu eniwanana na magano a Bibilia vina ninowasunziha attu ena mwaha wa Yehova.
Kobuwela Dhisunziliwe
-
Nisakulele eni nzina ntti Anamoona a Yehova?
-
Iyo ninoniha dhavi okwelana wehu?
-
Weyo ononamo ninga Anamoona a Yehova Akristu ebaribari?
TAMELÁ ONONELAMO DERETU
Kasunzavi sabwa ya mapadduwo ehu.
Testemunhas de Jeová —Fé em Ação, Parte 1: Da Escuridão Para a Luz (1:01:27)
Koona yotagiha modha ya Anamoona a Yehova, ahovile ovitula masunziho ottambi.
Koona mavuzo mang’onovi ankosetxa attu mwaha wa Anamoona a Yehova.
“Perguntas frequentes sobre as Testemunhas de Jeova” (mitoma dha mu jw.org)
Stephen wankosa epaddi ya nikuru na attu nawana sabwa ya ottiyana wa ttebe. Koona emukamihedhile otxinja mumaleliye waziwa Anamoona a Yehova.
“A Minha Vida ia de Mal a Pior” (A Sentinela, 1.º de Julho de 2015)
^ Nivuru nehu, Mwang’aneli, ninovuwiha ebaribari ya mbibiliani ovenyana yaka ya 1879.
