NSUNZO 20

Mulogo w’Okristu Oneddihiwa Dhavi?

Orumiha dhovuruwana obe Vidiyu dhisakuliwe na Elogeloya

Yehova, Mulugu wovisasanyedha. (1 Korinto 14:33) Nona, enofuneya vina nlogo naye nikale dhawene. Mulogo onlaba dhavi? Mabasa gani anakose muttu-muttu wila akamihedhe?

1. Musogoreli wa mulogo bani?

‘Kristu musorho wa mulogo.’ (Éfeso 5:23) Ovenyana wirimu, Yezu onosogorhela mabasa a nlogo na Mulugu orugunuwa elabo yotene. Yezu ohimuttoma “mwimeleli wororomeleya vina wamalago”—nikuru ning’ono na alobwana a eziwelo ninkuweliwa Nikuru Nolamulela. (Kengesa Mateu 24:45-47.) Vyaka zana dhoroma, arumiwi na anddimuwa a mulogo wo Jeruzalemi anvaha malago milogo dha Akristu. (Merelo 15:2) Na mukalelo wakakene, masaka abano Nikuru Nolamulela ttinvaha malago milogo dhotene. Mbwenye awene kahiyo asogorheli a mulogo w’okristu. Awene anomusunza Bibilia wi aziwe ejile enafunana Yehova wi akose vina anofwara osogorhela wa Yezu.

2. Anddimuwa a mmulogoni bani, vina ankosa mabasa gani?

Anddimuwa a mmulogoni alobwana oliba mpaddi womuyani animulabihedha Bibilia wi asunzihe nlogo na Mulugu, vina ali omala na wale wi akamihedhe vina aapangarhaze alabeli a Yehova. Awene kanttambirha mwaha wa mabasa ankosani. Ottiya ejo, ankosa ejuwene ‘na murima wovilevela, ottiya wunlela opurana.’ (1 Pedro 5:1, 2) Anddimuwa a mmulogoni anowakela nikamihedho na adhari okamihedha. Na mudhidhiya adhari aba agavirihagamo magano a mBibiliani, anottomiwa ninga anddimuwa a mmulogoni.

Nikuru Nolamulela ninowattoma anddimuwa a mmulogoni ena wi akale anameddelela milogo. Alobwana aba anoweddelela milogo wila akamihedhe vina alibihe abali. Anameddelela milogo anolabihedha malebo a mBibiliani wila one akala mbali onovirihamo magano wi attomiwe ninga mudhari wokamihedha vina munddimuwa wa mulogo.—1 Timóteo 3:1-10, 12; Tito 1:5-9.

3. Mabasa gani ana Munamoona mmodha-mmodha mmulogoni?

Otene mmulogoni ‘anottittimiha nzina na Yehova’ modhela otugumanaga vina olaleya miselu dhapama mpaka munwodhelani.—Kengesa Masalmo 148:12, 13.

KASUNZAVI

Koona mukalelo onsogorhela Yezu, nanda anddimuwa a mmulogoni anafware dhavi yotagiha yaye. Ninele wona enfwanyelihu okosa wi nimwiwelele Yezu vina nakamihedhe anddimuwa a mmulogoni.

4. Yezu musogoreli wapama

Yezu ohiniwoba. Kengesa Mateu 11:28-30, mugamala mutanaalele nivuzo ntti:

Yezu onfuna wi iyo nonege dhavi osogorhela waye?

Anddimuwa a mmulogoni anfwara dhavi yotagiha ya Yezu? Karumiha VIDIYU.

VIDIYU: Anddimuwa a Mmulogoni Avahaga Nikamihedho Onepal (4:56)

Bibilia onologa enfwanyela okosa anddimuwa a mmulogoni wi attidde mabasa attomeliwani.

Kengesa Izaiya 32:2 vina 1 Pedro 5:1-3, mugamala mutanaalele mavuzo aba:

Weyo oniwamo dhavi ogawoona anddimuwa a mmulogoni avilibihedhaga wi akale a pama ninga Yezu?
Dhilobo gani dhina dhinakose anddimuwa a mmulogoni wi amutagihe Yezu?

5. Anddimuwa a mmulogoni anosunziha avahaga yotagiha yawa

Yezu onfuna wi anddimuwa a mmulogoni onege dhavi mabasa ankosani? Karumiha VIDIYU.

VIDIYU: Anddimuwa a Mmulogoni Anosogorhela (7:39)

Yezu ohavaha malago abale ansogorhela mulogo. Kengesa Mateu 23:8-12, mugamala mutanaalele nivuzo ntti:

Txini enloga Bibilia enfwanyelela anddimuwa a mmulogoni okosa? Weyo onona ninga anddimuwa a marelijiau anokosa ejuwene?

Anddimuwa a mmulogoni anolibiha mandano awa na Yehova vina anowakamihedha anamudhi awa okosa yakakene
Anddimuwa a mmulogoni anowatanala abali otene a mmulogoni
Awene anolaleya miselu dhapama
Vina anosunziha nzu na Mulugu. Awene anokamihedha okuputta Onyumbani ya Omwene vina na mabasa mena

6. Enofuneya iyo wakamihedha anddimuwa a mmulogoni

Bibilia ononivaha marhe a wakamihedha anddimuwa a mmulogoni. Kengesa Ahebreu 13:17, mugamala mutanaalele nivuzo ntti:

Bibilia onlogela eni wi ninofwanyela wawiwelela anddimuwa a mmulogoni? Weyo ononamo dhavi makani aba?

Kengesa Luka 16:10, mugamala mutanaalele nivuzo ntti:

Ekaleleni yamakamaka wakamihedha anddimuwa a mmulogoni na dhilobo dhing’ono?

ATTU ENA ANLOGA WI: “Kunfwanyela okana relijiau wi omwebedhe Mulugu.”

Omwebedha Mulugu na attu ena ennikamihedha dhavi?

OGWADDELA

Yezu musogoreli wa mulogo. Anddimuwa a mmulogoni anofwara malago aye, iyo ninokala owagalalene nigakamihedhaga anddimuwa a mmulogoni, sabwani awene anonisunziha na dhotagiha dhawa dhaderetu.