NSUNZO 21

Miselu Dhapama Dhinlaleyiwa Dhavi?

Orumiha dhovuruwana obe Vidiyu dhisakuliwe na Elogeloya

Mohigonela, Yehova onele olabihedha Omwene waye wi agomihena makattamiho otene. Esi miselu dhapama dhinfwanyelela wiwa attu otene. Yezu oharuma anamafwara aye wi avuwihedhe miselu esi attu a elabo yotene! (Mateu 28:19, 20) Dhilobo gani dhinkosa Anamoona a Yehova wi avirihemo esile dhirumile Yezu?

1. Masaka abano nlebo na Mateu 24:14 ninakwanihedheya dhavi?

Yezu wahibaza ologa: “Miselu esi dhapama dha Omwene dhinele olaleyiwa mwilaboni mwetemwene.” (Mateu 24:14) Anamoona a Yehova anowagalala sabwa ya okosa mabasa aba amakamaka. Ninolaleya miselu dhapama mwilaboni mwetemwene na dhilogelo dhokwaranya 1,000! Mabasa aba manddimuwa anofuna guru vina ovisasanyedha. Kohikala nikamihedho na Yehova, egahirutxa okosa mabasa aba.

2. Ninivilibihedha dhavi wi naalaleye attu?

Efunelo yehu jowalaleyela attu nihitanaalaga mburho onkalani. Moligana na Akristu a nsaka noroma ‘Iyo ninolaleya nyumba na nyumba.’ (Merelo 5:42) Dhahene, ninowodha ologa na attu matxikwi menjene vyaka dhotedhene. Vowi mudhidhi mwina attu enji kankala mmatakulu, iyo ninolaleya mimburo dhotedhene dhingumana attu. Ninovilibihedha wawaddela attu miselu dha Yehova, vina efunelo yaye.

3. Bani ona muttorho wolaleya miselu dhapama?

Akristu otene a ebaribari ahikana muttorho wowalaleyela attu ena miselu dhapama. Iyo ninottittimiha mabasa aba attomeliwehu. Muttu-muttu wa iyo, onovilibihedha ottidda mabasa aba sabwani ninoziwa wi egumi ya attu eli vangovini. (Kengesa 1 Timóteo 4:16.) Iyo kaninttambirhana mabasa aba ankosihu, sabwani Bibilia onloga wi: “Nyuwo mul’ovahiwa muhipitxelaga elo, muvahe vina muhilogosaga elo.” (Mateu 10:7, 8) Ahikalawo attu ena ahinfuna onivuruwana, masiki dhawene ninodhowavi nilaleyaga, nimwiwelelaga Yehova vina nimwagalalihaga.

KASUNZAVI

Katamela oziwa dhinkosa Anamoona a Yehova wi alaleye miselu dhapama elabo yotene vina koona marhe anakamihedhana Yehova.

Alaleyaga orugunuwa elabo yotene: (A) Costa Rica, (B) Estados Unidos, (C) Benin, (D) Tailândia, (E) Yap, (F) Suécia

4. Ninovilibihedha wi nalaleyele attu otene

Anamoona a Yehova anovilibihedha venjene olaleya miselu dhapama mmimburoni dhotene munfwanyeya attu. Karumiha VIDIYU, mugamala mutanaalele nivuzo ntti.

VIDIYU: Olaleya “Mpaka Okomoni wa Elabo” (7:33)

Weyo ononamo dhavi mwaha wa mabasa olaleya ankosa Anamoona a Yehova?

Kengesa Mateu 22:39 na Roma 10:13-15, mugamala mutanaalele mavuzo aba:

Mabasa ehu olaleya, antonyihedha dhavi wi ninowakwela attu?
Yehova oniwamo dhavi mwaha wa abale anlaleya miselu dhapama? —Koona versu 15.

5. Iyo ninlaba mumodhani na Mulugu

Nihikana mwaha dhinji dhinoniha wi Yehova ddinsogorela mabasa ankosihu. Koona empadduweli mbali onkuweliwa Paul, o Nova Zelândia. Labo dhahi na txiguwo wele olaleya nyumba na nyumba, wahinfwanya muyana omulobeleli Mulugu alabihedhaga nzina na Yehova wi muttu afiye vanivaye. Paul ohiloga “Mvireli wora ttaru, ddahifiya vatakulu vaye baddigogodda musuwo.”

Kengesa 1 Korinto 3:9, mugamala mutanaalele nivuzo ntti:

Dhotagiha esi dhinoniha dhavi wi Yehova ddinsogorela mabasa aba?

Kengesa Merelo 1:8, mugamala mutanaalele nivuzo ntti:

Ninfunela eni nikamihedho na Yehova wi nikose mabasa olaleya?

Wanziwa?

Sumana dhotedhene mmatugumanoni a vari va sumana, ninovahiwa mashagiho olaleyana. Akala weyo onodhowaga omatugumanoni, woonilemo dhavi mwaha wa mashagiho aba anvahiwehu?

6. Iyo ninowiwelela nikokomezo ninivahile Mulugu na olaleya

Masaka arumiwi, attu ena ahitamela otximiha mabasa a olaleya. Mbwenye Akristu ahibarela ofuru wolaleya modhela ‘olibiha mabasa a olaleya miselu dhapama.’ (Filipi 1:7) Anamoona a Yehova ankosa yakakene masaka abano. a

Karumiha VIDIYU.