NSUNZO 24

Anju Bani Vina Ankosa Mabasa Gani?

Orumiha dhovuruwana obe Vidiyu dhisakuliwe na Elogeloya

Yehova onfuna wi iyo niziwe sabwa ya anamudhi aye ali wirimu. Anamudhi aba makuru a anju ankuweliwa ‘ana Mulugu.’ (Job 38:7) Bibilia onloga eni sabwa ya anju? Awene ankosa mabasa gani? Anju otene anokosa mpaddi wa anamudhi ali wirimu?

1. Anju bani?

Elabo ya vati ehinatti okalawo, Yehova wahimala wattandda anju. Dhahene ninga muhinwodhelihu omona Mulugu, iyo kaninwodha wawona anju vina ankala wirimu. (Ahebreu 1:14) Ahikalawo matxikwi owinjiva a anju, mmodha-mmodha wa awene akana mikalelo dhottiyana. (Ovuhulela 5:11) Awene ‘anowiwelela nzu na Yehova vina anowira esile dhinlogiye.’ (Masalmo 103:20) Masaka a mundduni, Yehova wannalabihedha anju wi avuwihe miselu, akamihedhe nlogo naye vina avune adhari aye afwanyeya vangovini. Masaka abano, anju anowakamihedha Akristu wafwanya attu anfuna osunza sabwa ya Mulugu.

2. Satana na adomonyo bani?

Anju ena ahimusadduwela Yehova. Anju woroma odhile okala musadduweli onkuweliwa ‘Satana Ddiabo, onanyengetta attu velaboni ya vati.’ (Ovuhulela 12:9) Satana wafuna alamulelege attu, nona iyene ohiwodha wakwekwetta Adamu na Eva vina na anju ena ovitaganyiha na iyene bakala asadduweli. Anju aba ankuweliwa adomonyo. Yehova ohattamagiha anju aba wirimu, ovano ankala velaboni ya vati, mbwenye anele otolotxiwa.—Kengesa Ovuhulela 12:9, 12.

3. Satana na adomonyo aye antamela oninyengetta dhavi?

Satana na adomonyo aye anowanyengetta attu enji alabihedhaga masarhapitto. Mmasarhapittoni attu anotamela ologa na muya, ejo elobo yabure. Motagiha, attu ena anotamela ologa na anameddiha makaga a vineneri, oroskopu, alawula vina anamungu. Attu ena agakala aredda, anotamela mirobwe dhiniwanana na masarhapitto. Satana vina onowattukulela attu orumela wi enowodheya ologa na amarafula. Mbwenye Yehova onloga dhahi: ‘Kamwakuluvele alawula vina kamwatamele akumbaisa.’ (Onamakutha 19:31) Satana na adomonyo aye, amwiddani a Mulugu. Awene annifunana obure, nona Yehova aganivahaga malago aba wila anibarele.

KASUNZAVI

Kasunza mwaha wa dhilobo dhapama dhinkosa anju, dhowopiha dha masarhapitto vina mikalelo dhovibarelana wa Satana na adomonyo aye.

4. Anju anowakamihedha attu osunza mwaha wa Yehova

Anju kanafiyedha attuya kakamwe wi alaleye. Ottiya ejo, awene anowakamihedha alabeli a Mulugu wi afwanye attu anfuna osunza mwaha wa Yehova. Kengesa Ovuhulela 14:6, 7, mugamala mutanaalele mavuzo aba:

Ninfunelani nikamihedho na anju wi nilaleye?
Kahiyo yaderetu oziwa wi anju anodhaga wukamihedha wafwanya attu anfuna omusunza Bibilia? Ekaleleni yaderetu?

5. Orabele masarhapitto

Satana na adomonyo aye amwiddani a Yehova. Awene vina amwiddani ehu. Kengesa Luka 9:38-42, mugamala mutanaalele nivuzo ntti:

Adomonyo anakosana eni attu?

Iyo kaninfuna wattiya adomonyo opatta egumi yehu. Kengesa Olibiha 18:10-12, mugamala mutanaalele mavuzo aba:

Adomonyo antamela dhavi ologa na iyo vina opatta dhigumi dhehu? Dhilobo gani dhiniwanana na masarhapitto dhinkosiwetxa mmuruddani mwawo?
Koddi Yehova, ohikana mwaha wa okoddiha masarhapitto? Sabwaya jani?

Karumiha VIDIYU, mugamala mutanaalele mavuzo aba.

VIDIYU: “Muthawe Muya Dhabure” (5:02)

Mvidiyuni, Paleza wahimmagela mwanaye zango mmononi, weyo onubuwela wi yali elobo yowopiha? Sabwaya?
Txini yafwanyela okosa Paleza wi avibarele wa adomonyo?

Oromana wale, Akristu ebaribari anowarabela adomonyo. Kengesa Merelo 19:19 na 1 Korinto 10:21, mugamala mutanaalele nivuzo ntti:

Ekalele eni yofuneya otolotxa elobo txilobo eniwanana na masarhapitto?

6. Kampemberhe Satana vamodha na adomonyo aye

Adomonyo aneddihiwa na Satana. Mbwenye anju ororomeleya aneddihiwa na Arkanju Migeli, nili nzina nina na Yezu. Migeli ona ewodhelo gani? Kengesa Ovuhulela 12:7-9, mugamala mutanaalele mavuzo aba: