NSUNZO 26

Mwilaboni Mukalele Eni Obure na Matabuwo?

Orumiha dhovuruwana obe Vidiyu dhisakuliwe na Elogeloya

Egapadduwa ngovi attu enji anovivuza: dhilobodha esi “dhimpadduwelani?” Ninoziveliwa oziwa wi Bibilia onowakula mavuzo aba!

1. Obure oromile dhavi mwilaboni?

Satana Ddiabo ohimusadduwela Yehova. Iyene wafuna wi attongege attu, noona banyengetta Adamu na Eva wi amusadduwele Mulugu. Satana owodhile dhavi okosa ejuwene? (Wita 3:1-5) Owodhile mudhidhi ologiliye ottambi woroma. Iyene omuttukulela Eva wubuwela wi Yehova wela onvitela elobo yaderetu. Satana ohazivalela wi agahikaana wagalala wowakwana kohimwiwelela Mulugu. Venevo, iyene wahiloga ottambi woroma amwaddelaga Eva wi kagakwile. Noona, Bibilia agamukuwela Satana ‘muttambi vina babi wa ottambi.’—Joau 8:44.

2. Adamu na Eva aganile okosa eni?

Yehova wahatapulela mada Adamu na Eva. Iyene wahawaddela wi milima dhotene dha mmunddani mwa Edeni anfwanyela oja, mbwenye ahije mmodha bahi. (Wita 2:15-17) Masiki dhawene, awene ahididelavi oja mulima obule. Eva ‘wahittukula mulimaya baroma oja.’ Mmalelani, wahinvaha Adamu ‘vina baroma oja.’ (Wita 3:6) Adamu na Eva kafwanyela onvanya Mulugu. Sabwani awene ali attu oligana, mbwenye masiki dhawene amusadduwela Yehova. Sabwa ya ejuwene awene ahittega vina ahikoodda olamulela wa Mulugu. Yogana eji ehatotela makattamiho menjene.—Wita 3:16-19.

3. Yogana ya Adamu na Eva epattile dhavi egumi yehu?

Muttegeli Adamu na Eva ahidha okala attu ohiligana, na ejuwene aharaviha anawa otene. Bibilia onloga dhahi sabwa ya Adamu: ‘Ovanya wa muttu mmodha bahi ovolotxa ottega mwilaboni, ottegawa ototela okwa. Ddabuno okwa onomuttidda muttu-muttu, vowi otene attega.’—Roma 5:12.

Kito nintabuwelani? Nintabuwela sabwa ya dhogana dhehu dhohipimeleleya. Sabwa ya dhogana dhabure dhinkosa attu ena. Dila dhina nintabuwela sabwa ya okala mburo vina mudhidhi wohifwanyelela.—Kengesa Kohelét 9:11.

KASUNZAVI

Koona wi kahiyo Mulugu onnitotela goi na obure onoonihu masaka abano vina katamela ononelamo mubuwelo waye aganonaga banigatabuwa.

4. Muttu odhilena goi mwilaboni

Attu enji anorumela wi ddi Mulugu onang’anela elabo. Koddi ejiya ebaribari? Karumiha VIDIYU.

VIDIYU: Bani Onlamulela Elabo? (1:24)

Kengesa Tiago 1:13 na 1 Joau 5:19, mugamala mutanaalele nivuzo ntti:

Koddi ddi Mulugu onnitotela obure na goi?

5. Koona dhodhelavodha sabwa ya olamulela wa Satana

Karumiha VIDIYU.

VIDIYU: Mulugu Onnittiyela Nni Otabuwa?—Yogwaddela (3:07)

Kengesa Wita 3:1-6, mugamala mutanaalele mavuzo aba:

Ottambi gani ologile Satana?—Koona maversu 4, 5.
Satana wonihile dhavi ommagedha Yehova wi wannavitela attu dhafunani?
Mowiwanana na Satana, jofuneya attu olamuleliwa na Yehova wi agalale?

Kengesa Kohelét 8:9, mugamala mutanaalele nivuzo ntti:

Nihoona wi kahiyo Yehova onang’anela elabo, sabwa ya ejuwene txini empadduwaga?

Adamu na Eva ali attu oligana vina akala mparaizu. Mbwenye awene ahinvuruwana Satana bamusadduwela Yehova
Ottega, goi na okwa dhimwadheyela mwilaboni
Yehova onele ogomiha ottega, goi na okwa. Attu anele wiyelela okala mparaizu na maningo oligana

6. Yehova ononitanaala

Koddi Mulugu ononitanaala-wene? Ndowe none elebile Mwene David na murumiwi Pedro. Kengesa Masalmo 31:7 na 1 Pedro 5:7, mugamala mutanaalele nivuzo ntti:

Malebo aba, anowoniha wi Yehova onowona goi dhinnipatta vina okana efunelo ya onikamihedha. Oziwa eji kinagalaliha?

7. Mulugu onele ogomiha goi yotene

Kengesa Izaiya 65:17 na Ovuhulela 21:3, 4, mugamala mutanaalele nivuzo ntti:

Ekaleli eni yaderetu oziwa wi Yehova onele ogomiha obure wotene onapatta attu masaka abano?

Wanziwa?

Mulogeli Satana ottambi woroma, ohitakaliha nzina na Yehova. Iyene okosile ejuwene modhela ommagedha Yehova wi kahiyo Mulamuleli woligana nne wokwela. Mohigonela, Yehova onele ogomiha goi yotene vina onele woniha wi olamulela waye bwa pama opitta wa Satana. Ejo egapadduwa Yehova onele okoddeliha nzina naye nitakalihile Satana. Eji enakale elobo yamakamaka mwilaboni.—Mateu 6:9, 10.

ATTU ENA ANLOGA WI: “Goi yoweha ya Mulugu.”