NSUNZO 35
Ninawodhe Dhavi Okosa Dhogana Dhaderetu
Iyo notene ninofwanyela okosa dhogana. Dhogana dhina dhinodhaga opatta egumi yehu vina mandano ehu na Yehova. Motagiha, txino ninofwanyela ogana onfunihu okala, marhe ovisapelana vina akala ninotela obe nne. Nigakosa dhogana dhaderetu, ninokana wagalala mwigumi mwehu vina ninomwagalaliha Yehova.
1. Weyo onawodhe dhavi omulabihedha Bibilia wila okose dhogana dhaderetu?
Ohinatti okosa yogana, kamulobelele Yehova okumbiraga nikamihedho vina koona enloga Bibilia mwaha wa makaniya. (Kengesa Gano 2:3-6.) Mwa dhilobo dhina, Yehova ononaddela enfwanyelihu okosa. Ekalaga dhawene, yogana yaderetu enakosiwe jomwiwelela Mulugu.
Kito akala mBibiliani kanimo nlamulo ninnaddela enfwanyelihu okosa? Yehova onele wuweddiha ‘mudila munfwanyelela weyo ovira.’ (Izaiya 48:17) Dhavi? Bibilia okana magano anwodha wukamihedha. Magano a mBibiliani, ebaribari ennisunziha ejile enubuwela Yehova mwaha wa makani ottiyana-ttiyana. Mwebaribari iyo ninoziwa ejile enubuwela Yehova, mudhidhi onengesihu mapadduwo a mBibiliani. Enowodheya okosa dhogana dhinimuzivela Yehova niganonelamo eniwamo iyene.
2. Dhilobo gani dhinfwanyelela iyo otanaalela nihinatti okosa yogana?
Bibilia onloga wi: ‘Muttu wa malago onoroma otanaalela dhiniwiye.’ (Gano 14:15) Ejo entapulela wi, ohinatti okosa yogana onofwanyelela oroma otanaalela dhodhelavodha. Kavivuze: ‘Magano gani a mBibiliani aniwanana na makaniya? Yosakula eji enele oddidhelana murenddele wa muyubuweloni? Yosakula yaga enapatte dhavi attu ena? Yamakamakaya, yosakula eji enele omwagalaliha Yehova?’—Olibiha 32:29.
Yehova bahi ddinfwanyelela onaddela ejile eli yaderetu vina eli yabure. Nigaziwa deretu magano vina malamulo a Yehova, nanda banigana wiwelela, mubuwelo wehu onele oshagihiwa deretu. Yubuwelo ewodhelo ena iyo ya ozinddiyela eli yaderetu vina eli yabure. (Roma 2:14, 15) Mubuwelo woshagihiwa ononikamihedha okosa dhogana dhaderetu.
KASUNZAVI
Koona mukalelo onnikamihedha magano a mBibiliani vina mubuwelo wehu wi niwodhe okosa dhosakula dhaderetu.
3. Kamuttiye Bibilia eddihe egumi yawo
Nigakosaga dhogana, magano a mBibiliani ananikamihedhe dhavi? Karumiha VIDIYU, mugamala mutanaalele mavuzo aba.
-
Ofuru wosakula txini?
-
Yehova onivaheleni ofuru wosakula?
-
Txini enivahile Yehova wi enikamihedhe okosa dhogana dhaderetu?
Wi wone dhotagiha dha mBibiliani, kengesa Éfeso 5:15, 16. Ogamala katanaalela “onawodhe dhavi olabihedha deretu mudhidhi wawo” wi . . .
-
omwengesege Bibilia malabo otene.
-
okale mamuni obe muteliwi, mambali obe mwana wa deretu.
-
wonaga matugumano na mulogo.
4. Kashagiha mubuwelo wawo wi okose dhogana dhaderetu
Akala Bibilia onovaha moonelo sabwa ya makani, kinrutxa okosa yosakulaya. Kito akala Bibilia kanloga makaniya? Karumiha VIDIYU, mugamala mutanaalele nivuzo ntti.
-
Mvidiyuni, txini ekosile murogora wi ashagihe mubuwelo waye vina akose yogana egamuzivele Yehova?
Sabwaya jani enkooddela iyo wattiya attu ena okosa dhogana dhehu? Kengesa Ahebreu 5:14, mugamala mutanaalele mavuzo aba:
-
Wakumbirha attu ena onikosela yogana enodhaga okala ninga elobo yohirutxa, elobo gani eli yofuneya wi muttu-muttu wa iyo aziwe?
-
Ninga monelihu mvidiyuni, txini enawukamihedhe oshagiha mubuwelo wawo vina okosa dhogana dhaderetu?
Moligana na mapa, yubuwelo yehu enonikamihedha osakula dila gani enfwanyelihu ofwara mwigumi mwehu
5. Kariha mubuwelo wa attu ena
Attu ahittiyana, nona anokosa dhogana dhottiyana. Ninonihe dhavi wi ninoriha mubuwelo wa attu ena? Koona mikalelo esi minli:
Yoroma: Murogora onziveliwa ovimakiyari onomwalela mmulogoni munafwanyiye arogora ahinziveliwa wawona akwawa avimakiarigi.
Kengesa Roma 15:1 na 1 Korinto 10:23, 24, mugamala mutanaalele nivuzo ntti:
-
Mowiwanana na maversu aba, elobo gani egaganile okosa murogora? Weyo onakose eni ogakala na muttu onona ninga jabure okosa elobo enrumeliha mubuwelo wawo?
Yanawili: Mbali onoziwa wi Bibilia kankooddiha ong’wa noviyang’anela, mbwenye masiki dhawene iyene onogana ohing’wa dholezeliha. Iyene onowobiwa wi aje siyarhi vatakulu va mbali mwina venevo wawona attu ena ang’waga.
Kengesa Kohelét 7:16 na Roma 14:1, 10, mugamala mutanaalele nivuzo ntti:
-
Mowiwanana na maversu aba, txini egaganile okosa mbaliya? Weyo onakose eni ogakala na muttu onkosa dhilobo dhinnyagula mubuwelo wawo?
Onakose eni wi okaane dhogana dhaderetu?
1. Kamulobelele Yehova okumbiraga nikamihedho wi okane yokosa.—Tiago 1:5.
2. Kapepesa mBibiliani vina mmanivuruni mwehu wi ofwanye magano aniwanana na makaniya. Kaloga vina na Akristu oliba mpaddi womuyani.
3. Katanaalela yogana yawo enapatte dhavi mubuwelo wawo na mubuwelo wa attu ena.
ATTU ENA ANLOGA WI: “Egumiya jaga miyo ddinokosa ejile enfunimi, kaddintanaala esile dhinubuwela attu ena.”
-
Ninfwanyelela eni otanalela eniwamo Mulugu vina na attu ena mwaha wa makaniya?
OGWADDELA
Wi nikose dhogana dhapama jofuneya oziwa eniwamo Yehova mwaha wa makaniya vina otanaalela mukalelo onapattiwe attu ena na yogana yehu.
Kobuwela Dhisunziliwe
-
Onawodhe dhavi okosa dhogana dhinimuzivela Yehova?
-
Weyo onashagihe dhavi yubuwelo yawo?
-
Onatonyihedhe dhavi nriho mubuwelo wa attu ena?
TAMELÁ ONONELAMO DERETU
Onakose eni wi okane dhogana dhinalibihe mandano awo na Mulugu?
“Tome decisões que honram a Deus” (A Sentinela, 15 de Abril, 2011)
Konuwiha ononelamo wawo mwa esile dhinnitonyihedha Yehova mwaha wa malago aye.
Koona emukamihedhile mulobwana dhahi okosa yogana yorutxa.
Ninakose eni akala Yehova, kanlogamo mBibiliani enfwanyelihu okosa.
“Precisa sempre de uma ordem Bíblica?” (A Sentinela, 1 de Dezembro, 2003)
