Yezu ohiloga na anamafwara aye wi “nyuwo kamunkosa mpaddi wa elabo.” (Joau 15:19) Ohikosa mpaddi wa elabo—eniwanana na ohikosa mpaddi wa politika vina ohivivolotxihedha mukoddoni ya mwilaboni. Mwebaribari, kahiye yovevuwa ohikosa mpaddi wa elabo vowi attu ena anonibedda sabwa ya ejuwene. Ninawodhe dhavi okala attu ahinkosa mpaddi wa elabo vina oweddeyana na Yehova?

1. Monelo wa Akristu buvi mwaha wa alamuleli?

Akristu anowariha alamuleli. Neji anokosa ejile elogile Yezu “mumvahe Sésari eli yaye”—ejo enotonyihedha wi iyo ninowiwelela malamulo a elabo, ninga opitxa misoko. (Marko 12:17) Bibilia ononisunziha wi alamuleli anlamulela sabwani Yehova olowattiya wi alamulele. (Roma 13:1) Nona ninoziwa ttima ena alamuleli. Mbwenye awene kana ttima enimukwaranya Mulugu. Ninoziwa wi Omwene wa Mulugu bunagomihe makattamiho otene a mwilaboni.

2. Ninatonyihedhe dhavi wi kaninkosa mpaddi wa elabo?

Ninga Yezu, iyo kaninivivolotxa mpolitikani. Mudhidhi wonile attu matikiniho akosile Yezu, awene ahitamela omukosa mwene mbwenye iyene wahikoodda. (Joau 6:15) Sabwaya jani? Elogiliye vasogorho enonivaha yowakulaya “Omwene waga kuli wa mwilaboni-mpuno.” (Joau 18:36) Sabwa yokala anamafwara a Yezu, ninotonyihedha wi kaninkosa mpaddi wa elabo na mikalelo dhottiyana. Motagiha, kanindhowa okoddoni. (Kengesa Mikeya 4:3.) Ottiya ejo, kaninidda vina kaninkamihedha epaddi yina ya partidu, iyo ninotonyihedha nriho mwilaboni munkalihu—mbwenye kaninebedha bandera—vina kaninkosa dhilobo dhiniwanana na esene. (1 Joau 5:21) Esi mikalelo dhing’onovi dhintonyihedhihu wi nili attu oweddeyana—na Omwene wa Mulugu.

 KASUNZAVI

3. Akristu ebaribari kankosa mpaddi wa elabo

Yezu na anamafwara aye kakosa mpaddi wa elabo, nona iyo vina ninofwanyelela ofwara yotagiha yawa. Kengesa Roma 13:1, 5-7 na 1 Pedro 2:13, 14. Karumiha VIDIYU mugamala mutanaalele mavuzo aba.

• Txini ennittukulela wariha alamuleli?

• Ninatonyihedhe dhavi wi ninowawiwelela?

Mudhidhi wa koddo, malogo mena anologa wi kankamihedha koddo, mbwenye masiki dhawenevi omamalelowa awene anokamihedha makuru omeli a koddoya. Txini entapulela ohikosa mpaddi wa elabo? Kengesa Joau 17:16. Karumiha VIDIYU mugamala mutanaalele nivuzo ntti.

• Ohikosa mpaddi wa elabo entapulela eni?

Kito akala alamuleli anonikumbirha okosa elobo ehiniwanana na malamulo a Mulugu? Kengesa Merelo 5:28, 29.Karumiha VIDIYU mugamala mutanaalele mavuzo aba.

• Akala nlamulo na attu ninoniruma okosa elobo ehiniwanana na nlamulo na Mulugu, nlamulo gani ninfwanyelela iyo wiwelela?

• Onowodha wubuwela mudhidhi gani ohinfwanyelela Akristu wawiwelela alamuleli?

 4. Kakala muttu ohinkosa mpaddi wa elabo muyubuweloni vina mmereloni

Kengesa 1 Joau 5:21. Karumiha VIDIYU mugamala mutanaalele mavuzo aba.

• Mvidiyuni, txini yamuttukulele Ayenge ohikosa mpaddi wa partidu ya politika vina webedha bandera?

• Weyo onona ninga iyene ohikosa yogana yaderetu?

Dhilobo gani dhina dhigehile ohikosa wehu mpaddi wa elabo? Karumiha VIDIYU, mugamala mutanaalele mavuzo aba.

• Ninatonyihedhe dhavi wi kaninkosa mpaddi wa elabo ogaponyiwaga mpirha wa elabo yotene?

• Ninatonyihedhe dhavi wi kaninkosa mpaddi wa elabo akala dhogana dha muttu wa mpolitikani dhinonipatta?

• Dhilobo dhinvuruwanihu na attu ena vina mmanotisiani dhimpatta dhavi ohikosa wehu mpaddi wa elabo?

 OGWADDELA

Akristu anovilibihedha okala attu ahinkosa mpaddi wa elabo muyubuweloni, mmazuni vina mmereloni.

Kobuwela Dhisunziliwe

• Txini enfwanyelela iyo wavaha alamuleli?

• Ninfwanyelela eni ohikosa mpaddi wa elabo?

• Dhilobo gani dhigadhile weha ohikosa wehu mpaddi wa elobo?