NSUNZO 46
Ninfwanyelela Eni Oviperheka wa Yehova Vina Obatiziwa?
Yogana yamakamaka enfwanyelihu okosa mwigumi mwehu ja oviperheka wa Yehova. Iyo niniviperheka wa Yehova nigapikirelaga mmalobeloni mwehu wi ninfuna nimulabele iyene bahi vina nike efunelo yaye vamburoni voroma mwigumini mwehu. (Masalmo 40:8) Nigamala, ninobatiziwa. Mudhidhi ombatiziwa iyo, ninowatonyihedha attu wi nihiviperheka wa Yehova. Yogana ya oviperheka wa Yehova enotxinja egumi ya muttuya. Mbwenye txini enimuttukulela muttu okosa yogana yamakamaka ninga eji?
1. Txini enimuttukulela muttu oviperheka wa Yehova?
Ennittukulela operheka egumi yehu wa Yehova okwela. (1 Joau 4:10, 19) Bibilia onloga: ‘Omukwele Yehova Mulugu wawo, na murima wawo wotene, na ttontto yawo yotene, na guru dhawo dhotene.’ (Marko 12:30) Ninatonyihedhe wi ninomukwela Mulugu, ottiya na mazuvi bahi mbwenye na merelo ehu. Dhahene ninga attu eli ankwelana anofiyedha otelana, na mukalelo wakakene omukwela wehu Yehova ononittukulela oviperheka wa iyene vina obatiziwa.
2. Mareliho gani a Yehova anakela attu agabatiziwa?
Weyo ogamala obatiziwa, onoroma okosa mpaddi wa anamudhi owagalala a Yehova. Mwavenevo weyo onoroma wona okwela waye na mikalelo dhottiyana vina onodhowa buganfiyedha iyene. (Kengesa Malakiya 3:16-18.) Ottiya okanavi Yehova ninga babi, weyo onele okana abali na arogora orugunuwa elabo yotene, attu animukwela Yehova vina anukwela. (Kengesa Marko 10:29, 30.) Mwebaribari, ohinatti obatiziwa dhikalawo dhilobo dhinfwanyeleliwe okosa. Enofuneya osunza mwaha wa Yehova, omukwela iyene, vina omuroromela mwanaye, Yezu. Omamalelowa, onovivelela wa Yehova. Ogafwara ttarho esi vina obatiziwa, onele okana gari ya okalawo na mukalakala. Nzu na Mulugu ninloga: ‘Obatizo . . . onowuvunani.’—1 Pedro 3:21.
KASUNZAVI
Koona ekalelani yamakamaka weyo oviperheka wa Yehova vina obatiziwa.
3. Iyo notene ninofwanyela omusakula onfunihu omulabela
Nsaka na wale, attu ena a nlogo na Izrayel annubuwela wi yanwodheya omulabela Yehova, mudhidhi wakakene amulabelaga mulugu wohikala webaribari Baal. Mbwenye Yehova wahimuruma namavuhulela waye Eliya wi atonyihedhe wila dhakosani dhali dhabure. Kengesa 1 Amwene 18:21, mugamala mutanaalele nivuzo ntti:
-
Yogana gani egakosile ana Izrayel?
Dhahene ninga ana Izrayel, enowodheya iyo vina ogana bani onfunihu omulabela. Kengesa Luka 16:13, mugamala mutanaalele nivuzo ntti:
-
Attu ena anubuwela wi enowodheya omwebedha Yehova mudhidhi wakakene ebedhaga dhilobo dhina. Ekaleleni yabure?
-
Ninamutonyihedhe dhavi Yehova wi nihigana omulabela?
4. Katanalela okwela onutonyihedha Yehova
Yehova ohinivaha mivaho dhaderetu vaddiddi. Txini enanvahe iyo? Karumiha VIDIYU.
Yehova ontonyihedha dhavi wi onowukwela? Kengesa Masalmo 104:14, 15 na 1 Joau 4:9, 10, mugamala mutanaalele mavuzo aba:
-
Mivaho gani dha Yehova dhilitxi dhamakamaka mwa weyo?
-
Wakela mivaho esi dhinuttukulela omona dhavi Yehova?
Weyo wahiromaga wakela nvaho wottiyile wowagalalene? Txino wahimutamaalela muttuya wovahile nvahoya. Kengesa Olibiha 16:17, mugamala mutanaalele nivuzo ntti:
-
Otanaalelaga mivaho dhotene dhuvahile Yehova, enuttukulela okosa eni?
5. Oviperheka wa Yehova onodhana mareliho menji
Attu enji anubuwela wi ovuwa, okana ganyo yaderetu obe okana kobiri gwé onodhana wagalala. Ejoya ebaribari? Karumiha VIDIYU, mugamala mutanaalele mavuzo aba.
-
Masiki vakwela Adrey mpirha, txini yamuttukuleli ottiya oponyawa?
-
Iyene ohiviperheka wa Yehova attiyaga oponya mpirha. Weyo onubuwela wi iyene wahikosa yogana yaderetu? Sabwaya jani?
Murumiwi Paulo ahinakale Mukristu, iyene wahikana dhotedhene dhigamuttukuleli okana ganyo yaderetu. Iyene wahisunza malamulo o Juda na namasunziha wovuwa vaddiddi. Mbwenye Paulo wahittiya dhotedhene mundduni wi akale Mukristu. Paulo wahitxinuwa na yogana yakosiliye? Kengesa Filipi 3:8, mugamala mutanaalele mavuzo aba:
-
Txini emuttukulele Paulo ologa wi dhotene dhakosiye ahinakale Mukristu dhali ninga “dhotakala dhingubeliwa vazunguni”?
-
Txini yakeliliye sabwa ya dhilobo dhittiyiliye mundduni?
-
Weyo onona ninga egumi yawo enele okala deretu ogagana omulabela Yehova? Onlogelani dhawene?
Sabwa ya okala Mukristu, Paulo ohakela dhilobo dhinji mottiyana na esile dhattiyiliye mundduni
ATTU ENA ANLOGA WI: “Miyo ddiziwa wi ejiya ebaribari, mbwenye kaddinakose yogana ninga ejene.”
-
Oviperheka wa Yehova ekaleleni elobo yamakamaka mwa weyo?
OGWADDELA
Okwela ononittukulela operheka egumi yehu wa Yehova vina obatiziwa.
Kobuwela Dhisunziliwe
-
Txini ennittukulela omukwela vina omwebedha Yehova?
-
Mareliho gani anavaha Yehova adhari aye abatiziwe?
-
Ogahiziveliwa ovivelela wa Yehova?
TAMELÁ ONONELAMO DERETU
Nameba wa opera na namattamaga aganelini operheka egumi yawa wa Yehova.
Azombwe Anovuza—Txini Enakosimi Na Egumi Yaga?—Ddang’anaga dha Mundduni (6:54)
Koona mwaha dhina dhinauttukulele oviperheka wa Mulugu.
“Porquê dedicar-se a Jeová?” (A Sentinela, 15 de Janeiro de 2010)
Mvidiyuni mpu koona wagalala ona abale aperhekile egumi yawa wa Yehova.
Kengesa mitoma “Eu perguntava-me: ‘Porque estamos aqui?’” wi wone txini yamuttukuleli muyana otanalela dhigaromiliye wika vamburoni voroma.
