Muttu-muttu wa iyo, ohikana monelo waye sabwa ya wabala vina ovisasanyedha. Mbwenye ohikala magano a Bibilia annikamihedha wabala esile dhinziveliwihu nimwagalalihaga Yehova. Ndoweni noone maganoya abo.

1. Txini enanikamihedhe osakula mwabalelo na onvisasanyedha wehu?

Nili alabeli a Yehova, ninofwanyela okalaga wokoddelene vina ‘wabalaga mofwanyelela-mwene,’ nigakosa dhawene ninotonyihedha ‘omuttittimiha wehu Mulugu.’ (1 Timóteo 2:9, 10) Koona magano aba manai: (1) Dhabalo dhehu dhinofwanyela okala “dhoriheya.” Txino weyo wahiroma wona wi mmatugumanoni a Anamoona a Yehova attuya anowabala mottiyana-mwene. Mbwenye guwo dhehu vina mugwaddelo wehu wa mattitti, onowoniha wi ninomuriha Mulugu wehu Yehova. (2) Dhowabala dhehu dhinofuneya okala “dhofwanyelela” obe kadhikale guwo dhinattukulela attu ena onang’anaga. (3) Ninotonyihedha wi nihikana “mubuwelo wapama,” nigahifwarege mwabalelo wa elabo. (4) Mwabalelo wehu onofwanyela “omuttittimiha Mulugu,” nitonyihedhaga wi ninimwebedha Mulugu webaribari.—1 Korinto 10:31.

2. Mukalelo wehu wowabala onapatte dhavi abalihu?

Ebaribari wi ninofwanyela osakula guwo dhinfunihu wabala, mbwenye enofuneya otanalela vina attu ena ampatteya dhavi. Jofuneya okosa guru wi nihanyimule attu ena, ottiya ejo, ‘ninfuna nire enimuzivela muttu mwina, wi nimunuwihe munroromeloni.’—Kengesa Roma 15:1, 2.

3. Mwabalelo wehu onavahe dhavi onamoona waderetu mwaha wa Yehova?

Ninofwanyela wabala deretu mudhidhi wotene, ttabwa-ttabwa nigadhowaga omatugumanoni vina mmabasani a olaleya. Kaninfuna wi guwo dhehu dhivahe onamoona wabure onattukulela attu opwaza miselu dhinawaddelihu. Ottiya ejo ninfuna wi dhabalo dhehu dhiwodhe ‘ottittimiha masunziho a mmvulumutxi wehu Mulugu,’ nattukulelagavi attu osunza sabwa ya Yehova.—Tito 2:10.

 KASUNZAVI

4. Nigabala deretu ninotonyihedha wi ninomuriha Yehova

Eloboya yamakamakaya ennittukulela ozuzumelaga wabala wehu jivi? Kengesa Masalmo 47:2, mugamala mutanaalele mavuzo aba:

• Iyo ninttukula nzina na Yehova. Ejo empatta dhavi mwabalelo wehu?

• Onona ninga ninofwanyela ozuzumela wabala wehu nigadhowaga omatugumanoni obe mmabasani olaleya? Sabwaya jani?

 5. Ninawodhe dhavi okosa dhogana dhaderetu mwaha wa ovisasanyedha vina wabala

Karumiha VIDIYU.

Guwo dhehu kadhinfwanyela okala dha kobiri gwé, mbwenye dhokoddela vina dhofwanyelela. Kengesa 1 Korinto 10:24 na 1 Timóteo 2:9, 10. Mugamala mutanaalele sabwa ya wabala guwo . . .

• dhohifwanyelela.

• dhojeddeguwa, dhogwaddeya, dhowoneyela obe dhohikala.

Masaka a Mundduni, Yehova wahivaha nlogo naye malamulo menjene amulabihedhaga Mizé. Akristu a masaka abano kanfwanyela wiwelela malamulo aba, mbwenye anonisunziha venjene ejile oniwamo Yehova. Kengesa Olibiha 22:5, mugamala mutanaalele nivuzo ntti:

• Ninfwanyelelani orabela mikalelo dha wabala vina ogwadda nttitti dhinimukosiha mulobwana okalaga ninga muyana vina muyana okalaga ninga mulobwana?

Kengesa 1 Korinto 10:32, 33 na 1 Joau 2:15, 16, mugamala mutanaalele mavuzo aba:

• Ekaleleni yaderetu ovivuza: Mwabalelo waga onomusilidha muttu mmulogoni obe mmuruddani munkalimi?

• Mmuruddani munkaliwe, attuya anabala dhavi?

• Onoona ninga egahikala yaderetu Mukristu wabala dhawene? Sabwaya jani?

 OGWADDELA

Nigakosa dhogana dhaderetu mwaha wa ovisasanyedha vina wabala, ninotonyihedha wi ninomuriha Yehova vina attu ena.

Kobuwela Dhisunziliwe

• Sabwaya jani ovisasanyedha wehu vina wabala okala wamakamaka vamentoni va Yehova?

• Magano gani a Bibilia ananikamihedhe wona mukalelo wa ovisasanyedha vina wabala?

• Mwabalelo wehu onavahe dhavi onamoona waderetu obe wabure mwaha wa Yehova?