NSUNZO 59
Kavilela Ogafwara-fwariwaga
Ovanene obe musogorho Akristu otene anojedhela widdiwa vina ofwara-fwariwa. Ninofwanyela wova sabwa ya ejuwene?
1. Ninfwanyelelani ojedhela ofwara-fwariwa?
Bibilia onloga: “Etene anfuna wiwananeyana na Mulugu, aluwelana na Yezu Kristu, anofwanya widdiwa.” (2 Timóteo 3:12) Yezu wahifwara-fwariwa sabwani kakosa mpaddi wa elabo ya Satana. Iyo vina kaninkosa, nona kanintikina nigafwara-fwariwaga na emeleli a marelijiau vina alamuleli a elabo ejino.—Joau 15:18, 19.
2. Ninawodhe dhavi ovisasanyedha wi nivilele ofwara-fwariwa?
Ovanene, ninofwanyela olibiha nroromelo nehu na Yehova. Katamela mudhidhi wi olobelege vina omwengesege Bibilia malabo otene. Kadhowaga omatugumanoni mudhidhi wotene. Okosa esuwene dhinowuvaha guru wi ovilele ofwara-fwariwa na oliba murima masiki akala ba amudhawo anufwara-fwara. Murumiwi Paulo ofwara-fwariwe venjene, ohiloga: ‘Yehova ddinddikoya, kaddinova elo.’—Ahebreu 13:6.
Mukalelo mwina wa wenjedhedha oliba murima wehu bwa obudduwaga mmabasani olaleya mudhidhi wotene. Olaleya onowenjedhedha omuroromela wehu Yehova vina onikamihedha ohawova attu. (Gano 29:25) Nigaliba murima mmabasani olaleya ovanene, ninele okala omala na wale wi nidhowegevi banigalaleya masiki alamuleli akooddihaga mabasa ehu.—1 Tesalónika 2:2.
3. Ovilela nigafwara-fwariwaga onnikamihedha dhavi?
Kavo onziveliwa ofwara-fwariwa, mbwenye nigavilelaga nroromelo nehu ninele olibavi. Ninokala ofiyedheyene na Yehova, sabwani ninowona na dhotagiha dhehu guru dhinnivahiye nigonaga wi kaninwodha vina. (Kengesa Tiago 1:2-4.) Yehova kanziveliwa aganonaga nitabuwaga, mbwenye nagavilelaga iyene onoziveliwa vaddiddi. Bibilia onloga dhahi: “Mugasoseliwa dhapama dhirilenyu, mvílela, munomuziveliha Mulugu.” (1 Pedro 2:20) Abale otene anvilela, Yehova onele wavaha egumi yamukalakala mwilaboni muhinaakale ofwara-fwariwa.—Mateu 24:13.
KASUNZAVI
Koona ekalelani yowodheya omuroromela Yehova masiki nigafwara-fwariwaga, koona vina mareliho anakelihu nigakosa ejuwene.
4. Enowodheya okwaranya ofwara-fwariwa wa anamudhi
Yezu wanziwelamo deretu wi anamudhi ena kagafunile wi nimulabele Yehova. Kengesa Mateu 10:34-36, mugamala mutanaalele nivuzo ntti:
-
Txini endaga opadduwa akala muttu mmodha wa anamudhi ahinimulabela Yehova onogana omwebedha?
Wi wone yotagiha modha, karumiha VIDIYU, mugamala mutanaalele nivuzo ntti.
-
Txini egakosile weyo kowiliwa ninga mwanamudhi obe marho wawo onotamela wuttiyiha omulabela Yehova?
Kengesa Masalmo 27:10 na Marko 10:29, 30. Mugamala wengesa nlebo nimodha-nimodha, mutanaalele nivuzo ntti:
-
Nipikirelo ntti, ninanikamihedhe dhavi ovilela ofwara-fwariwa wa anamudhi vina na amarho ehu?
5. Kadhowavi omulabelaga Yehova masiki na ofwara-fwariwa
Enofuneya oliba murima wi nimulabele Yehova masiki attu ena atamelaga onittiyiha okosa ejuwene. Karumiha VIDIYU, mugamala mutanaalele nivuzo ntti.
-
Dhotagiha dha mvidiyuni mpu, dhinlibiha dhavi nroromelo nawo?
Kengesa Merelo 5:27-29 na Ahebreu 10:24, 25. Mugamala wengesa nlebo nimodha-nimodha, mutanaalele nivuzo ntti:
-
Ekaleleni yamakamaka odhowavi banigamulabela Yehova masiki mabasa ehu olaleya vina otugumana agakoddihiwaga?
6. Yehova onele wukamihedha ovilela
Anamoona a Yehova a vyaka dhottiyana, anodhowavi amulabelaga Yehova wororomeleyene, masiki nofwara-fwariwa. Wi ononelemo enakamihedha abali aba, karumiha VIDIYU. Mugamala mutanaalele nivuzo ntti.
-
Mvidiyuni, txini yakamihedhile abali ovilela?
Kengesa Roma 8:35, 37-39 na Filipi 4:13. Mugamala wengesa nlebo nimodha-nimodha, mutanaalele nivuzo ntti:
-
Malebo aba, anlibiha dhavi nroromelo nawo wi owodhe ovilela ogafwara-fwariwaga?
Kengesa Mateu 5:10-12, mugamala mutanaalele nivuzo ntti:
-
Onawodhe dhavi ohagalala masiki ogafwara-fwariwaga?
Matxikwi menjene a adhari a Yehova ahiwodha ovilela ofwara-fwariwa. Weyo vina onele owodha!
ATTU ENA ANLOGA WI: “Miyo kaddigawodhile ovilela ofwara-fwariwa.”
-
Nlebo gani nigamukamihedhile muttu oddo oliba murima?
OGWADDELA
Yehova onovaha ttima guru dhehu dha omulabela masiki na ofwara-fwariwa. Iyo ninowodha ovilela!
Kobuwela Dhisunziliwe
-
Akristu anfwanyelelani ojedhela ofwara-fwariwa?
-
Onakose eni ovanene wi okale womala na wale ofwara-fwariwa ogaroma?
-
Txini enawukamihedhe oziwa wi enowodheya omulabela Yehova masiki nifwara-fwariwaga?
TAMELÁ ONONELEMO DERETU
Koona nikamihedho nivahiwe mbali na Yehova wi avilele mudhidhi wafugeliwiye sabwa ya ohikosa mpaddi wa elabo.
Koona yakamihedhile atelani dhahi, omulabela Yehova wororomeleyene mwari mwa vyaka dhinji dha ofwara-fwariwa.
Koona enawukamihedhe oliba murima ogafwara-fwariwaga.
“Ovisasanyedhe Ovanene Ohinatti Ofwara-Fwariwa” (Mwang’aneli, Julyu 2019)
Koona sabwaya jani ehinfwanyelelihu otikina nigafwara-fwariwaga na anamudhi. Ejo egapadduwa txini enawukamihedhe okana murenddele vina odhowavi omulabelaga Yehova na ororomeleya?
“Ebaribari Enodhana ‘Widdana Ottiya Murenddele’” (Mwang’aneli, Outuburu 2017)