Yehova osakula mburo wakuweliwa Edeni okosavo mundda. Munddaya wahikaana marhuwa, na dhinama. Mulugu ottukula mbwebwe ohuba ovudhela mpunoni, ompaddutxa mulobwana woroma, Adamu. Onoziwa yapadduwile? Mulobwanaya wahidha okala muttu wokalawo! Yehova omwira mwang’aneli wa mmunddani, omwaddela wi avahe mazina dhinama dhotene dhilimo.

Yehova ohinvaha Adamu mabasa aderetu. Ompangile dhahi: ‘Ojege milima dhotene dhinoniwe, mmodha bahi bunakoddiwe oja. Ogaja onokwa.’

Mohigonela, Yehova ologa: ‘Ddinfuna ddimusasanye mukamihedhi ddinvahe Adamu.’ Ohinvaha Adamu tturho enddimuwa, Adamu ogona rutu, Yehova ottukula baru modha, omusasanya muyana onvaha Adamu. Nzina naye wali Eva. Adamu na Eva baromile omaga murala.  Adamu wahiziveliwa na muyanaya? Iyene wahisanzaya vaddiddi ofiyedha ologa: ‘Yehova oddisasanyela mukwaga wa mmakuvani mwaga. Ovano mbwenye! Oddu onoligana na miyo.’

Yehova ohimpanga Adamu na Eva wi, akane aima adhalihe elabo ya vati. Iyene wafuna wila aweneya asanzaye alabe mabasa etene akose elabo ekale paraizu, obe akoddelihe ninga mwakaleli mundda wa Edeni. Mmalelani dhilobodha kadhipulile ninga mwafuneliwani. Sabwaya? Kapitulu endawo ninele osunza yapadduwile.