Ester wali namwali wa Muyuda wakala o Pérsia muttette w’o Suza. Vyaka dha mundduni, Nabukodonosor wela wattukula amudhi a Ester badhowana o Pérsia. Iyeneya waleliwe na titiyu waye Mardokeu wali mukamihedhi wa Mwene Asuwero w’o Pérsia.

Mwene Asuwero wamutamela musano muswa. Noona, anamalaba aye amudhelana anamwali okoddela-koddela a mwilaboni, Ester wali mmodhaya. Anamwali otene asakuliwe, mwene odhile omuttukulavo Ester bakala musano waye. Mardokeu wahimpanga Ester wi ahimwaddele wila wali Muyuda.

Wasogorhela elaboyá wali mulobwana dhahi wovittukulela watxemerhiwa Haman. Iyene wafuna wila attu otene amukokorelege. Mardokeu kafunile esiwene, Haman batakuneya murima bagafuna ompa. Moneliye wila Mardokeu wali mukadda Judá, wahitamela wapa Ayuda otene ali o Pérsia. Iyene wahimpanga mwene dhahi: ‘Nlogo na akadda Judá ttawopiha; mwape otene.’ Asuwero bamwakula: ‘Kerana nlogona ntto enfunewe,’ nomala banvaha guru y’ofugula nlamulo. Haman ofuguliha nlamulo naloga wi akadda Judá otene apiwe nigafiya siku na 13 mweri wa Adar. Dhetene eso dhipadduwaga, Yehova wela wona.

Ester kaziwa dha nlamulo niswa. Mardokeu ddanvahedhi nipapi na nlamuloná, ologana: ‘Dhowá wamwaddele mwene.’ Ester omwakula: ‘Muttu ddi muttu onvolowa ntakulu na mwene ahikuweliwe, ddopiwa. Abano malabo 30 miyo ddihinettaniwa na mwene! Masiki dhawene ddinodhowa. Agafuna oddipa, addipe.’

Ester odhowa omuttegoni wa mwene. Mweneyá mmoneliye, ovenyiha fibo yaye. Ester onfiyedha, nanda mweneyá  omvuza: “Ester, onfuna nni?” Ester omwakula: ‘Ddinfuna ddabuno mudhé na Haman, vani-vaga.’ Ajaga, Ester omukumbirha mwene na Haman wi eyele wili. Veyelilani, mwene omvuza wili Ester eraga: “Musano Ester, onloba nni?” Iyene omwakula: ‘Nimala ogulihiwa ninfuniwana opiwa, miyo na nlogo naga. Nivuneni Mwene’. Mwene omvuza Ester: ‘Oddoyá onfuna wupani bani?’ Ester omwakula: ‘Mwiddaniyá ddi Haman oddu muttu wabure.’ Mwene osilidhiwa ofiyedha ompiha Haman sikunene nttile.

Kaliwo wawodha okurumula nlamulo na Haman, masiki mwene. Noona, mwene wahimuttoma Mardokeu okala munddimuwa vina banvaha guru y’owita nlamulo niswa. Mardokeu wahifugula nlamulo narumeeliha akadda Judá wi avibarele agabeddegeliwa. Vafiyelani siku 13 na mweri wa Adar, Ayuda ahagonjiha amwiddani awa. Oromana venevo, aroma wubuwela opemberha wawa yaka-yaka.