Omattiyu dhahi Mwene Nabukodonosor wahiroha dhilobo dhotikiniha. Dharohiliye dhali dhilobo dhamunyonyile mpaka okana yadha. Iyene ohakuweliha aziwetxi aye, ohawaddela: ‘Kadditapuleleni dhirohilemi.’ Awene amwakula: ‘Nyuwo mwene, murome onaddela dhirohilenyudha.’ Iyene ohawiyihedha: ‘Nne! Mugahiddaddela dhirohilemi, ddinoupani.’ Awene amwakula wili: ‘Munaddele dhirohilenyu wi iyo niwodhe otapulela deretu.’ Iyene ohawakulavi: ‘Mwetene munfuna mukose mavurhano na miyo. Kaddipangeni erohilemi!’ Awene agwadda: ‘Kavo muttu onwodha okosa enkumbirhenyu. Ejo elobo yorutxa.’

Nabukodonosor onyaguleya, mpaka ologa wila onowapa otene. Mwa aboya, ahikalamo Daniyel, Sídrak, Mizak na Abdenago. Daniyel omukumbirha mwene wi anvahe mudhidhi. Nomala, iyene na amarho aye amuloba Yehova enonelo wi akamihedhe. Yehova ohawakula?

Yehova omoniha vina omutapulela Daniyel murohani dhetedhene dharohile Nabukodonosor. Mmangwananimwá, Daniyel ohinfiyedha mwimeleli wa mwene ologana: ‘Muhape aziwetxi enyu. Miyo ddinowodha omutapulela mwene dhirohiliye.’ Mwimeleliya omudhowana Daniyel vali mwene Nabukodonosor. Daniyel ologa dhahi: ‘Mulugu ohuvitulelani dhinfuna opadduwa musogorho.’ Dhirohilenyu sisi: ‘Nyuwo muhona egamuttu yawopiya, yana musorho wanddarhama, juga na myono dha parata, erugulu na muyununimwá mwasafurhi, myeddo dha mujila, manyalo aye ali epadde modha ya mujila, yina ddongo. Mwang’anagavi esidhá, omwangoni ogomowa mwarha ohiligiwe odhile opida manyalo a nladdaniho-ntto. Nladdanihona nitxileya ttikala  mbwebwe onvava na pevo. Mwarhaya okala mwango munddimuwa, odhalile elabo yotene.’

Osogorhowa Daniyel ogwadda: ‘Ensiba dhirohilenyu jiji: Omwene wenyu, buli musorho wanddarhama. Parata, omwene onfuna odha musogorho. Vina vanele okala mwene onligana na safurhi onfuna olamulela elabo yotene. Omwene onafwarelevo onele ovadda ninga mujila. Omamalelowa omweneya onele ogaweya, dhipaddi dhina dhikale dhovadda ninga mujila oku dhina dhawobana ninga ddongo. Mwarha ogomowile omwangoni onsiba Omwene wa Mulugu. Onele wanyenyeretxa amwene otene a mwilaboni.’

Nabukodonosor omottela osogorho wa Daniyel ohira labá. Ologa: ‘Ddi Mulugu wawo wuvituleli dhirohilemi. Kavo Mulugu mwina onligana na iyene.’ Nabukodonosor ottiya ompa Daniyel, iyene omwira munddimuwa wa aziwetxi otene a mBabilónia. Yehova wahakula malobelo akosile Daniyel!