Yehova omusakula Jeremiya wi akale namavuhulela wa nlogo na Judá. Iyene omwaddela wi àlaleye attu vina awaddele wi attiye wira dhilobo dhabure. Jeremiya ohakula: “Nabuya Mulugu, miyo kanddinwodha aloga. Sabwa ddili mima.” Yehova omwakula: ‘Onove elo. Miyo ddinouwaddela enfunewe ologa. Ddinele oukamihedha.’

Yehova omwaddela Jeremiya wi agumanihe anddimuwa otene a nlogo, atwe vamentoni vawa biya ya ologo, agamala aloge: ‘Jeruzalemi onele otweya ninga biya eji ya mattaka.’ Jeremiya mwireliye dhetene dhamwaddele Nabuya, anddimuwa a nlogo anyaguleya vaddiddi. Namakutta munddimuwa wettaniwa Pasuri omvada Jeremiya nanda omfugeliha mukambura. Jeremiya kawodha oviddiginya omattiyu wantero. Pasuri mmutapuleliye Jeremiya mmambesinimwá, Jeremiya ologa: ‘Kaddinira vina. Ddinottiya olaleya muttaka obu.’ Koddi iyeneya ottiya wene olaleyawa? Nne. Jeremiya mubuweleliye wili, ologa dhahi: ‘Muselu wa Yehova oli ninga elala ya motto mmirimani mwaga. Kaddinatxelele olaleya.’ Jeremiya katxelele walaleya attu.

Mvirelani vyaka dhing’onovi wahikala mwene muswa mu Judá. Anamakutta na anamavuhulela ottambi, kaziveliwa na muselu walaleya Jeremiya. Awene adhowa wawaddela emeleli: ‘Jeremiya apiwe.’ Jeremiya ohakula: ‘Mugaddipa miyo munimpa muttu wottikitteliwa. Mazu anuwaddelanimi ba Nabuya kahiyo aga.’ Emeleli mwiwalani mazu a Jeremiya, aloga: ‘Muttu addu kamumpe.’

Anamakutta asilidhiwevi, Jeremiya kattiyile olaleya. Awene  amukumbirha mwene wi Jeremiya apiwe. Mweneya ohawakula wi awene akosena Jeremiya enfunani. Amuttidda Jeremiya, amvokedha muntxelani noririmela mwadhali marove, obuwelaga wi akwele mwenemwale. Jeremiya oroma oririma mmarovenimwá.

Nomala Ebed-Melek munddimuwa wa rhuwani ya mwene odhowa omwaddela mwene dhahi: ‘Anamakutta amvokela Jeremiya muntxelani! Nigamuttiya mwenemwale onokwa.’ Mweneya omwaddela Ebed-Melek wi attukule alobwana 30, adhowe anburutxe Jeremiya mutxelani. Iyo nikale ninga Jeremiya, sabwa yowi iyene kattiyile olaleya.