Niyelele vyaka dhing’onovi mundduni. Nehemiya wali mw’Izrayel wamulaba Mwene Artaserse, wakala o Pérsia sidadi y’o Suza. Mbali wa Nehemiya wakala o Judá wahidhana miselu dhokubanyiha dhaloga dhahi: ‘Attu eyeleli o Jeruzalemi kaana nibarelo. Ngome dha sidadi dhagujulile akadda Babilónia kavo omagihile wili’. Nehemiya okubanya. Wafuna wila adhowe o Jeruzalemi akamihedhe, noona ahinatti, wamuloba Mulugu wila mwene amuttiye odhowa.

Musogorhomwa, mwene omoona Nehemiya na kove yokubanya vaddiddi. Onvuza: “Ddinuwona wokubanyene, onna nni?” Nehemiya ohakula: ‘Kopeni mwene, Jeruzalemi omala otolotxiwa ddinkodda dhavi okubanya?’ Mwene omvuza: “Wafuna ninga ddukosele nni?” Venevo, olobela womaalene momaguva. Nomala ologa: ‘Muddirume o Jeruzalemi ddavenyihedhe ngomedhá.’ Mwene Artaserse omuttiya Nehemiya odhowa, nanda omwaddela wila onoweddeleya deretu. Mwene omwira Nehemiya guvernadoro vina onvaha miri wi amagihena misuwodha.

Nehemiya mufiyedhiye o Jeruzalemi oromile weddeddiha ngome dha sidadiya. Nomala oagumaniha anamakutta vina anamattonga ohawaddela: ‘Dhipadduwile dhittabwa. Ndoweni nivenyihedhe ngome.’ Attuyá arumeela, aroma ovenyihedha ngomedha.

Neji amwiddani a akadda Izrayel aroma ologa dhahi: ‘Ngomeyá kivaddile, munyinga agalupela enovagareya.’ Anamamagaya katanalawo, adhowa amagagavi. Ngomeyá yamagiwa yahiroma wunuwa vina oliba.

Amwiddaniya antamela marhe owarurumutxana afunaga odhela epaddi-epaddivi wi amutolotxe Jeruzalemi. Akadda Judá vewalani aroma ojeriheya. Venevo Nehemiya oawaddela eraga: ‘Kamwawove. Yehova oli na iyo.’ Iyene ohattoma attu wi awang’anelege anamalabaya anadhe olupeliwa na amwiddani awa.

 Mwa malabo 52 bahi, ngome na misuwodha dhahimala omagiwa. Mmalelani, Nehemiya owakuweliha Aleviti otene wi aje mattanga. Iyene wahagawa makuru meli a anameba. Awene ahiwela nikodde na numba, yang’anana Ntxela n’o Gate, ahiroma owerewera sidadi yotene. Aroma omoba parhaza na sirhibo vina yambi, amwibelaga Yehova. Ezdra wahidhowa na nikuru nimodha, Nehemiya badhowa na nikuru nina mpaka ogumana vari va mparha. Nlogo notene—alobwana, ayana na aimaya—amperhekela Yehova mukutto. Ekuwelo yakuwani yanniweya udayi-wene.