Mukweli Nabukodonosor, omuhabile mpaddo ddi mwanaye Baltazar. Siku dhahi, iyene ohawobela mattanga anddimuwa txikwi amwilaboni mwaye. Nomala, odhoweliha vyobo dhanddarhama, dhaparata dhattapattile babe Nabukodonosor mumparhani w’o Jeruzalemi. Iyene na aleddo aye amwela mu vyobonimwá, amwaga, annattittimiha amilugu awa ebewene. Venevo, mba mwajani dhihoneya vibuno dhaleba erugu mazu ohiziweleyamo.

Moneli Baltazar, ottiddiwa wova. Ohakuweliha akumbayisa na aziwetxi, ohilibela dhahi: ‘Muttu onawodhe otapulela mazu aba, ddinomwira mwene wanoraru mpuno mBabilónia.’ Otene, kavo owodhile otapulela mazuyá. Nomala musano ovolowa, nanda ogwadda dhahi: ‘Mpuno muhikala muttu onittaniwa Daniyel, wamutapulela dhilobo babinyu Nabukodonosor. Iyene onowodha outapulelani mazu aba.’

Daniyel ovolotxiwa vamentoni va Mwene. Baltazar ologana: ‘Ogawodha wengesa mazu aba, odditapulela, miyo ddinowuvaha mukufu wanddarhama, ddinowira mwene wanoraru.’ Daniyel omwakula: ‘Miyo kaddinfuna dhinddivahinyu, masiki dhawene, ddinele oaddelani ensiba mazu aba. Babi wenyu Nabukodonosor walivi muttu wovittukulela, Yehova wahimuyeviha. Nyuwo mwene monoziwa dhetene dhampadduweli, masiki dhawene, mudhoweliha vyobo dhanddarhama dha mumparhani, mumwelamo, kanfunile omuttittimiha Yehova. Nona, ddi Mulugu olebile mazu aba dhahi: “Mené, Tekél, Farsín.” Mazuya aba antapulela wi akadda Média na akadda Pérsia, anele omuttukula Babilónia, vina anowakani omweneya.’

Muttette wa Babilónia woneya niga kunawodheye ogujuliwa. Wali vari va mwinje vina wahikana ngome  dhovadda. Omattiyuyá obule, akadda Média na akadda Pérsia attukula muttetteya. Mwene w’o Pérsia, Siro otiba mukorhopa mwavira manjeya mpaka wuma, nanda anyakoddo aye avira, afiya vamulago. Mfiyelani afwanya misuwo dhofuguwa dhene! Anyakoddoya avolowa, agujula muttetteya ampa mwene. Siro okala mwene w’o Babilónia.

Mwari mwa yaka modha, Siro olaleya dhahi: ‘Yehova oddipanga wi ddivenyihedhe mparha w’o Jeruzalemi. Nyuwo malogo, onfuna wi akamihedhe, adhowe.’ Ninga mwattageli ologa Nabuya, Ayuda enjene ahiyelela o Jeruzalemi sivirile vyaka 70 dhonongeya. Siro vina ohavaha akadda Judá vyobo dhanddarhama dhattukulile Nabukodonosor o Jeruzalemi adhowana o Babilónia. Apa ninowona wila Yehova omulabihedha Siro wi akamihedhe nlogo naye.