José na Maria akala o Nazareti na anaye otene a alobwana vina ayana. José wasapela muralaye alabaga mabasa a osema, nanda wannasunziha amudhaye otene Nlamulo na Yehova. Amudhiyá andowaga o sinagoga mudhidhi wotene wa webedha vina andowa o Jeruzalemi wi amuje Paskwa wa vayakani.

Yezu vaniye vyaka 12, amudhaye adhowa o Jeruzalemi ninga mwalemelelani. Musidadimwa mwahidhala attu adhowile omuja Paskwa. Nomala José na Maria aroma oleddo w’owiyelela owani-wawa, obuwelaga wi Yezu wali na awene. Mururumuwelani, avuza amudhiwa nanda ela kamooni Yezuyá, ahunddeya guru.

Ahiyelela o Jeruzalemi, aakalawo malabo mararu amutamelaga mwanawa. Muhimoonelani, adhowa mumparhani, amoona Yezu bagilatile vari va anamasunziha magano, avuruwanaga vina akosaga mavuzo. Anamasunzihaya antikina venjene mavuzo akosa Yezu. Vina anundeya guru na dhowakula dhaye. Ahoona wila Yezu wanziwa Nlamulo na Mulugu.

 José na Maria ahirurumuwa vaddiddi. Maria baloga dhahi: ‘Mwanaga, nihuzuzumela vaddiddi! Wali wuvi?’ Yezu ohakula: ‘Kamwaziwa wila yanfuneya miyo okala mba mwa Baba?’

Yezu ohiyelela o Nazareti na ababe. José omusunziha mwanaye Yezu mabasa a osema. Weyo onubuwela wi Yezu bali muzombwe wali dhavi? Yezu onuwagavi, wanlagiha mirugu, oku attu otene vina Mulugu aziveliwagana.