Omadhelo wa nzuwa wa elabo ya Izrayel wakala aziwetxi obuwela wila neneri dhannaweddiha attu. Omattiyu alobwana dhahi adhela omadhelo wa Nzuwa ahona elobo yaligana na ttandda odhulu, mmalelani afwara. Neneriya yattukulela o Jeruzalemi. Aziwetxiya abo aroma ovuzela dhahi: “Ngani oku obaliwe mwene wa Ayuda ovanene kuvi? ‘Nidheli omwebedha.’”

Mwene Herodi ewaga mazu aba, orurumuwa vaddiddi. Iyene oavuza anamakutta eraga: ‘Mwana oddu obaliwe onfuna okala mwene wa Ayuda ol’uvi?’ Awene amwakula: ‘Anamavuhulela aloga wila onabaliwe o Belemi.’ N’eji Herodi ohakuwela aziwetxi ohawaddela: ‘Nyuwo mudhowe mwavuzele dha mima oddo. Muganfwanya mwiyelele okuno muddaddele. Miyo vina ddidhowe ddamwebedhe.’ Oku wela ozivala.

Neneri yemelile, eroma wedda wili. Aziwetxiyá afwara mpaka o Belemi. Neneriya ehimela vadhulu va numba, awene ovolowa mbamwá. Anfwanyile Yezu na maye, Maria. Amuworamela mwanayá amvaha mikono dhawa dhali nddarhama lubani na mira. Koddi, abayá warumile wali Yehova-wene? Nne.

Mattiyu-ene abale, Yehova omoneyela José dhahi: ‘Herodi onfuna ampe Yezu. Muttukule mwadhiyo na mwanaya ottawele w’Ejipitu. Okalele wenewo mpaka miyo owaddela’. Momaguva-mwene José odhowa wʼEjipitu na muralaye wetene.

Yehova ohakoddiha aziwetxi wiyelela wali Herodi. Herodiya vaziwileyi wi aziwetxi abale aimpela malago, osilidhiwa vaddiddi. Vowi kawodhile onfwanya Yezu, iyene ottonga wi aima otene ali Obelemi ana edadi ya Yezu apiwe. Oku Yezu bamalile ottawihedhiwa wʼEjipitu.

 Movira wa mudhidhi, Herodi okwa. Yehova omwaddela José: ‘Ovano eyela.’ José, Maria na Yezu avenya ahiyelela w’Izrayel, adhowa omaga numba o Nazareti.