NSUNZO 80
Yezu Onowasakula Arumiwi Kumi N’eli
Muvirele yaka yantero na jiddiga Yezu bagalaleya, wahikala yosakula yaderetu yafuniye okosa. Bani afuniye wasakula wi alabege na iyene? Bani afuniye watxenjerhiha wi asogorhele mulogo wa Okristu? Wi asakule attuya, Yezu wanfuna nikamihedho na Mulugu. Noona iyene wahivenya badhowa omwangoni, wenewo waliye yeka wi alobele omattiyu wantero. Mumenbesinimwá, Yezu ohakuwela anamafwaraye otene, ohasakula arumiwi 12. Onowubuwela mazina awa? Mazinawaya baba: Pedro, André, Tiago, Joau, Filipe, Bartolomeu, Tomé, Mateu, Tiago mwana Alfeu, Tadeu, Simoni na Juda Iskariote.
André, Pedro, Fillipe, Tiago
Otene aba kumi n’eli anninfwara Yezu mwetemwene mwaviriye. Mumaleliye watxenjerhiha, aroma olaleya oka. Yehova wahavaha guru dhokopola muya dhabure, vina wavulumutxa aredda.
Joau, Mateu, Bartolomeu, Tomas
Yezu wali marho wa arumiwi aye kumi n’eli, nanda wanaroromela. Afarizi aloga wila arumiwi a Yezu ali attu ahasunzile vina edda bure-bure. Mbwenye Yezu wahatxenjerhiha bavaha mabasa a ttima. Awene akala na Yezu okalawo waye wotene, ahinakwa, vina muvenyeliye mu okwani. Enjiya ali o’Galileya ninga Yezu. Enaya atela.
Tiago mwana Alfeu, Juda Iskariot, Tadeu, Simoni
Arumiwiyá ali attu ottega, awene anvirigana veli-veli. Mudhidhi mwina anloga ahinatti wubuwela, vina ankosa dhosakula dhabure. Dila dhina, aweneya ankanela maruru dhilobo. Na dhawenevi aweneya ali attu aderetu amukwela Yehova. Siku dhahi aroma owanele onddimuwa. Masiki dhawene, Yehova wahawira matxikwa a mutugumano woroma wa Okristu muweleli Yezu.
“Ddinowirani akwaga, sabwa dduziwihani dhetene dhimwiwale miyo Babaga.”—Joau 15:15
