Yezu wahikana amarho araru akala o Betánia. Aboya ali Lázaro na arogoriye eli, Marta na Maria. Siku dhahi vali Yezu kobela yina ya mwinje Jordau, Maria na Marta ahimurumihedha mpaganyo wa namaguve: ‘Lázaro muredda ttapatta. Nabuya mufiye okuno momaguva!’ Yezu kadhowile momaguva. Iyene wahijedha malabo meli nomala bawaddela anamasunza aye: ‘Ndoweni o Betánia. Lázaro onogona miyo ddindhowa wenewo ddanvenyihe.’ Anamasunzaya amwakula: ‘Nabuya akala Lázaro onogona, jaderetu.’ N’ejo Yezu ohawakula: ‘Lázaro ohikwa.’

Mukweli Lázaro nanda vavirá malabo manai, Yezu pafiyileye o Betánia. Vatakulu va Marta na Maria vahidhala attu adheli wapangarhaza. Mwiweli Marta wila Yezu onodha, iyene ohaguva banfwarela. Munfwanyeliye ohiloga: “Eh, Nabuya, nyuwo kokala apano murogoraga kagakwile.” Yezu omwakula: ‘Murogorinyu onere okalawo wili. Marta weyo onorumela dhinlogimi?’ Iyene omwakula: ‘Ddinorumela wila iyene onele ovenya mu okwani attu otene agavenyaga.’ Apa Yezu ologa: “Miyo ddili ovenyiha mukwani, ddili egumi.”

Marta ovenya omudhowela mbalaye Maria omwaddela: ‘Yezu ohifiya.’ Maria ottamagela wali Yezu, muttitti wotene ohinfwara. Maria omukokorela Yezu baroma wunla. Onlaga, wanloga dhahi: ‘Nabuya nyuwo kokala veneva murogorihu kagakwile!’ Yezu ohona wila Maria wela otabuwa, iyene vina oroma wunla. Attu alivo monelani mintori dhaye anloga oka-oka: ‘Mmone mukwelelo wamukweliye Lázaro. Oku attu eena bagaloga: ‘Kito akala wannimukwela, okoddelini onvulumutxa?’ Txini yobuwela Yezu okosa?

Yezu ohifiya vamasiye, vali nlugo nddimuwa nafuga omavolowelowa. Iyene oaruma attu: ‘Burutxaniwo nluguna.’ Marta ohakula: ‘Nabuya iyeneya okwile wale vanovira malabo manai! Ononuka.’ Masiki dhawene attuya ahivenyihawo nluguna nanda Yezu ohilobela: ‘Baba ddinoutamalelani ttangwi y’oddivuruwana.  Ddinoziwa wila nyuwo munoddivuruwanaga, esi dhinlogimi ddinirela attu aba aziwé wi oddirumile ddi nyuwo.’ Nomala ohikuwa na lizu noliba: “Lázaro, kabudduwela otakulu.” Vahipadduwa elobo yotikiniha; Lázaro ohibudduwela otakulu bamalile opottiwa na guwo ya murhi wa linyu. Yezu ohiloga: “Mutapulení, muttiyeni adhowe.”

Attu enjene onile matikiniho aba, ahiroma omuroromela Yezu. Mbwenye attu eena ahidhowa wapanga Afarizi. Ovenya venevo, Afarizi antamela ompa Yezu na Lázaroya. Namasunza mmodha wa Yezu wahivenya badhowa wavuza Afarizi: ‘Ngani, munaddivahe muttengo gani ddigaukamihedhani omuttidda Yezu?’ Awene alaganela omvaha kobiri 30 dha parata, sabwa ya ejuwene, Juda ohiroma otamela gari ya omuttidda Yezu wi amperheke mmadani mwa Afarizi.