Yezu ohidha velaboni ya vati wi alaleye miselu dha Omwene wa Mulugu. Yehova ohinvaha Yezu muya wokoddela wakosiyena matikiniho wi alagihe ejile enakosiye agakala Mwene. Iyene wanwodha ovulumutxa maredda ottiyana-ttiyana. Wego ku wego wadhowiye, wannavulumutxawo attu. Akwettenkwe anneedda, aliba ohona ahiyelela woona, ohiwa anniwa, attu amageyile na adomonyo anfuruleya. Masiki akala muttu wela ottidda guwo ya Yezu wanvulumuwa. Attu anninfwara Yezu wego-wegovi wadhowiye. Masiki alemé, Yezu kamwigara muttu.

Siku nimodha attu ahidhana muttu woheedda vali Yezu. Vahidhala attu vaddiddi mpaka awene ohikaana vovolowana. Awela vadhulu va numba atorola omukitihedha mulobwanaya mba mwali Yezu. Venevo Yezu ologana dhahi mulobwanaya: ‘Kavenya, kedda.’ Muvenyele mulobwanaya, attu atikina vaddiddi.

Siku nina, Yezu bagavolowa mmuttetteni alobwana kumi aana maranya ahimela wolapela, akuwa: ‘Yezu, kanikamihedhe! Malabo abale muttu wa maranya karumeeliwa ofiya va attuni. Yezu wahapanga wila adhowe mumparhani, ninga mwalogela Nlamulo na Yehova. Adhowaga-wene, otene avulumuwa. Mmodhayavo moneliye wi omala ovulumuwa, ohiyela wi amutamaalele Yezu  vina amuttittimihe Mulugu. Otene abale kumi, weyelilevo wali mmodha bahi.

Muyana dhahi wamalile vyaka 12 bali muredda wahivulumutxiwa. Iyene wahifiya vali Yezu battida guwo yaye. Mmaleliye bavulumuwa. Mpadduweli esodha Yezu ovuza dhahi: ‘Ottiddile guw’aga bani?’ Masiki vagurumeliye, wahivilibihedha odhowa vali Yezu baloga ebaribari. Nomala Yezu omulibiha dhahi: ‘Mwanaga, dhowá na murenddele.’

Fumu dhahi watxemerhiwa Jairo omunlela Yezu eraga: ‘Mfiye vani-vaga. Mwanaga wa muyana muredda.’ Yezuyá ahinatti ofiya vatakulu va Jairo mwanaya okwa. Mfiyedhi Yezu, ohawoona attu enjene adhile omunla mwanaya. Yezu wahapanga: ‘Kamugonla, iyene kakwile, onogona.’ Nomala ottukula nlada na mwanayá, ologa: ‘Mwanaga, kavenya!’ Momaguva-mwene ovenya, Yezu ohawaddela ababe wi anvahe yoja. Ababe aziveliwa vaddiddi!