Paskwa wa 32 E.C., ahinatti ojiwa, anamafwara a Yezu, ahidhowa olaleya. Vowi eyelile oolemene, Yezu ohaweliha mmwanddiyani adhowa o Betsaida wi avume. Mwanddiyaya mfiyelani va zambuwoni, Yezu ohawona attu gwé anfwareli. Masiki vafuniye wi akale na anamafwaraye bahi, Yezu wahamoyela attuya. Iyene ohavulumutxa aredda alivo, nanda oroma wasunziha. Yezu ohimala siku nantero bagasunziha attu sabwa ya Omwene wa Mulugu. Muribeli vati, anamafwara ahimusulela, alogana: ‘Attu aba apiwa dala. Mwarume adhowege atamele elobo yoja.’

Yezu oawakula: ‘Andowela nni? Mugavaha nyuwene yoja?’ Arumiwi ahinvuza: ‘Nabuya munfuna nidhowe musidadi nagule oja navahe?’ Murumiwi mwina wakuweliwa Filipi ohakula dhahi: ‘Masiki kokana kobiri yinjene, egahakwana wajiha attu ninga abene?’

Yezu oavuza: ‘Apano valihu kaninavo-wene yoja?’ Andre omwakula: ‘Nihikana pau tanu, na oba bili dhing’ono. Esidha kadhinakwana ojihana muttitti ninga obwene.’ Yezu ohiloga: ‘Kadhanina apa pau na obadha.’ Iyene oaruma attuya wi agilati makuru a attu 50 obe 100. Yezu muttukuleliye pau na obadha, ohang’ana odhulu, olobela. Nomala, oavaha arumiwi dhojadha, nanda abaya ahagawela attu. Attu, alivo 5.000 alobwana na ayana vina aima aja arubala. Mmalelani arumiwi ahittukula pau dhotene dhatxeleliwe,  wila dhinarahiliwe. Ahidhaliha mijanga 12! Nipadduwo ntti ttotikiniha vaddiddi, kahiyo?

Attuya ahiziveliwa vaddiddi mpaka ofuna omuttidda Yezu wi akale mwene wawa. Mbwenye Yezu wahiziwa wila mudhidhiya wafuna Mulugu wi akale mwene wali ohinafiya. Nona waharuma arumiwi aye wi adhowe kobela yina ya Mwinje wa Galileya. Awela mmwanddiyani mwawa, nanda Yezu ohidhowa vamwangoni yeka. Wadhowela nni? Iyene wafuna mudhidhi wi aloge na Babe. Yezu masiki adhugudheye wantamela mudhidhi w’olobela.