Vali Yezu na anamafwara aye mukambirhinyani ya vadhulu, iyene wahapanga: ‘Mattiyabano motene nyuwo munele oddittawa.’ Pedro ohiloga eraga: ‘Miyo nne! Masiki otene aba auttaweni, Nabuya miyo kaddinauttaweni.’ Apo Yezu omwaddela: ‘Pedro, mitubi dhihinonla, weyo onele oddiruna ddila ttaru.’

Anyakoddo mmuttukulelani Yezu adhowana vatakulu va Kaifa, anamafwara enjiya, ahimuttawa. Mbwenye anamafwara eeli afwara muttittiya. Mmodhaya wali Pedro. Iyene odidelavi mpaka ofiya vatakulu va Kaifa, badhowa wootta. Mattiyu-ene abale, namalaba wa muyana omona Pedro ologana: ‘Miyo dduhuziwa! Weyo vina wali na Yezu.’

Apo Pedro oruna eraga: ‘Onozivala, miyo kaddali na Yezu. Vina esodha dhinlogiwe miyo kaddinziwa.’ Iyene osusela omusuwo wa nsitto. Wenewo namalaba mwina wa muyana omona, okuwa eraga: ‘Mulobwana oddu wali na Yezu!’ Pedro oruna: ‘Yezuya oddo onimulogenyu miyo kaddinimuziwa.’ Mulobwana walivo ohiloga vina eraga: ‘Mulobwana, weyo vina weddetxa na iyene! Mulogelo onlogiwe onowiweya wila wamukadda Galileya ninga Yezu.’ Apa Pedro ohilibela eraga: ‘Baddi miyo kaddinimuziwa Yezu!’

Mudhidh’ene obo mutubi ohunla. Pedro ohimona Yezu bamuzugunuweli bagamwang’ana. Iyene ohubuwela mazu alogile Yezu, obudduwela otakulu otomola kutto.

Mfiyeli mudhidhiya Sinedriyu elaganela omudhowana Yezu vatakulu va Kaifa. Awene alaganela ompa Yezu, ovano afuna afwanye muladduya. Awene kafwanyile muladdu wompela Yezu. Mmalelani Kaifa ohimvuza Yezu: ‘Weyo wa Mwana Mulugu?’ Yezu omwakula: ‘See!’ Kaifa osilidhiwa nanda ohiloga: ‘Nihimuttiddana muladdu. Iyeneya namabedda!’ Anamattonga otene ohilaganela: ‘Ndoweni nimpe.’ Awene amuturela mara Yezu, amminela, amukunela omentoni  ahinvaha nifuddadda, amvuza: ‘Akala weyo oli namavuhulela, kamulogeto wuvadile nifuddadda!’

Muyeli vati, amuttukulela Yezu omuttegoni wa Sinedriyu amvuza eraga: ‘Weyo ologile oli Mwana Mulugu?’ Yezu ohakula: ‘Apo ddi nyuwo onloga wi ddili Mwana Mulugu.’ Awene amuttiddana muladdu w’obedda, amuttukulela omuttegoni wa Ponsio Pilato Guvernadoro wa akadda Roma. Txini epadduwile mfiyelanina? Ninfuna none musogorho.’