Yezu ogumana na anamafwaraye. Iyene ohavaha malago aderetu: ‘Dhowani mwakose anamasunza attu a malogo otene. Mwasunzihe dhetene dhusunzihilenimi, mwabatize.’ Nomala ohalibelela: ‘Mubuwelege, ddinokala na nyuwo malabo otene.’

Mwa malabo 40 Yezu bamalile ovenyihiwa, iyene ohattanyuwela anamafwara matxikwi menjene o Galileya vina o Jeruzalemi. Iyene ohasunziha malago aderetu nanda ohikosa matikiniho. Dila yomariha, Yezu ohattanyuwela arumiwi aye bahi, o Mwangoni wa Olivera. Iyene ohapanga: ‘Munabudduwe mu Jeruzalemi. Mukale mwenemwa mujedhelaga malibelo a Babaga.’

Arumiwi aye kaziwelamo yafuniye ologa. Nona ahinvuza: “Nabuya, mudhidhi onfunenyu ovenyihedha omwene wa Izrayel, bubwene?” Yezu ohawakula: ‘Mudhidhiya osakuli Yehova kunatti ofiya. Ovanene mujedhelege guru dhindana muya wokoddela, wi mukale anamoona aga. Mudhowe mwalaleye mu Jeruzalemi, mu Judeya, Samariya, mpaka okolokotani wa elabo.’

Mulogeliye esene Yezu oroma owela wirimu nanda mirabo dhimukunela. Anamasunzaye adidelavi omwang’ana, iyene orimelawo.

Anamasunzaya ahitita Vamwangoni wa Olivera adhowa o Jeruzalemi. Dila dhinjene awene angumana o Jeruzalemi mukamibirhinyani y’odhulu wi alobele. Awene amujedhela Yezu wi avahe malago meena.