O Filipi wahikala namwali dhahi wana domonyo. Domonyoya wannimukosiha wawaddela attu dhafuna opadduwa musogorho, nanda munyaya wanrajulana vaddiddi. Paulo na Sila mfiyelani o Filipi, namwaliya ohafwara mwa malabo menjene. Domonyoya wannimukuwiha dhahi: “Athu aba, emeleli a Mulugu Namadhulu-dhulu.” Mmalelani Paulo ohilogana domonyoya eraga: “Mwa nzina na Yezu Kristu, budduwa mwa namwali oddu.” Venevo, domonyo omuttiya namwaliya.

Anabuyaye onaga wila mpinddu wawa ohigoma asilidhiwa. Awene amuttidda Paulo na Sila adhowana va ttaddo ya miladdu, ahasumela eraga: ‘Alobwana aba anoviriganiha nlamulo, vina anonyagula sidadi ejino yotene.’ Anddimuwaya ahiruma wila Paulo na Sila avadiwe vina afugeliwe mukambura. Mwang’aneli ohafugela okomoni wa kambura, wali yihi ohamagelela nigologoddo.

Paulo na Sila ahiroma wibawo jibo dheweya na attu ena afugeliwemo. Morurumutxamwene, vari-vamattiyu, kamburaya yotene ehiroma ottekenyeya. Misuwo dha kamburaya dhifuguwa woka, anyaperhezuya ahittawela mwari vaddiddi, nanda otene ahitapuwa oka. Mwang’aneli moneliye esodha, ohittamagela mukambura, ohifwanya misuwo badhifuguwile. Obuwelaga wila anyaperhezuya otene ahittawa, ottukula supadda afunaga ovipana mwinya.

Mudhidhi wakakene Paulo ohimukuwela eraga: “Mulobwana kuvipe! Iyo notene nili mwenemwano.” Mwang’aneliya ottamagela mwafugeliwe Paulo na Sila ohagwela agurumelaga. Oavuza dhahi: “Anddimuwa, ddikose nni wi ddivulumutxiwe?” Awene amwakula: “Omurumele Nabuya Yezu, onovulumutxiwa weyo na muralawo wotene.” Apo Paulo na Sila ahalaleya mazu a Yehova nanda namang’anelaya na muralaye wotene ahibatiziwa.