Murumiwi Joau vafugeliwiye vasuwani y’o Pátmos, Yezu ohimoniha dhoroha 16, dhatonya dhigapadduwile musogorho. Dhorohadha esi dhatonya okoddelihiwa wa nzina na Yehova, odha wa Omwene waye, vina wakwanihedheya wa efunelo yaye velaboni yavati vina odhulu.

Murohanimwá, Joau ohimona Yehova vampaddoni vaye vanttittimiho, bali na anddimuwa 24 abalile guwo dhotxena, attiddeli mwerheko dha wero. Vampaddoniva vambudduwa oruma na ozerimela wa jai. Anddimuwaya 24 ankokora vamentoni va Yehova nanda annimwirela labà. Murohani mwina Joau ohona muttitti munddimuwa wadha mmalogoni, mmahimoni vina mmazizani otene abuwene amwebedha Yehova. Abaya wasogorhela wali Mwana Nibila oli Yezu, wadhowana wego oli manje amvaha egumi. Musogorhomwa Joau ohimona Yezu na anddimuwa 24 bagalamulela ninga amwene wirimu. Dhoroha dhina Joau wahimona Yezu bagawana na nowa yawale—Satana na adomonyo aye. Yezu ohavokela velaboni ya vati.

 Nomala Joau ohona etagano yokoddela vaddiddi, Mwana-Nibila na 144.000 bemelile va Mwango Sion. Iyene vina ohimona mungelo warugunuwa elabo yotene awaddelaga attu wi amove Mulugu vina anvahe nttittimiho.

Dhoroha dhinfwarela, Joau ohona koddo ya Harmagedón txigarabiwa. Vakoddoniva, Yezu na anyakoddo aye ahipemberha elabo ya Satana. Dhoroha dhomariha, Joau ohona wiwanana wowakwana wa attu a wirimu vina velaboni ya vati. Satana na ziza naye anotolowa mutolowelo. Attu otene, wirimu na velaboni ya vati ankoddeliha nzina na Yehova bagebedha nttuwenevi.