Arumiwi anowiwelela malago a Yezu a olaleya elabo yotene. Yaka ya 47 E.C., abali o Antiyokiya ahimuruma Paulo na Barnabé wi asogorhele mabasa a olaleya. Anamalaleya aba a guru ahimwedda Ásia Mung’ono muzima, afiya o Derbe, Listra na Ikóniyo.

Paulo na Barnabé annalaleya attu otene, ayelegi na areli, aima na anddimuwa. Attu enjene ahirumeela ebaribari ya Kristu. Paulo na Barnabé vafunani omulaleya Sérgio Paulo guvernadoro w’o Shipre, kumbayisa dhahi wakuweliwa Elima wafuna akoddihe. Nona Paulo ohimwaddela: ‘Yehova kanziveliwana dhinkosiwe.’ Momaguva-mwene, kumbayisaya otweya mento. Sabwa ya ejuwene Guvernadoro Paulo orumela ebaribari.

Paulo na Barnabé anlaleya dhipaddi dhotene, numba-numba, mmamisika, mudila, vina mmasinagoga. Mumvulumutxelani mulobwana dhahi w’o Listra wakwile myeddo, attu otene oonile obuwela wila aweneya ali amilugu, nanda ahiroma wawebedha. Mbwenye Paulo na Barnabé ahakoddiha eraga: ‘Mmwebedhe Mulugu bahi! Iyo nili attu ninga nyuwo.’ Mmalelani ahifiya alobwana dhahi ali Ayuda, nanda ahakosiha attuya omuzugunuwela Paulo. Muttittiya onvokela malugu Paulo, omburulela otakulu wa sidadi, omuttiya wenewo wohileyene. Paulu kaakwile. Abali ahidha bamuttukula badhowana musidadi mwakamwene. Novenya, Paulo wahiyelela o Antiyokiya.

Yaka ya 49 E.C., Paulo wahikosa oleddo mwina. Mwiyeleliye wi awoone abali akala o Ásia Mung’ono, iyene ohifiyana miselu  dhapama mpaka o Europa. Ohifiya o Atena, Éfeso, Filipi, Tesalónika, na mirudda mina. Attu anfwarile baba: Sila, Luka na muzombwe dhahi wakuweliwa Timóteo. Awene edda vamodha etaga milogo, vina avaddihaga milogodha. Paulo ohikala o Korinto yaka yantero na meya, alibihaga abali. Iyene ohilaleyawo, ohisunziha, vina ohileba makarta wi avahedhe milogo dhinji. Iyeneya wakalawo na osasanya tenda. Mmalelani Paulo ohiyelela o Antiokiya.

Mfiyelani yaka ya 52 E.C., Paulo ohikosa oleddo waye wanoraru, bagaroma o Ásia Mung’ono. Iyene ohifiya wego wolapela-wene ninga o Filipi vina o Korinto. Paulo ohikala vyaka dhinjene o Éfeso asunzihaga avulumutxaga attu, vina akamihedhaga milogo. Iyene vina wankosa diskursu dha vattaddo mmaskola. Attu enjene anvuruwana ansaddula mweddelo wawa. Mmaleliye olaleya miselu dhiswa mu dhilabo dhinjene, Paulo ohiyelela o Jeruzalemi.