Saulo wali munyasidadi wabaliwe o Tarsu. Iyene wali Mfarizi wasunzile vaddiddi Nlamulo na Ayuda, nanda iyeneya wannawidda Akristu. Wannavenyedha Akristu alobwana na ayana mmawani mwawa, bagafugeliha mukambura. Labo dhahi wahimela bagawang’ana attu anvokelaga malugu namafwara Estevau mpaka okwa.

Saulo watabutxa Akristu ali mu Jeruzalemi kuwamwakwana. Iyene wahidhowa omuloba namakutta munddimuwa wi anvahe makarta wi atotena Akristu eena akala o sidadi y’o Damasko. Bali vakuvi na ovolowa musidadimwa, Saulo ohona txeza yamuwere-were, nanda iyene ohimotta. Ohiwa lizu naloga dhahi: ‘Weyo Saulo, onddiddela nni dhawene?’ Saulo ovuza: ‘Nyuwoya mul’ani? Wakuliwe dhahi: ‘Miyo ddili Yezu. Kadhowa mu Damasko, mwenemo onele waddeliwa enfunewe okosa.’ Mudhidhi wakene Saulo ohikala muttu wohoona, noona wannimutamela muttu wi amuttiddele nlada.

Mu Damasko mwahikala mukristu wororomeleya wakuweliwa Ananiya. Yezu ohimwaddela Ananiyaya murohani: ‘Dhowá vatakulu va Juda oli waddamana na dila enkuweliwa Yovara, ononfwanya Saulo.’ Ananiya ohakula eraga: ‘Nabuya, miyo ddinomuziwa vaddiddi muttuya oddo. Ddi iyene onafugelihetxa anamafwara enyu.’ Apo Yezu omwakula: ‘Kadhowa. Miyo ddimusakula Saulo wi alaleye attu a malogo otene.’

Apo Ananiya ohinfwanya Saulo, omwaddela eraga: ‘Saulo mbalaga, Yezu oddiruma wi ddifugule mento awo.’ Nomala Saulo oroma wona wili. Iyene ohisunza mwaha wa Yezu, ohikala namafwara waye. Mmaleliye obatiziwa bakala Mukristu, Saulo ohiroma olaleya musinagoga na  anamafwara a Kristu. Ayuda ahisilidhiwa kakamwe vamonilani Saulo bagalaleya nzina na Yezu. Awene anloga oka-oka eraga: ‘Muttu oddu kahiyo oddule wafwara-fwaretxa anamafwara a Yezu?’

Saulo omala vyaka ttaru bali o Damasko alaleyaga. Ayuda ahiroma omwidda Saulo atamelaga ompa. Vowi abali ahimala wiwa makaniya abo, amwaddela Saulo wi attawe. Awene amwika mmujangani bamukitihela okodde wa numba otakulu wa sidadi.

Saulo mfiyeliye o Jeruzalemi, wafuna ninga avitaganyihe na abali afwanyiliye. Abaliya ahiroma omova. Nomala namafwara dhahi wokoddela murima wakuweliwa Barnabé ohimuttukula Saulo omudhana vamentoni va arumiwi, ohawaddela wila Sauluya wahittiya mweddelo waye wabure. Saulo wahiroma olaleya na mulogo o Jeruzalemi. Wahisaddula nzinanaye bakala Paulo.