Siku dhahi vali Eva yekavo, ehidha nowa eloga na iyene. Elogile dhahi: “Txibarene Mulugu oukoddihani oja milima dha miri dhili muddebe mpuno?” Eva ohakula: ‘Nne ninoja dhetene, iyo nikoddihiwe muri mmodha bahi. Elogiwe nigaja ninokwa.’ Nowa ehakula: ‘Kamunkwa nyuwo. Mugaja munokala ninga Mulugu.’ Ejoya yali ebaribari? Nne, wali ottambi. Eva vakaleliye ntidi wang’ana mulimaya, oroma osirirha. Nanda Satana waloga ottambi. Iyene ottukula mulimaya oja, ohinvamo mamunaye Adamu. Adamu wahiziwa wi kottiya omwiwelela Mulugu, agahikwa. Masiki dhawene Adamu ohija.

Labo-nene nttile Yehova ologa na Adamu na Eva. Iyene ohavuza yakoddelani omwiwelela. Eva wamagedhile nowa, Adamu wammagedhile Eva. Vowi ahimuttegela Mulugu, Muluguya ohattamagiha mmunddani mwa Edeni. Iyene owaruma angelo na supadda nattidda motto wi afuge odilawa, welele Adamu na Eva anadhe eyele.

Yehova ottonga wila oddule wamunyengettile Eva asottottiwe. Kahiyo wi yalogile na Eva yali nowa-nowa. Yehova kasasanyile nowa wi dhilogege. Walogile na Eva wali mungelo wabure wakosihile wi nowa eloge. Werela amunyengette Eva. Mungeloya oddo onkuweliwa Satana Ddiabo. Musogorho Yehova onele omutototxa Satana wi atxelele wanyengettela attu wira dhabure.