Nowé, muralaye avolowa mpangayani na dhinamadha. Yehova ofuga musuwoya, muzogwe oroma orubwa. Orubwa vaddiddi mpaka pangaya oroma omberhuwa. Mmalelani elabo yotene edhala manje. Attu otene akoddile ovolowa mpangayani akwa. Nowé na muralaye avuluwa mpangayani. Weyo onubuwela ninga awene ahiziveliwa vaddiddi sabwa yomwiwelela Yehova?

Muzogwe orubwa malabo 40 mutana na mattiyu, nomala oremutxa. Manje aroma otoda. Pangaya osama vamwangoni. Eniravi dhawene, manjeya ahihalamovi, nona Nowé na murala waye kamaguveli obudduwa mpangayanimwa.

Vang’ono-vang’ono manje aroma wuma. Nowé na muralaye ahikala mpangayani yaka yantero. Nomala Yehova ohapanga wila abudduwele otakulu woneya ninga elabo eswa. Awene amutamalela vaddiddi Yehova sabwa yowavuna, nanda ahilagiha ejuwene mwa omukosela Mukutto.

Yehova wahiziveliwa vaddiddi na mukutto obule. Iyene ohilibela wi kagamurubwihile muzogwe munddimuwa ninga oddulene wi anongena dhilobo. Wi alagihe nlibelona, ohoneyiha odhulu musilibo. Weyo onowoonaga musilibo?

Nomala Yehova omwaddela Nowé na muralaye, wi akaane aima, adhalihe elabo ya vati.