Attu aroma winjivana velaboni ya vati. Attuya enji ali abure. Wirimu vina wahikala angelo abure. Awene ahittiya murala wawa badha velaboni ya vati. Onoziwa yakoselani ejuwene? Awene ahittukula maningo a omuttu, ahatela ayana.

Angelo ahaabala aima na ayana atelilani. Aimaya ahunuwa bakala ovadda, vina olapa vaddiddi. Annaporeya attu mwafunelani. Yehova kagattiyile dhilobo ninga esuwene opadduwagavi. Nona wahikosiha wila odhe mpulo wi wanonge attuya.

Mudhidhene obo wahikalawo mulobwana wottiyana. Nzina naye wali Nowé. Muttu wamukwela Yehova. Iyene na mwadhiye, ahikana aima araru, Sem, Kam na Jafet vina etene aba ahitela. Yehova ohimpanga Nowé wi amage pangaya wila iyene na murala waye ayemo avuluwe. Pangaya elobo enkala ninga kasha enila egaya mmanjeni egamberhuwa. Yehova vina wahimpanga Nowé wi akukuselemo dhinama dhottiyana-ttiyana mpangayanimwa, dhivuluwe.

Momaguva-mwene, Nowé oroma omaga pangaya. Awene amala vyaka 50 bagamaga pangayaya. Ahimaga ninga mwalogeli Yehova. Oku pangaya bagamagiwa, Nowé katxelele wawaddela attu odha wa Mpulo. Kavo omvuruwanile.

Ofiya mudhidhi wovolowa mpangayanimwa. Ninfuna none yapadduwele.