Abramu wahimusunziha mwanaye Izaki omukwela Yehova vina okuluvela malibelo aye. Izaki vaniyena vyaka 25, Yehova omukumbirha Abramu wi akose elobo yorutxa vaddiddi. Yali elobo gani?

Mulugu omwaddela Abramu dhahi: ‘Abramu, kamuttukule mwanawo nammodha odhowena o Mwangoni wa Morya waddiperhekele mukutto.’ Abramu kaziwa yakumbirhela Yehova elobo ninga ejile yorutxa. Masiki ahiziwaga iyene ohimwiwelela Yehova.

Mmembesinimwa Abramu omuttukula mwanaye Izaki na anamalaba eeli, adhowa o Mwangoni wa Morya. Aromile wona mwangoya beeddile malabo mararu. Abramu ohawaddela anamalaba aye wi ahale mundduni amujedhe, oku iyene na mwanaye Izaki adhowaga ohela mukutto. Izaki ovijela kuni, babe ottukula mbeni asogorhihana. Izaki onvuza babe: ‘Ngani babani, enamaya ya mukutto el’uvi?’ Abramu omwakula: ‘Mwanaga Yehova onele onivaha.’

Mfiyelani omwangoni, amaga ebuwa. Nomala, Abramu omuttidda Izaki ommaga mada na manyalo, omugunantiha vebuwani.

Abramu ottukula mbeni. Mudhidhene obo mungelo wa Mulugu omukuwela eraga: ‘Abramu wé! Kumpe mwana! Ovano ddinoziwa wi onomukwela Mulugu, vowi  wafuna omperhekele mwanawo ninga mukutto.’ Abramu ottukula mento omoona mwana nibila bamageyile munikupuni. Iyene omutapula Izaki, odhowa ottidda nibilana, omuhelela Nabuya mukutto.

Ovenyana venevo, Yehova omwittana Abramu okala marho waye. Onoziwa sabwaya? Sabwa Abramu wankosa elobo-elobovi yamuloba Yehova, masiki akala kanonelamo yamulobela Yehova okosa ejoya.

Yehova ohikosa wili malibelo anvahiliye Abramu eraga: ‘Ddinele oreliha, ddinjivihe nlogo nawo obe ziza nawo.’ Eji entapulela wila Yehova agahareliha attu apama mwa nzina na Abramu.