Abramu na Sara atelani wale. Awene ahittiya elabo yawa ya Ur, ahidhowa okalaga mmusasani. Sara wali muyana wowiwelela, vina wanimukuluvela Yehova.

Sara wanfuna vaddiddi obala mpaka omwaddela mamunaye Abramu dhahi: ‘Mamunaga, kambale mwana na namalabaga Agar wi akale waga.’ Ehipadduwa, Agar ohikana mwana. Nzina naye wali Ejumayili.

Pavirile vyaka gwé, Abramu bana vyaka 99 Sara 89, ahawakela aleddo vani-vawa. Abramu ohakukusa aleddoya wi avume vamuruntini vina ohapiyela oja. Weyo onowaziwa aleddoya abo? Àli angelo! Amwaddela Abramu: ‘Yaka ejo endawo, nsaka ninga nttene, weyo na mwadhiyo Sara munele ombala mwana.’ Sara wela ovuruwana makaniya bali mba. Iyene oteya mwenemo yeka bagobuwela: ‘Kalaba  ninga miyo ddinakane dhavi mwana?’

Mfiyelani yaka yina Sara ombala mwana, ninga mwalogeli angelo a Yehova. Abramu ohinvaha mwanaya nzina na Izaki, entapulela ‘Emwerumweru.’

 Izaki munuweliye akana vyaka tanu, Sara omona Ejumayili amuruwanaga. Sara wafuna wi ambarele mwanaye, nona iyene ohinfiyedha mamunaye Abramu bamukumbirha wi amwigare Agar na mwanaye Ejumayili. Voroma Abramu kafuna wi ejoya epadduwe. Ofiyedha Yehova omwaddela: ‘Kamvuruwane mwadhiyo Sara. Miyo ddinele ombarela Ejumayili. Mbwenye ninga mulogelimi, malibelo aga ddinakwanihedhe mwa Izaki.’