Yehova omukuluveliha Jakobi wi agahimbarela ninga mwakoseliye na Abramu vina Izaki. Jakobi ohimwalela elabo yakuweliwa Haran, wenewo omutela muyana, ohikanawo murala munddimuwa, vina ohireela vaddiddi.

N’omala, Yehova omwaddela dhahi Jakobi: ‘Keyelela elabo ya makolo awo.’ N’eji Jakobi na murala waye wotene ahiroma oleddo onddimuwa wa wiyela. Muleddonimwa, attu dhahi ahinfiyedha Jakobi, amwaddela eraga: ‘Mbalawo Ezaú ovenya onoufwarela, ohattukula alobwana 400!’ Jakobi ohiroma ogurumela obuwelaga wila Ezaú wafuna ampe na murala waye wotene. Iyene omuloba Yehova eraga: ‘Nabuya ddivuneni mmadani mwa mbalaga.’ Mmangwananimwa, Jakobi ohinvahedha Ezaú sagwati dha mabila, mbuzi, ng’ombe, kamelo na buru.

Omattiyu omodha, Jakobi balivo yeka, ohimoona mungelo! Mungeloya ohimuttidda mpaje Jakobi. Awene ahittiddana mpaje mpaka ebembe. Masiki Jakobi vavoreyeyiliye kamuttiyilevi mungeloya. Mungelo omulogana: ‘Kaddittiye ddidhowege.’ Jakobi omwakula: ‘Nne, ogakodda oddiruriha kaddinauttiye.’

N’omala mungelo omururiha Jakobi. Padhile oziwa Jakobi wila Yehova kanamuttiye mbalaye wi ampe.

 Muyeli vati, Jakobi ottukala mento ohang’ana odila omona Ezaú na alobwana 400. Jakobi ohattiya amudhaye otene mundduni, ohidhowa osogorho, ohimukokorela mbalaye dila tanu na bili. Ezaú omuttamagela Jakobi, omukubatta. Oheli ahiroma olila, ahiteyihana. Weyo onubuwela ninga Yehova wahiziveliwa na eji yakosile Jakobi?

Muteyihelenani, Ezaú ohiyelela owani-waye, Jakobi vina ohiyela. Jakobi wana aima 12. Mazinaya baba: Ruben, Simeau, Levi, Judá, Dan, Naftali, Gad, Aser, Isakar, Zebulau, José na Benjamim. Yehova ohimulabihedha José—wi avune nlogo naye. Egapadduwile dhavi? Ninfuna none kapitulu ejo endawo.