Loti wakala o Kana na titiyu waye Abramu. Abramu na Loti àhikana dhifuwo dhawinjiva mpaka ohikalawo mburo wojiha. Abramu omwaddela Loti: ‘Kin’wodheya iyo okalagavi notene veneva. Kasakula wego ouziveli wi odhowewo, miyo ddinodhowa mburo mwina.’ Abramu kana nrima, kahiyo?

Loti osakula epaddi yapamaya waddamela sidadi enkuweliwa Sodoma. Wasakuliliye wahikala manje, mani meeti vina matxela. Iyene musakuleliye, ohimwala na amudhaye otene.

Attu akala musidadi ya Sodoma na muttette wa Gomora, ali abure. Ali attu ovuta-wene mpaka Yehova ofuna wila agujule mittette dhominli. Mulugu kafuna wila Loti atolotxiwe na attu abale abure, iyene oharuma angelo wi anvune Loti na murala waye, awene amwaddela dhahi: ‘Kamaguvaga! Kabudduwamo musidadini mpu! Yehova onfuna atolotxe.’

Loti wela ottigiriga. Bagagonela obudduwa. Nona angelo amuttidda Loti, mwadhiye na anaye eli ayana, baburutxela otakulu wa sidadi, awaddelaga: ‘Kamaguvani! Muttawe wi mvuneye, kamwang’ane mudduni. Mugang’ana mundduni munokwa!’

Mfiyelani o Sowar, Yehova orubwiha muttove wa motto, otolotxana mittette dhominli Sodoma na Gomora. Mittettedha esi dhitolowa kakamwe. Mwadhi Loti munvanyeliye Mulugu, nanda ang’ana mundduni, osadduwa bakala eruwa ya mwinyu! Oku Loti  anaye bavuluwile sabwa yomwiwelela Yehova. Awene anyapwarheya vaddiddi sabwa ya mwadhi Loti okodda omwiwelela Yehova. Epaddi yina awene ahiziveliwa sabwa yowila ahiwelela malago a Yehova.