José balivi mukambura, mwene w’Ejipitu, Faraó wahiroha dhilobo dhahawodha muttu-muttuvi otapulela. Namalaba mmodha wa Faraó wahimpanga wila José wali mukambura agahiwodha otapulela marohoya. Faraó ohimukuweliha José.

Faraó ohinvuza José: ‘Nga José, weyo onowodha oddaddela dhirohilemi?’ José omwakula Faraó: ‘Mw’Ejipitu munele okala oja mwa vyaka tanu na bili, vina musogorhomwa munokala vyaka tanu na bili dha dala. Mmutamele muttu wamalago, àkose attu asokele dhoja wi nlogo nenyu nihifwanyiwe dala.’ Faraó omwiyihedha: ‘Muttuya onakale weyo! Weyo onokala muttu wanawili onna ettomo mpuno mw’Ejipitu!’ José waziwile dhavi yatapulela dharohile Faraó? Wamukamihedhi ddi Yehova.

Vahivira vyaka tanu na bili José bagagubela dhoja. Osogorhowa nahifiya nsaka na dala ya elabo yotene, ninga mwalogeli José. Attu a vilabo dhinjene andowa ogula dhoja w’Ejipitu. Babi wa José wahiwa wila w’Ejipitu wahikala oja, noona waharuma anaye kumi wi adhowe agule.

Mfiyeli ana kumi a Jakobi w’Ejipitu, José oazinddiyela. Mbwenye abalayeya kaziwa wila oddule wali José. Amukokorela ninga mwaroheliye bali mwana. José wanfuna wi aziwe akala abalaye ahikanavi ntxiga. Nona ohawaddela: ‘Nyuwo muli anamabeddegela. Munfuna moone akala elabo eji attuya bawobana.’ Awene amwakula: ‘Nne! Iyo nili 12 nindela o Kana. Mbalihu mmodha ddikwile, vina  ettogoyiya ohali na babihu.’ José owawaddela: ‘Mugaddidhelana mbalinyu wa ettogoyiya panauroromeleni miyo.’ Nomala ahiyelela owani-wawa.

Murala wa Jakobi mufwanyeliwani dala wili, iyene oharuma wili anaye w’Ejipitu. Ovano pamuttukulilani Benjamim, mbalawa wa ettogoyiya. Afunaga wi awoone abalaye José ohivita kopo ya safurhi musakuni mwa Benjamim, baamagedha abalaye wi awene ambava. Namalaba wa José mufwanyeliye kopo musakuni mwa Benjamim, abalaye ahikumuwa vaddiddi. Awene ahimukumbirha José wi asottotte ottiya omusottotta Benjamim.

Apo José ohona wila abalaye aahittiya mweddelo wawa wabure. Venevo José kawodhile omaala, ohiroma wunla. Iyene ohawaddela abalaye dhahi: ‘Miyo ddili mbalenyu José. Babani ohikalawovi?’ Mudhidhene obo abalaye ahikumuwa. José ohapanga dhahi: ‘Kamuddoove sabwa ya ejile yaddirilenyu. Mulugu ddiddirumile okuno wi ddivune dhigumi dhenyu. Ovano mwiyele mwadhena babani okuno.’

Awene ahiyela adhowa ompanga babiwa muselu obu wapama, amuttukula, adhowana w’Ejipitu. Vyaka dhinjene musogorhomwa, José na babe ahandana wili.