José wali mwana wa erubele wa Jakobi. Abalaye anddimuwaya ahizinddiyela wila babiwa wamurihetxa José. Awene ewalemo dhavi? Ahimukanela aje José aroma omwidda. Musogorhomwa José ohiroha dhilobo dhotikiniha ohapanga abalaye. Awene ahisilidhiwa vaddiddi ofiyedha wubuwela wila dhorohadha dhatapulela wi siku nimodha otene agahimukokorela José. Venevo ahiroma omwidda!

Siku nimodha abali a José ahidhowa osapiha mabila vakuvi na ntxela nakuweliwa Sikém. Jakobi omuruma José wi awoone abalaye. Mmoonelani José bagadha wolapela-wene, aroma ologa oka-oka eraga: ‘Mmone namaroha oddule onodha. Ndoweni nimpeni!’ Ahimuttidda ammottihela vatxelani noririmela. Mbalaye mmodha onkuweliwa Judá ohiloga dhahi na abalaye: ‘Nne, kanimpe! Ndoweni nimugulihe akale mudhari.’ Amuttidda José amuguliha matxikwi 20 a kobiri dha parata, amugulileya aali akadda Midiya anyamarhondda adhowa w’Ejipitu.

Abali a José amuttidda, amurula yabalo yabaliliye asigiha nikami na mbuzi, ahimurumihedha babiwa, amwaddelaga: ‘Moone yabalo ya mwanawo!’ Nona Jakobi wobuwela ninga mwanaye otakuniwe enama yamwini. Jakobi wahikubanya vaddiddi. Kavo wawodha ommaliha.

Mfiyeliye w’Ejipitu José oguliwa bavahiwa munddimuwa wakuweliwa Putifar. Yehova walivi na José. Putifar ohona wila José wali muttu waderetu vaddiddi womukuluvela. Putifar ohimukosa José okala mwang’aneli wa dhilobo dhotene dha vani-vaye.

Mwadhi wa Putifar ohona wi José wali wokoddela vina wovadda. Malabo otene muyana oddu wannimudidela José wi agonena. José  agakosile eni? Iyene wela ottawa, vina wahiloga dhahi: ‘Nne! Ejoya jabure. Nyuwo muli mwadhi wa fumu waga, miyo kaddinakose ejuwene. Ddigagona na nyuwo ddinomuttegela Mulugu waga!’

Siku dhahi mwadhi Putifar omudidela wila agonena. Iyene omuttidda guwo dhaye, mmalelani José barula bamuttiyedha. Mwiyeleli Putifar, mwadhiye omwaddeli ottambi wila José wahinvenyedha wi agonena. Oku mwadhi Putifar wela ozivala. Eji emusilidha fumu Putifar, omuttidda José omfugeliha mukambura. Yehova kadduwalile dhetene dhera José.