Mizé na Aroni adhowa onfwanyana Faraó mpaganyo obu wa Mulugu: ‘Ogakodda ottiya nlogo naga odhowa, ddinele ourumela txentxe.’ Txentxe dhimwadheyela epaddi yotene, mmatakulu mwa attu oreela na mwa ayelegi. Elabo yotene yoneya txentxevi. Elabo y’Ogozeni wakala akadda Izrayel, kufiyile txentxe. Oromana mulili obu wanoraru mpaka musogorho, mililidha dhafwanya akadda Ejipitu bahi. Faraó ohikumbirha dhahi: ‘Kamulobe Yehova wi amaalihe txentxe esi. Ddinowattiya attu wi adhowe.’ Yehova mumaaliheliye mulili obu, Faraó osaddula murimaye. Iyene wali ahinattivi osunzavo elobo?

Yehova odhowanavi: ‘Vowi Faraó kafunile ottiya nlogo naga wi nidhowe, ddinopa dhifuwo dhawa dhotene na eredda.’ Mmangwananimwa, dhifuwo dhihiroma okwa. Oku dhifuwo dha aIzrayel dhihikwaga. Neji vina Faraó kattiyile nlogo na Mulugu odhowa.

Venevo Yehova omwaddela Mizé wi adhowe wa Faraó, awazele munddura opevoni. Mundduraya ohikala mbwebwe budhala mw’Ijipitu mwentemwene. Mbwebweya ohatotela maputte akadda Ejipitu otene na dhinamadha. N’ejiya Faraó kafunilevi wattiya akadda Izrayel odhowa.

Yehova omuruma Mizé wili wi agumane na Faraó na mpaganyo obu: ‘Weyo Faraó  onokoddavi ottiya nlogo naga odhowa? Mangwana ddinele orubwiha maralala.’ Mmangwananimwa, Yehova ohirubwiha wirimu maralala, jayi na motto. Jayi yaliwo, akadda Ejipitu aligi ahinoonaga. Miri dhotene na makupuya ahinongeya, mbwenye ejiya kiyafiyile o Gozen. Faraó ohunla dhahi: ‘Kamulobeni Yehova wi jaiya eji emaale! Mugamala muvenye mudhowe.’ Mone, mmaaleli jayi na maralala, murima wa Faraó ohisadduwa.

N’eji Mizé omwaddela Faraó: ‘Ovano ddinfuna ddidhena nyazombe (mabalaga) aje mataba attiyile maralala.’ Anyazombe ahija dhetene dhattiyile maralala mmunddani vina mmirini. Faraó ohunla: ‘Kamulobeni Nabuya wi amaalihe nyazombe esi.’ Mwapeli Yehova anyazombe otene, Faraó ohivaddihavi okotti.

Yehova omwaddela Mizé: “Tapulela nlada nawo odhulu.” Nomala, odhulu na elabo yotene ehikaana eddima. Vahivira malabo mararu, akadda Ejipitu ahonaga elobwene nne muttu na muttu mukwaye. Akadda Izrayel kafwanyiwe eddimaya eji.

Faraó omwaddela Mizé: ‘Weyo na nlogo nawo kavenyani mudhowe.’ Mugadhowaga muttiye dhifuwo dhotene. Mizé ohakula: “Nne, iyo dhifuwo ninodhowana, ninfuna namukosele mukutto Nabuya Mulugu wehu.” Eji yahimusilidha vaddiddi Faraó. Iyene ologa dhahi na Mizé: “Kavenyavo! Kusabele wiyelela vamentoni vaga! Siku ninadhewe vali miyo, onopiwa.”