Yehova omwaddela Mize: ‘Kawela vamwangoni. Ddinfuna ddilebe malamulo va mwarhani dduvahedhe.’ Mizé owela vamwangoni ohimalavo malabo 40 mattiyu na mutana. Balivi venevo Yehova ohittukula mapapi meli a malugu, ohilebavo Malamulo Kumi, omvahedha.

Mwa malabo mang’onovi, ana Izrayel aroma wubuwela wila Mizé owanyanyala. Nona amwaddela Aroni dhahi: ‘Nininfuna muttu wi anisogorhele. Kanikosele Mulugu!’ Aroni ohawakula: ‘Kaddivaheni vittunddu dhenyu.’ Iyene onyugulutxa vittunddudha, omuba mwana-ng’ombe. Attu otene ahikuwa dhahi: ‘Mwana-ng’ombe oddu ddi Mulugu oddule onibuddutxile mu Ejipitu!’ Aroma omwebedha mwana-ng’ombe amwirela mattanga. Vahikala yabure? See, voroma nlogo ntti nalibela omwebedha Yehova bahi. Ovano awene kavirihilemo malibeloya.

 Yehova ohona dhapadduwa, n’eji omwaddela Mizé: ‘Kakita wawone attu. Awene addinyanyala ddabuno animwebedha mulugu wonyakuwa.’ Mizé ohitita vamwangoni, battiddeli mapapi meeli a malugu.

Mizé mwaddameliye vamisasani, ohiwa attu bageba. Nomala ohawona aweneya atxettaga vina amukokorelaga mwana-ngʼombe. Mizé wahisilidhiwa vaddiddi. Iyene ovokela vati mapapi omeli a Malamulo, onyenya. Omuttidda mwana-ng’ombeya omunyenyeresa. Nomala omvuza Aroni: ‘Attu aba aukosele nni ofiyedha oukosiha nrhemo ninga nttene?’ Aroni omwakula: ‘Kurumuwani Nabuyaga. Nyuwo munoziwa nlogona ntti. Awene anfuna mulugu, nona ddittukula vittunddu dhawa ddimuba mwana-ng’ombe oddu.’ Ejiya ekosile Aroni kikalile. Mizé ohiiyelela wili omwangoni wi amuttidde myeddo Yehova sabwa ya yottega yirile nlogo.

Yehova ohilevelela yottega ya abale afuna omwiwelela. Eji enlagiha wila ana Izrayel anfwanyela olagiha wila anofuna ‘osogorheliwa na Mizé.’