Mvirelani myeri minli ana Izrayel babudduwile mw’Ijipitu, afiya nikome na Mwango Sinai, amaga misasa. Yehova omwittana Mizé wi awele vamwangoniva omwaddela: ‘Ddi miyo wavunile akadda Izrayel. Agaddiwelela nanda avirihamo malamulo aga, ddinowawira nlogo navawoka.’ Mizé otita oawaddela ana Izrayel dhetene dhampangile Yehova. Koddi aweneya ewilemo dhavi? Ahakula na lizu nimodhanene: ‘Dhetene dhinipangile Yehova ninovirihamo.’

Mizé owela wili vamwangoni. Yehova omwaddela: ‘Miyo ddinfuna ddiloge na weyo mwa malabo mararu. Kawaddele attu otene wi kakalevo nne mmodha onadhe vamwangoni apano.’ Mizé otita oawaddela ana Izrayel wi akalele txenjewa n’ovuruwana dhinfuna ologa Nabuya.

Mvirele malabo mararu, ana Izrayel ahona ozerimela na mirabo dhoriba mwa malabo mararu. Ahiwa vina oruma wa jayi na parhaza. Mmalelani Yehova otitela vamwangoniva amoneyaga n’ekalelo ya motto. Ana Izrayel otene ela wova, aroma ogurumela. Mwango wotene wanttekenyeya vina vahikala witxi na pevo yawopiha. Oruma wa parhaza wanttabwavi onyagula. Nomala, Mulugu ologa dhahi: ‘Miyo ddili Yehova. Kammwebedhe mulugu mwina ohili miyo.’

Mizé bagakita vamwangoni, Yehova ohimvaha malamulo aloga malago a omwebedhana Yehova. Mizé ohileba malamuloya, ohawengesela ana Izrayel. Awene ahilibela: ‘Dhetene dhilogile Mulugu ninovirihamo.’ Awene ahilibela vamentoni va Mulugu. Koddi agahiwodha ovirihamo?