Mudhidhi mwina, ana Izrayel balivi mwiddeddereni, Koré, Datan, Abiran vina alobwana 250 ahimusadduwela Mizé. Amwaddela dhahi: ‘Iyo nihulemana! Weyo onkalelavi nni musogorheli wehu, nanda Aroni akala namakutta munddimuwa? Yehova oli na iyo notene, kahiyo na nyuwovi.’ Eji yahimusilidha Yehova. Iyene watanalela wi alobwanaya aba otene aahimusadduwela.

Mizé omwaddela Koré na akwaye dhahi: ‘Mangwana mufiye mumparhani mwa Nabuya, mudhena vyobo dh’omuddumeyamo lubani. Yehova onele outonyihedhani onimusakuliye.’

Mmangwananimwa, Koré na alobwana 250 afiya vali Mizé, mmusanani mwa Nabuya. Amuttukula lubani amuddumeyela Nabuya alagihaga ninga ali anamakutta. Venevo Yehova omwaddela Mizé na Aroni eraga: ‘Arabeleni attu aba.’

Aroni badhowile mmusanani na Mizé, Datan, Abiran na mirala dhawa dhikodda ofiyawo. Yehova ohapanga ana Izrayel wi arabele misasa dha Koré, Datan na Abiran. Ana Izrayel arabelawo momaguva. Datan na Abiran abuduwa mmisasani  mwawa ahimela otakulu. Saddu, mattaka atweya vari, ahamedha otene! Mmusanani muhibudduwa motto omuddumeya Koré na alobwana 250.

N’omala Yehova omwaddela Mizé: ‘Kattukula mutogonyo wa mahimo otene olebevo mazinawa. Ogakosa dhawene, fibo ya nihimo na Levi olebevo nzina na Aroni. Wike mmusanani, fibo ya muttu onamusakule miyo enela omela marhuwa.’

Mumangwananimwa, Mizé ottukula fibo dhotene, oatonyihedha makolo. Fibo ya Aroni emela marhuwa vina amendowa owaralene. Mulagiho obu watonya wila Yehova ohimusakula Aroni wi akale namakutta munddimuwa.