Mizé valiye Vamwangoni Sinai, Yehova omwaddela wila amage numba enittaniwa tabernakulu wila ana Izrayel amulabege mwenemo Mulugu. Numbaya ejo yafuniwana wi ettebiwege awene agamwalaga.

Yehova ohiloga: ‘Logá na nlogo wi muttu-muttu asoke bari munfuneliye wi akamihedhena mabasa aba a omaga.’ Nlogo na Izrayel nihisoka wero, safurhi, malugu ozerimela na vittunddu dhina dha muhaku wawinjiva. Awene vina ahisoka linyu, ttebe ya dhinama, kobiri, na dhilobo dhina. Awene aahitapuwa-wene mada mpaka Mizé ologa wila: ‘Dhihakwana! Munadhena viina.’

Ayana na alobwana awodha omaga na osasanyedha dhilobo dhokoddela, akamihedha omaga numbaya. Yehova wahakosiha okala anamaziwa owakwana. Ena anwodha ovulula osalu, oluwa dhilobo, obe okoddeliha. Enaya anwodha omagana malugu, olabana wero, vina osema tabwa.

Attu otene ahimaga ebuwa ninga mwalogeli Yehova. Awene ahikosa guwo yokoddela yagawa numba dhipaddi biilimo, mburo Wokoddela na mburo Wokoddela-Koddela. Mburo Wokoddela-Koddela, mwakoyiwa yobo ya nibagano. Yasasanyiwe na tabwa dha akasia na wero. Mburo wokoddela mwali panti dha nddarhama, meza, na ebuwa. Vatamuniva vahikala basiya vina ebuwa enddimuwa yaheleliwa mikutto. Yobo ya nipagano yannawubutxedha  aIzrayel malibelo amukoselani Yehova wi agahimwiwelela. Weyo onoziwa entapulela nipagano? Nlibelo na vawoka.

Yehova ohimusakula Aroni na anaye wi alabege vanumbaniva ninga anamakutta. Awene afuniwana wi ang’anelege vina amuhelelege Yehova mukutto. Wafuniwana ovolowa o Mburoni Wokoddela-Koddela wali Aroni bahi vowi wali namakutta munddimuwa. Iyene wavolowa dila modha bahi vayakani wi ahelele mukutto dhottega dhaye, dha anaye, dha muralaye, vina dha nlogo notene.

Aizrayel amariha omaga numba eji pavirile yaka yantero babudduwile mw’Ijipitu. Ovano awene ahikana mburo womwebedhavo Yehova.

Yehova okunela numbaya na nttittimiho naye, vina mirabo dhikunela numba yotene. Mudhidhi wotene okuneli mirabo numbaya, aIzrayel aahimela muttu-muttu venevo valiye. Mvenyelivo muraboya, ahizinddiyela wi wahifiya mudhidhi w’oviddiginya. Aahittiya numba baroma ofwara murabo.