Okala mw’Izrayel dhahi wakuweliwa Elkana watelile ayana eli, Ana na Penina, mwa dhahene iyene wamukweletxa ana. Vowi Penina wahikaana aima enjene, wannimbedda Ana sabwa y’owi kabala. Yaka-yaka Elkana wannattukula amudhaye bagadhowa webedha o mparhani wa Silo. Siku nimodha vadhowilani wahoona wila mwadhiye wokweleya Ana wahisivuwa vaddiddi. Iyene ompangarhaza: ‘Kulile mwadhaga Ana. Miyo ddili wawo. Ddinoukwela.’

Nomala, Ana osusa badhowa olobela yekavo. Iyene wakala olilavi, oku amukumbirhaga Yehova munlobeloni wi amukamihedhe. Iyene olibela dhahi: ‘Nabuya, mugaddivaha mwana, ddinouperhekelani nyuwo, nanda iyene onele oulabani mwigumini mwaye motene.’

Namakutta munddimuwa Elí mmooneliye Ana bagaloga yeka, wobuwela wi Anaya wahilezela. Ana omwakula: ‘Miyo kaddilezelile nabuya. Ddifwanyiwe makattamiho manddimuwa animwaddelemi Yehova.’ Eli wobuwela wi wahivonya, omwaddela: ‘Bahi-to Mulugu auvahe enimulobiwe.’ Ana okurumuwa murima, odhowa vyaye. Mvireli yaka modha, Ana okana mwana wa mulobwana, omuttuva nzina na Samuwel. Ana waziveliwa vaddiddi!

 Ana kadduwalile yalibeliye vamentoni va Yehova. Mmutadhiheliye Samuwel wamwa, omperhekela olaba mumparhani. Iyene omwaddela Elí: ‘Muzombwe ole wamulobemi Yehova dduddwene. Okalawo waye wotene ddinimperhekela Yehova.’ Ana na mamunaye Elkana, andowa omwaredhela Samuwel vyaka dhotene amugulelaga guwo dhiswa. Yehova omururiha Ana banvaha ana-alobwana araru vina ana-ayana eeli.